CAPITULO 25

¿Chumafun tañi malüñmahuenoal tañi yehuel?

“Nielu iñche pura tripantu, eluhun ñi malütuhual. Quimtucun tañi huesalcan, feimu fill rupa tañi conün tüfachi huesa huimtun meu, rume huesa duamnagün. Turpu piuqueyelayaeneu Chau Dios piquefun”. Tüfa ñi feipiel Luiz.

PETU tremcülelu pu huechequeche, eluuqueingün tañi illutuafiel ti cudumuhun dungu. Feimu fentren engün malütuuqueingün. * “Chem dungu no, huesalcachequelai” piafeimu pu che. Huelu müna cümeafui tami famentuafiel tüfachi pod huimtun. Ti apostol Pablo feipi: “Com tati troquiñ ñi nieel tamün cuerpo [...] com ngünenieafimün [...] tamün rume illunienoal cudumuhun” (Colosenses 3:5). Huelu malütuhulmi, doi illutunieafimi cudumuhun, huelu fei müten no:

● Yequei ta che tañi quisutu duamuhual müten. Re raquiduamquei tañi cüme rupayal.

● Tati quisu malütuuquelu yamquelafi tañi afcadi ca niefi re tañi cudumuhual müten.

● Tati malüuquelu quisu duamuuquei, feimu cüdautuquei ñi tutehual tañi afcadi engu cudumuhun dungu meu.

Müna cümeafui tami quim ngüneniehual, femngechi tami malütuunoal (1 Tesalonicenses 4:4, 5). Fei, ¿chem quelluafeimu tami quim ngüneniehual? Biblia feipi famentufinge chem rume tami illutulqueteu cudumuhun dungu mu (Proverbios 5:8, 9). Huelu, ¿chumafuimi deu conülmi tüfachi huimtun mu? Pepi elcünuquelafimi chi. Raquiduamqueimi chi “Turpu femlayafun, ayühuel-layafiñ ta Chau Dios”. Femngechi raquiduamquefui quiñe hueche huentru Pedro pingelu. Fei feipi: “Rume huesa duamnagquefun huiño conlu tüfachi huesa huimtun. Perdonalayaeneu Chau Dios piquefun. Nehuencülelafun tañi llellipuafiel”

Ca femngechi duamcülelmi, afeluuquilnge. Fentren che deu elcünuingün tüfachi huesa huimtun. Fei eimi ca femafuimi.

¿Chumafuimi rume culpatuhulmi?

Tati pu che quisutu malüuquelu, culpatuuqueingün ca rume huesa duamcüleingün. Ca chumngechi feipi 2 Corintios 7:11, rume hueñancüqueingün. Tami huesa duamcülen quelluafeimu tami elcünual tüfachi huesa huimtun. Huelu rume huesa duamcülelmi, afeluhuafuimi (Proverbios 24:10).

Feimu, ¿chem raquiduamafuimi tüfachi huimtun mu? Tüfachi huimtun ünufalngei, ngünenieafeimu ca hueluraquiduamelafeimu (Tito 3:3). Huelu quiñe fütra huesa culpan no, ñihualuhun dungu reque (Judas 7). Feimu turpu raquiduamlayaimi tami perdonangenoal. Huelu pütrü fali tami quim ngüneniehual ca tami afeluunoal.

Huiño conülmi tüfachi huesa huimtun meu, afeluuquilnge. Feipilayaimi “Rume huesa chengen ta iñche”. Doi mai raquiduamafuimi chumngechi tami huiño connoal tüfachi huesa huimtun meu.

Raquiduamnge tunte tami piuqueyeteu Chau Dios. Tati cuifi huentru David ca huelulcahui. Inaduamafiyiñ tañi feipin: “Quiñe chau reque cutranpiuqueyefi tañi pu yall, ca femngechi Jehová cutranpiuqueyefi tañi yamqueteu. Quisu am cüme quimnielu chumngechi taiñ deumangen, ca acordaniei taiñ trufür mapungen” (Salmo 103:13, 14). Jehová quimniei taiñ culpan chengen, fei eluucülei taiñ perdonayaeteu (Salmo 86:5). Huelu cafei ayüniei com taiñ nehuen meu inanieal tañi feipin. Feula inaduamafiyiñ falinque ngülam tami elcünual tüfachi huesa huimtun.

