TATI lifru Apokalipsi mu, niey kiñeke feypin re adentun tati, femngechi feyngelay (Apokalipsi 1:1). Kiñe tüfa mu, nütramkakey kiñe küri domo wirintukunielu tañi tol mew tüfachi üy ‘Tati Fütra Babilonia’. Ka feypi, anüley wente “tati trokiñche kakerume dungun nielu ka ñi trokiñke mapu” (Apokalipsi 17:1, 5, 15). Chem domo no rume nielu che kuerpu femlayafuy tüfa, feymu lle Tati Fütra Babilonia kiñe adentun reke feley. Welu, ¿chem adentuley?

Apokalipsi 17:18 kimeltukey ‘ti fütra waria, ngüneniefilu ta itrokom Mapu mew müleyechi pu longko ülmen’. Tati dungun “waria” rakiduamelkeeiñmew kiñe adkülechi trokiñche. Kafey,  tüfachi ‘fütra waria ngüneniefi ta itrokom Mapu mew müleyechi pu longko ülmen’. Feymu llemay, Tati Fütra Babilonia, tüfa ta kiñe adkülechi trokiñche ngüneniefi epe kom chi Mapu. Tüfachi adkülechi trokiñche politiko ka negosiakelu feyngelay, welu religiosongey tati. Peaiñ kiñeke texto mülelu chi lifru Apokalipsi mu kelluaeiñmew taiñ kimürpual tüfa.

Kimürpuiñ Tati Fütra Babilonia kiñe adkülechi trokiñche politikongenon, Chaw Ngünechen ñi Dungu feypilu am: “Tüfachi mapu mew mülechi pu longko ülmen [adkülechi trokiñche politiko Mapu mu] ñiwalkawi engün ta tüfeychi domo mew”. Ñiwalkafilu tati pu longko ülmen Mapu mu, adentuley ñi kiñewkülen fey engün mew. Feymu lle ngüneduamkeiñ “wesa küri domo reke felelu” ñi üytungeken (Apokalipsi 17:1, 2; Santiaw 4:4).

Biblia feypi apümkangele tüfachi domo, weñangküleayngün ‘kom Mapu müleyechi pu negosiakelu’. Tüfa küme pengeli Tati Fütra Babilonia kiñe adkülechi trokiñche negosiakelu feyngelay tati. Kom texto Biblia mu, pengeli pu longko ülmen ka ti pu negosiakelu adkintuniefi tüfachi domo “alü kamapu” mu (Apokalipsi 18:3, 9, 10, 15-17). Fey llemay, chumngechi ngüneduampeiñ Tati Fütra Babilonia kiñe adkülechi trokiñche politiko ka negosiakelu feyngelay, welu may kiñe adkülechi trokiñche religiosongey tati.

Ka dungu pengelkelu kiñe adkülechi trokiñche religion-ngelu, feypingekey tüfa engün tañi “kalku dungu” mu ngünenkakefi ti trokiñke mapu (Apokalipsi 18:23). Fillke kalku dungu niey ñi tuwün ti koylake religion mu ka tati pu weküfü. Feymu may ta afmatukelaiñ Biblia ñi feypin Tati Fütra Babilonia ‘pu weküfü tañi mülewe ngetuy’ (Apokalipsi 18:2; Deuteronomio 18:10-12). Kafey ngüneduamkeiñ tüfachi adkülechi trokiñche rume kayñetukefi “tati pu pelon wentru” ka “tati pu koneltuleyelu Ngünechen tañi pu trokiñche mew” (Apokalipsi 18:24). Fey llemay, ti koyla religion fente ñi üdefiel tati rüfngechi religion, wedalkakefi ka langümyefi “Jesus ñi pu dunguñpekelu” (Apokalipsi 17:6, TNM). Feymu llemay, tüfachi domo Tati Fütra Babilonia üytungelu adentuley kom tati koylake religion Mapu mu mülelu chaftumekefilu Chaw Ngünechen Jewba.