Judas 1:1-25
1 Naya Judasajj Jesucriston esclavopätwa, Santiagon jilaparakïtwa.+ Nayasti Dios Awkisan wali munat jawsatanakaruw+ qellqanipjjsma, khitinakatejj Jesucristompi chikäñatak imatäpkta ukanakaru:+
2 Diosan khuyapayasiñapasa, sumankañapasa, munasiñapasa jumanak taypin jukʼamp utjpan.
3 Munat jilatanaka, Diosajj salvkistani+ uka toqet qellqaniñ wal munapjjayäsma. Ukampis jichhajj jumanakar chʼamañchtʼañatak qellqaniñajaw wakisi, ukhamat santo jilatanakarojj Diosar confiyañ*+ mä kutiki wiñayatak yatichaskäna uk taqe chʼamampi arjjatapjjañamataki.
4 Jumanak taypirojj jan amuykañakwa yaqhep jaqenakajj mantanipjje, uka jaqenakar juchañchañatakejj nayratpachwa Qellqatanakan parlasjjäna. Jupanakajj jan wali jaqenakäpjjewa, jan phenqʼani jucha+ lurañ* laykojj Diosasan wali khuyapayasiñapsa mayjtʼayapjjewa, jiwasar alaskistu uka mä sapa Jesucristo Tatitusatsa jitheqtapjjewa,+ ukatwa nayajj qellqanipjjsma.
5 Taqe ukanakat sumsa yatisipkstajja, nayajj amtayañwa munapjjsma: Jehová* Diosajj mä markaruw Egipto oraqet salväna,+ ukampis qhepatjja jupar jan confiyirinakarojj* tukjänwa.+
6 Kawkïr angelanakatï alajjpachan lurañanakap jaytapkäna, utjäwinakapsa apanukupkäna+ ukanakarojja, wiñay cadenanakampi chinuntasaw wali chʼamakan imäna, ukhamat jachʼa urun juzgatäpjjañapataki.+
7 Sodoma, Gomorra markanakasa uka jakʼankir markanakasa ukhamarakiw qʼañu juchanakjja* añchapun lurapjjäna, chachapura jan ukajj warmipura juchanak luririnakjamaw jan walinak lurapjjäna.+ Jupanakajj wiñay ninamp castigataw uñjasipjjäna,+ ukanakajj jiwasan amuyasipjjañasatakiwa.
8 Ukhamäkipansa jumanak taypir mantanipki uka jaqenakajj pantjat amuyunakapampiw* apayasipjje, qʼañu luräwinakan sarnaqapjje, pʼeqtʼirinakarus jiskʼachapjje, khitinakarutï Diosajj jachʼañchki ukanak contras jan walinakwa parlapjje.+
9 Ukhamarus Miguel+ arcangelajj+ Moisesan cuerpopjjat+ Diablompi jiskhiskäna ukhajja, janiw jan wali arunakampejj Diablor juchañchkänti,+ jan ukasti “Jehová* Diosaw jumar juchañchätam”+ sasaw säna.
10 Ukampis uka jaqenakajj kunanaktï jan amuyapki taqe ukanak contraw jan walinak parlasipki.+ Jupanakajj jan amuytʼasir animalanakjamäpjjewa, taqe kunanaktï jupanakajj lurapki ukanakjja animalanakjamaw lurapjje,+ kunanakatï jupanakar jan walir purtʼasiyki ukanak lurasipkakiwa.
