Mateo 1:1-25
1 Aka librojj Jesucriston* vidapat parli,* jupasti Davidan wawapänwa,+ Davidasti Abrahanan wawaparakïnwa:+
2 Abrahanajj Isaacan awkipänwa;+Isaacajj Jacobun awkipänwa;+Jacobojj Judá+ chachampin jilanakapampin awkipänwa;
3 Judajj Pérez chachampin Zérah+ chachampin awkipänwa, jupanakan mamapasti Tamar satänwa;Perezajj Hezronan+ awkipänwa;Hezronajj Ram+ chachan awkipänwa;
4 Ram chachajj Aminadaban awkipänwa;Aminadabajj Nahsón+ chachan awkipänwa;Nahsón chachajj Salmonan awkipänwa;
5 Salmonajj Boaz chachan awkipänwa, jupan mamapasti Rahab+ satänwa;Boazajj Obed chachan awkipänwa, jupan mamapasti Rut+ satänwa;Obedajj Jesé+ chachan awkipänwa;
6 Jesé chachajj David+ reyin awkipänwa.
Davidajj Salomonan+ awkipänwa, Salomonan mamapajj Urías chachan warmipänwa;
7 Salomonajj Rehoboaman+ awkipänwa;Rehoboamajj Abiasan awkipänwa;Abiasajj Asá+ chachan awkipänwa;
8 Asá chachajj Jehosafatan+ awkipänwa;Jehosafatajj Jehoraman+ awkipänwa;Jehoramajj Uziasan awkipänwa;
9 Uziasajj Jotanan+ awkipänwa;Jotanajj Acazan+ awkipänwa;Acazajj Ezequiasan+ awkipänwa;
10 Ezequiasajj Manasesan+ awkipänwa;Manasesajj Amonan+ awkipänwa;Amonajj Josiasan+ awkipänwa;
11 Josiasajj+ Jeconiasampina+ jilanakapampina awkipänwa, ukapachaw judionakajj Babilonia+ markar apat uñjasipjjäna.
12 Judionakajj Babiloniar apatäpkäna uka qhepatwa Jeconiasan yoqapajj nasïna, jupasti Sealtiel satänwa;Sealtielajj Zorobabelan+ awkipänwa;
13 Zorobabelajj Abiud chachan awkipänwa;Abiud chachajj Eliaquiman awkipänwa;Eliaquimajj Azoran awkipänwa;
14 Azorajj Sadocan awkipänwa;Sadocajj Aquim chachan awkipänwa;Aquimajj Eliud chachan awkipänwa;
15 Eliudajj Eleazaran awkipänwa;Eleazarajj Mattán chachan awkipänwa;Mattanajj Jacobun awkipänwa;
16 Jacob chachajj Josean awkipänwa, Joseasti Marian chachapänwa, jupatwa Jesusajj nasïna,+ jupajj Cristo sasin uñtʼatarakiwa.+
17 Abrahanat Davidkamajja 14 nayra awkinakaw jakapjjäna. Davidajj jakkäna uka urunakat judionakajj Babiloniar apatäpkäna ukhakamajja, 14 nayra awkinakaw jakapjjäna, Babiloniar apatäpkäna uka tiempot Cristokamajja 14 nayra awkinakaw jakapjjarakïna.
18 Kunjamatsa Jesucristojj nasïna ukajj akhamänwa: María mamapajj Joseampi casarasiñataki parlatänwa. Ukampis janïr chikäpkäna ukhaw Mariajj Diosan espíritu santop taypejj+ usuriptäna.
19 José chachapasti* taqe kuns cheqapar lurir jaqënwa. Ukhamajj janiw Marian honrap aljañ munkänti, ukatwa jamasat divorciasiñ amtäna.+
20 Joseajj ukanakat wal lupʼïna.* Uka qhepatjja Jehová* Diosan angelapaw jupar mä samkan uñstäna, ukatsti akham sänwa: “José, Davidan yoqapa, jan ajjsaramti, María warmimarojj utamar irpaskakim. Jupajj Diosan espíritu santop taypiw usurëjje.+
21 Jupasti mä yoqall wawa ususini, Jesús* sasaw sutiyarakïta,+ jupaw markaparojj juchanakapat salvani”+ sasa.
22 Taqe ukanakasti kuntï Jehová* Diosajj profetap taypi siskäna ukanakan phoqasiñapatakiw pasäna, jupajj akham sänwa:
23 “Mä virgen tawaqow usuriptani, mä yoqall wawa ususini, uka wawarojj Emmanuel sasaw sutiyapjjarakini”+ sasa. Uka sutejja “Diosajj jiwasampïskiwa”+ sañ muni.
24 Joseasti ikit sartasinjja, kunjamtï Jehová* Diosan angelapajj siskäna ukarjamaw luräna, utaparuw warmipjja irpasjjäna.
25 Ukhamarus wawan nasiñapkamajja, janiw chacha warmjam ikthapipkänti.+ Wawajj nasjjäna ukhajja, Jesús sasaw Joseajj sutiyäna.+
Notanaka
^ Jan ukajja, “Jesús Mesiasan”. Cristo, Mesías uka arunakajj “ajllita” sañ muni.
^ Jan ukajja, “Aka libronjja kawkïr familianakatsa Jesucristojj juti ukanakat parli”.
^ Casarasiñataki parlatäpki ukanakaruw chachapa jan ukajj warmipa sasin judionakajj sapjjerïna.
^ Jan ukajja, “wal piensäna”.
^ Diosan Jehová sutipajja, 237 kutiw Griego Arut Qellqatanakan uñsti. Nayrïrejj aka cheqanwa uñsti. Apéndice A5 liytʼäta.
^ Jesús sutejja, hebreo arunjja Jesúa, Josué sasirakispawa. Uka sutejja, “Jehová Diosaw Salvacionajja” sañ muni.
^ Apéndice A5 liytʼäta.
^ Apéndice A5 liytʼäta.
