UÑTAM Pablox amparat cadenampi uchantatäskiwa, ukat uñchʼukiski uka Romankir soldado uñtarakma. Pablox Roman carcelankaskiwa. Roma jachʼa apnaqiri Cesarax juparux kamachanis ukwa suyaskäna. Carcelankaskäna ukhaxa, jupar uñanttʼir jutirinakarux katuqasipkänwa.

Kimsür Romankxasinwa Pablox judionakan jilïrinakapar jawsayäna. Ukatwa Romankaskir walja judionakax jutapxäna. Pablox Jesusata ukat Diosan apnaqäwipat yatichäna. Yaqhinapanakax iyawsapxänwa ukatwa Jesusan arkirinakapar tukxapxäna, ukat yaqhipanakasti janirakiw iyawsapkänti.

Pabloxa ukhamarakiw jupar uñjir soldadonakar yatichäna. Roman pä mara katxasipkäna ukhaxa, taqi khitinakarutï yatichirjamäkän ukanakaruw yatichäna. Ukatwa Roma jachʼa apnaqir Cesaran utapansa Diosan apnaqäwipat istʼapxänxa, ukat familiaranakapatxa yaqhipanakax cristianoptapxarakïnwa.

Ukampisa, ¿khitis aka mesan qillqaski? Jïsa, Timoteorakisä. Timoteox Diosan Apnaqäwipat yatichasinxa nayrax carcelankarakikïnwa, ukampis carcelat mistxänwa. Jichhax Pablor yanaptʼiriw jutatayna. ¿Kunsa qillqaskpacha? Uk yatxatañäni.

¿110 sarnaqäwin Filipos ukat Éfeso markanakat yatxataniwaytan uk amttati? Pablox uka markanakanwa cristiano tamanak uñstayañ yanaptʼäna. Ukat jichhax carcelankkasaxa jupanakaruw carta apayäna. Uka cartanakaxa Bibliankiwa, Efesios ukat Filipenses satawa. Akanxa Pablox Filipos markankir munat cristianonakarux kun sañs muni ukwa Timoteor saski.

Filipos markankir cristianonakax wal Pablorux khuyaptʼayapxäna. Kuntï Filiposat carcelar apayanipkäna ukatwa Pablox yuspäraski. Epafroditow uk apanitayna. Ukampis jupax wal usuntäna, niya jiwirjamänwa. Ukampis waliptxänwa, ukat kuttʼañatakïxänwa. Jupaw Pablon Timoteon qillqat cartxa Filipos markar apani.

Ukat Pablox carcelankkasax Bibliankki uka pä cartamp qillqarakïna. Mayxa Colosas sat markankir cristianonakatakiw qillqäna. ¿Kamsatas uk yattati? Colosenses satawa. Yaqhsti Filemón sat munat cristianoruw qillqarakïna, jupax Colosas markan jakasïna. Filemonarux Onésimo sat yanapiripatwa qillqäna.

Onesimox Romaruw Filemonan utapat sarxatayna. Onesimox kunjatxay yatchïna Pablon carcelankatapxa, ukat carcelaruw saratayna, ukanwa Pablox Diosat yatichäna. Ukat jankʼakiw cristianüxarakïna. Ukat Filemonan utapat sarxatapatxa wal amtasïna. ¿Kuns Pablox Filemonar qillqpachäna uk yattati?

Onesimor sumak katuqxam sasaw Pablox Filemonar säna. ‘Onesimor khitanxsmawa. Janiw juman yanapirimakïxiti jan ukasti cristiano jilatamäxarakiwa’ sasaw Pablox qillqäna. Colosas markarux pä cartas aptʼasitaw Onesimox kuttʼxäna. Mayax Colosankirinakataki ukat maynix Filemonataki. ¡Jupjam Onesimox cristianüxatap yatisax Filemonaxa wal kusispachäna!

Pablox Filipos markankir jilatanakaru qillqkäna ukat Filemonar qillqkäna ukhaxa, suma yatiyäwinak apayäna. ‘Timoteoruw khitanïxa’ sasaw Filipos markankirinakarux säna. ‘Ukampis nayax jutarakïwa’ sasaw säna. Ukat Filemonarux akham sasaw qillqäna: ‘Qurpachtʼasiñataki mä uta wakichtʼarapita’ sasa.

Carcelat mistxasaxa, Pablox jilat kullakanakapar tumptʼiriw walja markanak saräna. Ukampis wasitampiw Pablorux Roman katuntxapxäna. Jiwañ yatisxänwa. Ukatwa, Timoteor qillqäna jankʼaki jutañapataki. ‘Diosat janiw nayax jithiqkti, ukat jupax bendicitaniwa’ sasaw qillqäna. Pablox jiwxän ukatxa romanonakarakiw Jerusalenxa wasitampi phichkatxapxäna.

Ukampis Biblianxa jukʼampi utjaskakiwa. Jehová Diosax apóstol Juanampiw qhip qhipa libronak qillqayäna, Apocalipsis librox Juanan qillqatawa. Uka librox jutïr urunakat parli. Kunas jutïrin utjani uka tuqit uñjañäni.