Salmos 50:1-23
Asaf+ chachan salmopa.
50 Khititï diosanakan Diosapäki uka Jehová Diosaw+ arsuwayi,oraqenkir taqe jaqenakaruw tantachthapi,inti jalsut inti jalantkama.
2 Diosajj Sionatpachwa qhantʼani, uka markasti wali sumapuniwa.+
3 Diosasaw jutani, jupajj janiw amukejj quedaskaniti.+
Nakhantasirpach ninaw jupa nayraqatan utji,+jupa muytpachanjja thayampi, jallumpi, qʼejjo qʼejjompiw wali jachʼat istʼasi.+
4 Jupajja alajjpachan jakirinakampiru oraqen jakirinakampiruw jawsthapi,+ukhamat markapar juzgañataki, jupajj akham siwa:+
5 “Nayat jan jitheqtirinakar tantachthapipjjam,khitinakatï sacrificio toqe mä pacto nayamp lurapki ukanakar tantachthapipjjam”+ sasa.
6 Alajjpachanakajj cheqapar uñjir Diosätapwa yatiyapjje,kuna laykutejj Dios pachpaw Juezajja.+ (Sélah).
7 “Nayan markaja, istʼam, nayaw parläjja,Israel marka, juma contraw testigot saytʼäjja.+
Nayaw Diosätjja, juman Diosamätwa.+
8 Nayajj janiw sacrificionakam laykojj cheqañchksmati,janirakiw naya nayraqatankki uka enterpach nakhantayat ofrendanakatsa cheqañchksmati.+
9 Utamat mä toro apasiñajajj janiw nayatakejj wakiskiti,janirakiw uyunakamankir cabranak* apasiñajas wakiskiti.+
10 Kuna laykutejj montenkir* taqe salvaje animalanakajj nayankiwa,+taqe qollunakankir animalanakas nayankiwa.
11 Qollunakankir taqe jamachʼinakwa nayajj uñtʼta,+camponkir jan jaktʼkañ animalanakajj nayankiwa.
12 Nayatï manqʼat awtjayasirista ukhajja, janiw yatiykirismati,kuna laykutejj achunak churir oraqesa taqe kunanakatï ukan utjki ukanakas nayankiwa.+
13 ¿Toronakan aychapti nayajj manqʼäjja?
¿Cabranakan wilapti nayajj umäjja?+
14 Diosar yuspäram, uksti sacrificiökaspas ukham loqtam,+Jachʼa Diosar arskta uka promesanakam phoqam.+
15 Llakisiñ tiemponjja nayar jawsita.+
Nayaw salväma, jumasti nayarojj jachʼañchitätawa”.+
16 Ukampis Diosajj jan wali jaqerojj akham saniwa:
“¿Kuna derechonïtas nayan leyinakajat parlañatakejja,+jan ukajj kuna derechonïtas pactojat parlañatakejja?+
17 Kuna laykutejj cheqañchäwjja jumajj uñistawa,arunakajsa janiw katoqasktati.+
18 Kunapachatï mä lunthatar uñjkta ukhajja, walikïkaspas ukham uñjtajja.*+
Adulterio juchan sarnaqerinakampiw chikachasiraktajja.
19 Kunatï jan walïki ukjja lakamampiw yaqhanakar parltajja,lajjramampejj engañjaraktawa.+
20 Qontʼastawa, ukatjja pachpa jilam contraw parltajja,+pachpa jilamatwa yaqhanakar parlasiraktajja.
21 Kunapachatï jumajj ukanak lurkayäta ukhajja, amukiw nayajj quedasiyäta,jumjamäkiristsa ukhamwa jumajj amuyayätajja.
Ukampis jichhajj nayajj cheqañchsmawa,juchanakamwa nayajj uñachtʼayarakïma.+
22 Mirä amp suma, Diosat armasipkta ukanakajj uka toqet amuytʼapjjam.+
Janitï ukhamäkanejja, kunapachatï jiskʼa jiskʼa tʼunjapkäma ukhajj janiw khitis salvapkätamti.
23 Nayar yuspärkitu, sacrificiökaspas ukham uka yusparasiñ loqtkarakitu ukajj nayaruw jachʼañchitu,+khititejj mä amtampi mä thaki arkki ukarojja,nayaw salväjja”.+
Notanaka
^ Hebreo arunjja, “orqo cabranak”.
^ Jan ukajja, “bosquenkir”.
^ Ukajja, “jupampiw mayachastajja” sasaw jaqokipasirakispa.
