Salmos 38:1-22
Davidan salmopa. Amtayañataki.
38 Jehová Dios Tata, janikiy coleratajj jan wali lurataj uñachtʼayistati,janikiy wali coleratajj cheqañchistati.+
2 Kuna laykutejj flechanakamajj wali manqhakamaw nayarojj puritu,amparamasti walpun nayjjarojj jatjitu.+
3 Colerasitam laykojja taqpach cuerpojajj usutawa.
Juchaj kawsajja janiw chʼakhanakajan sumankañajj utjkiti.+
4 Pantjasitanakajajj pʼeqej patjjan montonjjatatawa,+mä jathi qʼepir uñtasitawa, qʼepiñas nayatakejj sinti jathiwa.
5 Heridanakajajj thujsiwa, jenqʼechrantatarakiwa,jan amuytʼasirïtaj layku.
6 Nayajj wali llakitätwa, qʼala aynachtʼatarakïtwa,uru jurnälaw nayajj llakit sarnaqta.
7 Ninaw naya manqhan nakhi,taqpach cuerpojas usutawa.+
8 Nayasti tunuratätwa, qʼala atjjatatarakïtwa.
Llakit chuymajajj walpun warariyitu.
9 Jehová Dios Tata, taqe kuntï nayajj munkta ukanakajj juma nayraqatankiwa,llakirtʼasitajajj janiw jumat imantatäkiti.
10 Chuymajajj putuqewa, chʼamajas sarjjewa,nayranakajan qhanapas jaytawayjjetuwa.+
11 Usutätaj laykojj amigonakajasa compañeronakajas janiw jakʼachasjjapjjetuti,wali uñtʼat masinakajas jayatakwa uñchʼukinipjjetu.
12 Khitinakatï jiwayañ munapkitu ukanakajj trampanakwa uskupjje,nayar usuchjañ munapkitu ukanakajj nayar tukjañatwa parlapjje.+
Uru jurnälaw jupanakajj engañjañ amtasipki.
13 Ukampis mä oqar jaqer uñtataw nayajj jan istʼkti,+mä amut jaqer uñtataw jan arskti.+
14 Jan istʼañ puedki uka jaqjamaw nayajj tukta,kunjamtï uka jaqejj jupa pachpa arjjatasiñatakejj jan arsurjamäki ukhamwa nayajj tukta.
15 Jehová Dios Tata, nayajj jumaruw suytʼayäsma.+
Jehová Dios Tata, nayan Diosaja, jumasti nayarojj jaysistawa.+
16 Nayajj akham sayätwa: “Janikiy jupanakajj nayat larusipjjpanti,kayujatï llustʼtani ukhajja, janikiy jupanak pachpajj jachʼañchasipjjpanti” sasa.
17 Kuna laykutejj nayajj jaqotattirpachayätwa,tʼaqesitajas nayamp chiktʼatapunïnwa.+
18 Pantjasitajatwa nayajj arsusiyäta,+juchaj kawsasti wali llakitäyätwa.+
19 Ukampis enemigonakajajj jakasipkiwa, chʼamanïpjjarakiwa.*
Ina chʼusat uñisipkitu ukanakajj waljanëjjapjjewa.
20 Walitjja jan walimpiw kuttʼayapjjetäna,kunatï walïki uk jan lurañajatakiw jarktʼañ munapjjetäna.
21 Jehová Dios Tata, janikiy apanuktʼasistati.
Dios Tata, janikiy nayat jayan quedasimti.+
22 Nayar yanaptʼañatakejj apurasinikimaya,Jehová Dios Tata, jumaw nayan salvirijätajja.+
Notanaka
^ Ukajja, “ina chʼusat enemigonakajar tukupki ukanakajj waljanïpjjewa” sasaw jaqokipasirakispa.
