Salmos 41:1-13
Directorataki. Davidan salmopa.
41 Khititï jan khiti yanapirini jaqer yanaptʼki ukajja kusisitawa,+Jehová Diosaw juparojj jan waltʼäwi urun salvani.
2 Jehová Diosaw juparojj imani, jakayaskarakini.
Oraqenjja mayninakajj kusisitätapwa uñjapjjani.+
Janipuniw kunäkipansa enemigonakapar katuykätati.+
3 Kunapachatï jupajj usutäkani, ikiñankkarakini ukhajja, Jehová Diosajj janiw jaytanukkaniti.+
Usuntatäkani ukhajja jumaw uñjäta.*
4 Nayasti akham sayätwa: “Jehová Dios Tata, sumakiy nayar uñjita.+
Qolltʼasikitaya,+ juma contra juchachasitaj layku”+ sasa.
5 Ukampis enemigonakajajj akham sasaw jan walinak nayat parlapjje:
“¿Kunapachas jupajj jiwjjani, sutipas chhaqtjjarakini?” sasa.
6 Jupanakat maynejj nayar uñjir jutkitu ukhajja, chuymapajj kʼarinakwa parli.
Jan wali yatiyäwinakwa apthapi,ukatsti mistuwayasaw yaqhanakar parlaraki.
7 Taqe khitinakatï nayar uñisipkitu ukanakajja, jupanakkamajj jiskʼatakwa parlasipjje.
Naya contraw jan walinak amtapjje, akham sapjjewa:
8 “Mä jan waltʼäwiw jupjjar juti.
Niyakejjay jupajj ikiñan jaqontatächejja, janiw wasitat sartjjaniti”+ sasa.
9 Khititejj nayamp sumankkäna, khitirutï nayajj confiykayäta,+khititejj nayan tʼantʼajat manqʼaskäna ukaw naya contrajj saytʼi.*+
10 Ukampis Jehová Dios Tata, sumakiy nayar uñjita, wayttʼasikitaya,ukhamat luratanakapat jupanakar castigañajataki.
11 Akhamatwa nayar sum uñjatam yatëjja:
kunapachatï enemigojajj jan atipjkitani ukha.+
12 Taqpach chuymampi servitajatwa jumajj katjjasistajja,+jumasti wiñayatakiw juma nayraqatan quedasiyitäta.+
13 Israelan Jehová Diosapajj jachʼañchatäpan,wiñayans wiñayapataki.*+
Amén, amén.
Notanaka
^ Jan ukajja, “jumaw ikiñapjja taqpach cambiäta”.
^ Hebreo arunjja, “ukaw naya contrajj kayu talonap ayti”.
^ Jan ukajja, “wiñayatpach wiñayataki”.
