Proverbios 18:1-24
-
Mayninakat jitheqtir jaqejja pachpa munañanakapakwa thaqe, yatiñsa apanukurakiwa (1)
-
“Jehová Diosan sutipajja mä jachʼa torrewa” (10)
-
Qamir jaqejja utjirinakapajj jarkʼaqasiñ perqäkaspas ukhamwa amuyi (11)
-
Yatiñanïki ukajja juchañchatampiru juchañchirimpiruw istʼi (17)
-
“Mä jilat sipansa jan jaytjasir mä amigow utji” (24)
18 Mayninakat jitheqtir jaqejja pachpa munañanakapakwa thaqe,yatiñsa apanukurakiwa.*
2 Jan amuytʼasir jaqejja janiw kunsa mayninakat yateqañ munkiti,antisas kunatï chuymapan utjki ukanakwa yatiyañ muni.+
3 Kunapachatï jan wali jaqejj jutki ukhajja, jiskʼachatäñaw jutaraki,kunapachatï mä jaqejj jan amuytʼasis kuns luri ukhajja, uka jaqejj jiskʼachataw uñjasi.+
4 Jaqen lakapat mistur arunakajja wali manqha umanakar uñtasitawa.+
Jupat jutki uka yatiñajja jawir umar uñtasitaw jalani.
5 Jan wali jaqe favor saytʼasiñajj janiw walïkiti,+cheqapar sarnaqer jaqer mä juicion juchañchañajj janirakiw walïkiti.+
6 Jan amuytʼasir jaqen arunakapajja toqesiñanakwa utjayi,+lakapajj nuwjayasiñatakiw yaqhanakar jawsi.+
7 Jan amuytʼasir jaqen lakapajja jan waliruw api,+arunakapas vidapatakejj mä sipitawa.
8 Kʼarintir jaqen arunakapajja suma manqʼar uñtasitawa,+manqʼantatasti cheqakiw purakar manti.+
9 Khititï trabajopan jayräki ukajja,tukjir jaqen jilapawa.+
10 Jehová Diosan sutipajja mä jachʼa torrewa,+cheqapar sarnaqer jaqejja ukar tʼijusaw jarkʼaqasi.*+
11 Qamir jaqen utjirinakapajja jachʼa perqanakamp muyuntat markar uñtasitawa,utjirinakapajj jupar jarkʼaqer muralläkaspas ukhamwa jupajj amuyi.+
12 Janïr mä jan waltʼäwi utjkipanjja, jaqen chuymapajj jachʼa jachʼaw tuku,+janïr jachʼañchäwi utjkipanjja, humilde chuymanïñaw utji.+
13 Kunapachatï maynejj janïr kun istʼkasin jankʼak jayski ukhajja,ukajj jan amuytʼasiñawa, jiskʼachasiñarakiwa.+
14 Khititï kusisit chuymanïki ukajja usunak aguantaspawa,+ukampis ¿khitirak aynachtʼatäki ukhajj aguantaspasti?+
15 Amuytʼasir jaqen chuymapajja yatiñwa jikjjati,+yatiñan jaqen jiñchupajja yatiñ jikjjatañwa thaqe.
16 Regalo churir mä jaqetakejja walja punkunakaw jistʼarti,+marka apnaqerinakan ukaruw irparaki.
17 Juchañchatäki uka jaqejja juez nayraqatan cheqäkaspas ukhamwa parli,+ukampis juchañchirejj jutasin jupar jisktʼki ukhajja, kunatï cheqäki ukaw qhansti.+
18 Suertenak willtañampiw jan waltʼayasiñanakajj tukuyi,+ukhamatwa khitis cheq parli ukajj yatisjje.
19 Chuyma ustʼat mä jilatajja jan mantkaya jachʼa perqanakamp muyuntat markat sipansa jukʼamp jan mantkayawa,+jan waltʼayasiñanakajja mä markan punkunakapankir trancanakapjamawa.+
20 Kuntï mä jaqejj lakapampi arski ukajja purakapar phoqtʼayki uka manqʼar uñtasitawa,+kuntï lakapampi arsus jikjjatki ukampejja chuymas chuymaw jupajj jikjjatasirakini.
21 Lajjran chʼamapanjja jiwañampi jakañampiw utji,+khitinakatï parlañ wal munapki ukanakajja lajjrapan achunakapwa manqʼapjjani.+
22 Khititï mä suma esposa jikjjatki ukajja, mä bendición jikjjati,+Jehová Diosampis suma uñjatarakiwa.+
23 Pobre jaqejja ruwtʼasisaw yanap mayisi,ukampis qamir jaqejj qhoru* arunakampiw jaysi.
24 Jupanakkam jan waltʼayasir amigonakaw utji,+ukampis mä jilat sipansa jan jaytjasir mä amigow utji.+
Notanaka
^ Jan ukajja, “jiskʼacharakiwa”.
^ Hebreo arunjja, “alto lugarar uskutajja”. Ukajja, jan khitin alcanzkayäñatwa, salvatäñatwa parlaski.
^ Variante: “phiru”.
