QUIMELTUN 46

¿Chumngelu hultucuaimi tami mongen Jehová meu ca fautizahuaimi?

AMULCÜNUNGEAL

Hultuculmi tami mongen Jehová meu, ngillatun meu feipiafimi tami poyeafiel ta quisu müten ca tami femal tañi ayüqueel com tami mongen meu (Salmo 40:8). Fei fautizahulmi, caquelu che quimai tami hultucun tami mongen Jehová meu. Hulcünual taiñ mongen Jehová meu fei tati doi falin dungu taiñ femafel iñchiñ taiñ mongen meu. Fei ¿chem nengümafeimu tami femal tüfachi falin dungu?

1. ¿Chem nengümaimu tami hulal tami mongen Jehová meu?

Tami rume piuqueyeniefiel ta Jehová nengümaimu tami hulcünual tami mongen Jehová mu (1 Juan 4:10, 19). Biblia feipi: “Piuqueyefinge tami Chau Ngünechen Jehová com tami piuque mu, com tami mongen, com tami raquiduam ca com tami nehuen meu” (Marcos 12:30). Piuqueyefilmi ta Jehová quimfalngeai tami feipin ca tami femqueel meu. Chumngechi quiñe huentru ca quiñe domo eluulu ñi niehual fente tañi piuqueyehun meu, ca femngechi iñchiñ fente taiñ piuqueyefiel mu ta Jehová eluucüleiñ taiñ hultucual taiñ mongen quisu meu ca taiñ fautizahual.

2. Jehová, ¿chem cümelcan eluquefi pu fautizaucülelu?

Fautizahulmi conaimi Jehová tañi ayüucülechi familia mu. Fei Jehová fillque dungu meu pengelaimu tunte tami piuqueyenieteu ca eimi doi fülmanieafimi ta quisu (papeltuaimi Malaquías 3:16-18). Cafei chauyeafimi ta Jehová ca huall Mapu meu nierpuaimi fentren pu peñi ca pu lamngen poyequefilu ta Jehová ca eluucülelu tami piuqueyeaeteu ta eimi (papeltuaimi Marcos 10:29, 30). Huelu petu tami fautizaunon mülei tami femal quiñeque dungu, ¿chem am chi? Mülei tami quimafiel ca piuqueyeafiel ta Jehová ca maneluucüleal quisu tañi Fotüm meu. Fei hula, feipicünuafimi ta Jehová tami hultucual tami mongen quisu meu. Com tüfa femülmi ca fautizahulmi, rumel mongen nierpuafuimi. Feimu tati Biblia feipi: “Ti fautizahun montulqueimünmeu” (1 Pedro 3:21).

DOI QUIMAIMI

¿Chumngelu duamfalngei tami hultucual tami mongen Jehová meu ca fautizahual? Feula inaduamafiyiñ.

3. Mülei taiñ dullial inei am poyeafiyiñ

Cuifi meu, quiñeque israelche raquiduamquefuingün ñi cümen trür poyeafiel ta Jehová ca quiñe coila dios, Baal pingelu. Huelu huelulcaucülefuingün, feimu Jehová huercüfi ta Elías tañi norümaeteu engün. Papeltuaiñ 1 Reyes 18:21, ca ngüneduamaiñ tüfachi ramtun:

Pu israelche, ¿chem dungu mülefui tañi dullial engün?

Pu israelche reque, iñchiñ ca mülei taiñ dullial inei am taiñ poyeafiel. Papeltuaiñ Lucas 16:13, ca ngüneduamaiñ tüfachi epu ramtun:

Iñchiñ pepi poyelayafuiñ ta Jehová ca caquelu dungu, ¿chumngelu cai?
Dulliliyiñ taiñ poyeafiel ta Jehová, ¿chumngechi am pengelelafuiñ?

4. Raquiduamnge tunte tami piuqueyenieteu Jehová

Jehová fentren cümelcan eluqueiñmu, fei ¿chem chumafuiñ iñchiñ quisu meu? Peaiñ ti VIDEO.

VIDEO: ¿Chem eluafuiñ ta Jehová? (3:04)

¿Chumngechi am Jehová pengeleimu tami piuqueyenieteu? Papeltuaiñ Salmo 104:14, 15 ca 1 Juan 4:9, 10, fei ngüneduamaiñ tüfachi epu ramtun:

Jehová fentren cümeque dungu elueimu, fei ¿chuchi am doi mañumquefimi?
¿Chum duamelqueimu com ñi femün Jehová eimi meu?

Quiñe che elueliyiñmu quiñe cüme regalo, cüpa pengelelafuiñ taiñ fente mañumcülen. Papeltuaiñ Deuteronomio 16:17, ca ngüneduamaiñ tüfachi ramtun:

Raquiduamülmi com tami elueteu Jehová, ¿nengümüñmaeimu tami piuque tami ca eluafiel ta quisu? Eimi, ¿chem eluafuimi ta Jehová?

5. Hultuculmi tami mongen Jehová meu, fütra cümelcangeaimi

Fentren che raquiduamquei taiñ ayüucüleal, mülei taiñ nierpual fütraque estudio, fentren plata cam tañi quimaeteu fentren pu che. Huelu, ¿rüfngepei mai tüfa? Peaiñ ti VIDEO, ca ngüneduamaiñ tüfachi epu ramtun.

VIDEO: Müna falintukefun ñi pelotatuken (5:45)

Taiñ peñi rume ayüquefui tañi pelotatual, huelu ¿chumngelu elcünufi?
Taiñ peñi elcünui tañi pelotatun ca eluhui ñi poyeafiel ta Jehová, fei ¿cümepei mai tañi femün? ¿Chumngelu femngechi feipiafuimi?

Pablo petu tañi cristianongenon, quiñe fütra quimeltuchefe quimeltueyu tati pu judio ñi ley, feimu Pablo falinque dungu femürpuafui feichi meu. Huelu elcünui com tañi quimürpuel tañi cristianongerpual, fei ¿huiñoraquiduamtupei mai? Papeltuaiñ Filipenses 3:8, ca ngüneduamaiñ tüfachi cüla ramtun:

Com ñi quimürpuel Pablo petu tañi cristianongenon, ¿chumngelu falinolu troquitufi?
Pablo tañi elcünuel meu, ¿chem cümeque dungu lloutui?
¿Doi cüme mongen nierpuafuimi mai eluhulmi tami poyeafiel ta Jehová? ¿Chem piafuimi?