11 ¡Jupanakajj kamachapkakini! Cainan thakipwa arkapjje,+ qollqe laykuw Balaam chachan jan wali thakipar saranukupjje,+ jupanakajj Coré chachjamarakiw pʼeqtʼirinak contra parlasipki,+ ukatwa Coré chachjam jiwarapjjani.+
12 Jumanakajj fiestanaka munasiñat lurapkta ukanakanjja, jupanakajj jumanakamp chikaw tantachasipjje, ukampis jupanakajj uma manqhan imantat jachʼa qalanakäpjjewa,+ Diosar jan ajjsartʼas jupanak pachpa alimentasir awatirinakäpjjewa;+ uksar aksar thayamp apata jan umani qenayanakäpjjewa;+ tiempopar jan achoqeri, qʼala jiwsuta,* saphitpach jikʼsuta qoqanakäpjjewa;*
13 jupanakajj lamar qotankir jachʼa oladanakäpjjewa, jan phenqʼan luratanakapjja jopoqonakar uñtatwa jaqsunipjje;+ saranukut warawaranakäpjjewa, jupanakajj wali chʼamak lugarar wiñayatak uchatäpjjaniwa.+
14 Enoc+ chachas jupanakjjat parlarakïnwa, jupajj Adanat jutir paqallqöri jaqënwa, jupajj akham sänwa: “Jehová* Diosajj waranq waranqa* santo angelanakapampiw jutani,*+
15 ukhamat taqenir juzgañataki,+ taqe jan wali lurir jaqenakar jan wali luratanakapat juchañchañataki, jan walinak lurapjjatap laykuw Diosajj uk lurani. Jupanakajja juchararanakäpjjewa, janiw juparojj jachʼañchapkiti, jupa contraw jan walinak parlapjjaraki”+ sasa.
16 Jupanakajj quejasirinakäpjjewa,+ kunatï jupanakan utjki ukampis janiw contentasipkiti, jan wali munañanakapampiw apayasipjje.+ Jachʼa jachʼa tukusaw parlapjje, kunatï jupanakatak walïki uk thaqasakiw yaqhanakarus jachʼañchtʼapjje.+
17 Jumanakajj munat jilatanaka, kunanaktï Jesucristo Tatitusan apostolonakapajj yatiyapkäna uka arunak amtapjjam,
18 jupanakajj akham sapjjerïtamwa: “Qhepa urunakanjja* sawkasirinakaw utjani, jupanakajj jan wali munañanakapan qhepapwa sarapjjani”+ sasa.
19 Jupanakajj tʼaqa tʼaqa sarnaqañar apirinakäpjjewa,+ animalanakjamaw kuns lurapjje, Diosan espiritupampis janiw irpayasipkiti.
20 Munat jilatanaka, jumanakajj Diosar cheqpach confiyañan* chʼamañchtʼasisipkakim, espíritu santomp irpayasis oración lurapjjam,+
21 ukhamat jumanakajj Diosan wali munata jakasipkakiñamataki,+ Jesucristo Tatitusan khuyapayasiñapat wiñay jakañ katoqapkäta uk suyasa.+
22 Payachasirinakatsa+ khuyaptʼayasisipkakim,+
23 ninat waysusin salvapjjam.+ Mayninakatjja khuyaptʼayasisipkakim, wali amuyumpi uk lurapjjam. Jupanakajj jañchin jan wali luräwinakapampiw+ isip qʼañuchasipjje, ukhamajj jupanakar khuyaptʼayasajj jan uka isinakapar jakʼachasipjjamti.
24 Jichhajj khititï juchar jan purtʼasipjjañamataki* yanaptʼapjjeristam, kʼajtatap nayraqatansa jan juchani+ wali kusisita saytʼayapjjeristam
25 uka Salviri mä sapa Diosasajja, Jesucristo Tatitus taypi jachʼañchatäpan. Jachʼañchatäñasa, jachʼa reyïñasa, chʼamanïñasa, munañanïñasa jupampïpan, wiñayatpachasa, jichhasa, wiñayatakisa. Amén.
Notanaka
^ Jan ukajja, “fe; iyawsäwi”.
^ “Jan phenqʼani jucha luraña” siski uk glosarion liytʼäta.
^ Apéndice A5 liytʼäta.
^ Jan ukajja, “jan feininakarojj; jan iyawsirinakarojj”.
^ “Qʼañu jucha” siski uk glosarion liytʼäta.
^ Jan ukajja, “samkanakapampiw”.
^ Apéndice A5 liytʼäta.
^ Griego arunjja, “pä kuti jiwata”.
^ Jan ukajja, “arbolanakäpjjewa”.
^ Jan ukajja, “jutäna”.
^ Jan ukajja, “walja tunka waranqanaka”.
^ Apéndice A5 liytʼäta.
^ Griego arunjja, “Qhepa tiemponjja”.
^ Jan ukajja, “fe; iyawsäwi”.
^ Jan ukajja, “khititï jan lanktʼasipjjañamataki”.
