Cuifi mu mülequefui ta sello, ¿chem am chi tüfa? Tüfa ta pichique chemcün ürque tallangelu, pünengequefui ñi marcacünual arcilla cam cera. Caquerumei tañi chumlen, quiñeque cuadraucülefui, caquelu cono requelefui ca quiñeque lonco cullin requelefui. Quiñe chemcün marcacünungequefui ñi pengelal inei tañi ngen-ngeal. Ca marcacünungequefui quiñeque huirin ñi falintungeal. Cafei puerta, carpa, rüngan lolo ca sellacünungequefui tañi nülangenoal.

 Tati sello caquerume chemcün mu deumangei, quiñeque foro mu, mamüll mu, pañillhue ca quiñeque cura mu. Quiñeque sello mu huiricünungequefui ñi üi ti ngen-ngelu ca tañi chau ca chem cüdau ñi niequefel ti ngen-ngelu.

 Entuhuirintuculelngeafui quiñe yafünochi chemcün, arcilla ngeafui cam cera. Fei ti ngen-ngelu marcacünuafui tañi sello mu, femngechi ñi falintungeal ti huirin ca ñi huesalcangenoal (Job 38:14). Pihulu hula ti arcilla cam cera, yafületui. Femngechi nülangelayafui ca huesalcangelayafui ti falin huirin.

 Quiñe che eluafui tañi sello cangelu che, femngechi ñi nieal ta autoridad feiti ngen sello ngelu reque. Quiñe rupa, ti faraon Egipto mapu mu elufi tañi anillo quiñe hueche hebreo tuhun-ngelu, José pingei, Jacob tañi fotüm. José esclavo ngequefui Egipto mapu mu ca presuntucungei tañi huesa femnofel rume. Huelu rupachi antü faraon lifrenentueyu ca elueyu quiñe falin cüdau. Biblia feipi: ‘Faraon nentui ñi cuhu meu ti anillo tati nielu ti sello oficial fei tuculelfi ta José’ (Génesis 41:42). Feichi anillo ñi elungeel ta José niefui faraon tañi sello, femngechi pengeli José faraon tañi elfalcünueteu.

 Quiñe domo Jezabel pingelu nentui tañi füta ñi sello, tati lonco ülmencülelu Israel meu. Jezabel ayüniefui ñi langümafiel ta Nabot, feimu huercülelfi carta ta quiñeque huentru ñi huitrameldunguafiel ta Nabot “malisiafi ta Ngünechen” pi tañi coilatun. Jezabel marcacünufi tati huercüelchi carta tañi füta ñi sello meu, femngechi ñi langümngeal ta Nabot (1 Reyes 21:5-14).

 Asuero, tati lonco ülmen Persia mapu mu, pünefi tañi sello, femngechi ñi pengelcünual ñi rüfngen tañi huercün dungu (Ester 3:10, 12).

 Biblia feipi Nehemías ñi antü meu pu levita, pu sacerdote ca falinque huentru Israel mapu mu hurintucuingün ñi feipicünuelchi dungu, fei marcacünufingün tañi sello meu, femngechi ñi pengelal ñi rüfngen ca ñi falintungeal ñi huirin (Nehemías 1:1; 9:38).

 Biblia feipi epu conhue marcacünungei sello meu. Quiñe feita Daniel ñi ütrüftucungen quiñe rüngan mu cheu ñi mülen pu trapial. Biblia feipi: “Fei cüpalngei quiñe cura ca tacungei ti rüngan. Fei ti lonco ülmen marcacünufi tañi anillo mu ca tati anillo ñi nieel pu falinque huentru, femngechi ñi femngeal ta Daniel chumngechi ñi feipicünuel ti lonco ülmen” (Daniel 6:17).

 Epungechi dungu, rüngalngelu Jesús, tañi pu caiñe “nürüfpufi engün tati rüngan lolo, fei tuculelfi engün quiñe sello taculechi cura meu” (Mateo 27:66). Feichi pu huentru pünepelaingün tati Roma gobierno ñi sello meu, femngechi femfule engün “marcacünupelaingün arcilla cam cera meu”, feipi quiñe huentru nütramyequelu Biblia ñi dungu. Ca feipi “rangiñ cura mu ca rüngan mu marcacünupelaingün”.

 Tati pu sello quimelelafeiñmu chem dungu ñi rupan cuifi. Feimu fentren pu cientifico ngüneduamfingün tati pu sello.