Cüme dullinge chem dungu mu cüme rupaqueimi. Tami peel television meu ca internet meu, ¿illutulquepeimu mai cudumuhun dungu? Inaduamnge chem ñi llellipufiel quiñe salmista ta Chau Dios. Quisu feipifi: “Quiñepülecünuñmaen tañi lelin ñi penoal tami üdequeel, mongelnieen tami rüpü meu” (Salmo 119:37). *

Eluunge tami raquiduamal cümeque dungu mu. Inange ñi feipin quiñe cristiano William pingelu. Quisu feipi: “Petu tami umautunon, papeltufinge quiñeque dungu nüucülelu Biblia meu. Rume falin-ngei epe afchi antü meu raquiduamal Chau Dios mu ca Biblia mu” (Filipenses 4:8).

Quelluen piafimi ta caquelu che. Yehuelelmi rume, nütramcafinge ta cangelu che tami huesa huimtun. Fei tüfa quelluaimu tami elcünuafiel. Femngechi femi quiñe hueche David pingelu. Quisu feipi: “Eluhun ñi nütramcalelafiel tañi chau. Turpu ngoimanentulayafun tañi feipieteu. Tañi chau ngüneduami ñi fente cüdautun ñi nütramcalelafiel. Fei ayelen mu feipieneu ‘Ayüucülen tami femün meu’. Ñi feipieteu, rume yafültucueneu. Cüdaungefule rume, eluhun ñi cacünutuafiel tañi femün.

Tañi chau papeltuleneu quiñeque troquiñ Biblia tañi yafültucuaeteu. Huelu ca pengeleneu caquelu texto tañi adümal ñi huesacünun. Tañi chau iñchiu elcünuyu quiñe antü tayu huiño nütramcayal. Fei petu ñi puunon feichi antü, mülefun tañi malüunoal. ‘Huelulcahulmi, afeluulayaimi’ pieneu tañi chau, ‘doi mai eluhuaimi tami ngüneniehual doi antü meu’”. Fei, ¿chem quimtucui David? Quisu feipi: “Cangelu che ñi quimal tañi rupamequen, rume quelluqueneu”. *

¿CHEM INADUAMAIÑ CÜPALECHI CAPITULO MEU?

Cudumuuli cangelu che engu tañi cüme rupaleal müten, ¿cümepeafui mai?

[Pu quimngeal dungu]

FALIN TEXTO

“Feimeu famtripange llemai tati huechequeche ñi illutuqueelchi huesaque dungu meu, fei lif mongen nieaimi, mupiltun ca piuqueyehun ca cüme tüngün, com quiñentrür tüfei engün tati lif piuque meu maneluucülelu ta Ñidol meu” (2 Timoteo 2:22).

QUIÑE NGÜLAM

Petu tami rume illutunofiel pod dungu, llellipuafimi ta Chau Jehová. Feipiafimi tami eluaeteu fei tañi nehuen, femngechi femlayaimi pod dungu (2 Corintios 4:7).

¿QUIMIMI TÜFA?

Cüdaungelai illuturumeafiel cudumuhun dungu. Huelu quiñe quimche quim ngünenieuquei, quisulelu rume.

¡FEI TÜFA FEMAN!

¿Chem femafun ñi lifcüleal tañi raquiduam? ․․․․․

¿Chumafun tañi huiño connoal illuturumefili pod dungu? ․․․․․

¿Chem ramtuafun tañi chau cam tañi ñuque tüfachi dungu meu? ․․․․․

¿CHEM PIMI CAI?

● ¿Chumngelu falin-ngei tami loncontucuafiel Jehová ñi perdonachequen? (Salmo 86:5).

● Jehová adcünui cudumuhun dungu, huelu feipieiñmu taiñ quim ngüneniehual. Fei, ¿huercüpeafeiñmu taiñ femal quiñe dungu taiñ pepilnoafel?

[Adentun]

Sara feipi: “Deu elcünufiñ tüfachi huesa huimtun. Tüngcületui tañi raquiduam”.

[Adentun]

Tranülmi tami lefün meu, huiño huitrapurayafuimi, amuleafuimi. Ca femngechi huiño conülmi tüfachi huesa huimtun meu, raquiduamlayaimi ñi falin-ngenon tami femmequen. Amulecayaimi müten.