¿Chem mülei tañi femal Dunguquelu Ineingen Jehová ngerpual?

AMULCÜNUNGEAL

Mateo 28:19, 20 mu Jesús pengeli chem mülei tañi femal tati pu che Dunguquelu Ineingen Jehová ngerpual. Tüfachi troquiñ Biblia feipi quiñeque dungu ñi femal, Jesús tañi pu inanieteu mülei ñi dungual Jehová mu engün.

Quiñe dungu tami femal: Quimal Biblia ñi quimeltuqueel. Jesús huercüi tañi pu inanieteu ñi quimeltulelafiel ta pu che tañi inayal com tañi huercüfiel quisu, ca discipulo ngerpual ta pu che (Mateo 28:19, 20). Ti dungu discipulo cüpa feipi “quiñe che tañi quimeltulelngequeel”. Biblia mu, mülelu cai Jesús tañi quimeltuqueel, fei tami duamnieel tami nieal quiñe ayühun-ngechi mongen (2 Timoteo 3:16, 17). Cüme duam mu pengelelngeafuimi Biblia ñi quimeltuqueel quiñe chillcatun mu cullingequenolu (Mateo 10:7, 8; 1 Tesalonicenses 2:13).

Epu dungu tami femal: Mülei tami femal com tami quimeltulelngeel. Jesús feipi tati pu quimeltulelengequelu ñi ‘inayal com tañi huercüfiel quisu’ (Mateo 28:20). Tüfa cüpa feipi ngelai taiñ re quimafiel müten tüfachi dungu. Huelu mai mülei chi tami cacünutual chumngechi tami raquiduamqueel ca tami femqueel. (Hechos 10:42; Efesios 4:22-29; Hebreos 10:24, 25). Feiti pu feyentulu Jesús tañi huercün dungu nengümqueyu ñi inayafiel engün, ca eluuqueingün ñi hulal ñi mongen Jehová mu (Mateo 16:24).

Cüla dungu tami femal: Tami fautizahual (Mateo 28:19). Biblia mu trürümngequei ti fautizahun quiñe rüngalngen reque (ca ngüneduamafuimi Romanos 6:2-4). Tati fautizahun adentulei taiñ lan mu reque taiñ cuifique mongen, ca llitutun mu hue mongen. Feimu, fautizahun mu pengelimi fentren che ñi adquiñ mu deu femlu tati epu hunen dungu tañi feipiel ta Jesús, ca femngechi ngillatufimi ta Ngünechen tami nietual quiñe lif cüme raquiduam (Hebreos 9:14; 1 Pedro 3:21).

¿Chumngechi am quimafun ñi pepicaucülen tañi fautizahual?

Quimeltulelfinge tati pu loncolelu tami trahunche mu. Fei quisu engün dunguai eimi emu ñi peam engün tami cüme quimfiel Biblia ñi quimeltuel, femmequeimi tami quimeltungeel, ca huluhuimi ta Ngünechen meu quisu tami duam mu (Hechos 20:28; 1 Pedro 5:1-3).

Tüfachi cüla dungu taiñ feipipeel nga, ¿ca coneltuafui am tati pu Dunguquelu Ineingen Jehová ñi pu fotüm ca pu ñahue?

Mai. Iñchiñ ‘cüme tremümquefiyiñ ca quimeltuquefiyiñ taiñ pichique che ñi poyeafiel ta Ngünechen’ (Efesios 6:4). Huelu deu tremle engün, quisu ñi ayün mu dulliai ñi quimal, llohuafiel ca feyentuafiel ñi feipilen tati Biblia, femngechi tañi pepi fautizahual (Romanos 12:2). Quisuque tati pu che mülei ñi dullial ñi poyeafiel cam poyenoafiel ta Jehová (Romanos 14:12; Gálatas 6:5).