Tremümngen Montreal pingechi huaria. Üyeu tati pu che rume pofrelefui. Tañi chau ca tañi ñuque pura yall niei engu, iñche tati doi inan-ngelu. Cayu cüyen nielu iñche lai tañi chau ca tañi ñuque quisulelu tremümeiñmu.

Pichi huentrungelu iñche, hualloñmaeneu tati droga, tati quehuan dungu ca ti aucantun plata mu. Fill püle mülequefui huesaque che. Nielu mari tripantu müten quelluquefiñ pu cüri domo ca tati pu arelquefilu plata. Rume ayüquefun ngünencacheal, cüme duameleneu tüfa.

Mari meli tripantu nielu iñche, quim ngünencachequefun. Ngillaquefun frenten reloj ca llancatu milla reque felelu, fei huirintuculelfiñ 14 quilate. Fei ñi fendelelafiel pu che rüpü meu ca huecun püle fütraque negocio mu. Fentren plata hueuquefun.

Mari quechu tripantu nielu quechanentungen internado mu, feimu nielafun cheu tañi müleal. Umauquefun plaza mu, rüpü püle ca quiñeque hueni tañi ruca meu.

Epe presuntucungen tañi ngünencachefengen mu. Huelu iñche hueñequelafun, feimu carcelconcülelan. Tañi femquen mu entuñmangen multa. Chem no rume llicalcaquelafeneu, fei cüdahuelquefiñ quiñeque arelchequelu plata. Rume cuñihun-ngefui feichi cüdau, feimu yeniequefun arma ca cüdahuelquefiñ rume huesaque che.

Nielu mari regle tripantu allcün ñi feipin Biblia. Feichi mu tañi novia eluhui tañi chillcatual ta Biblia, huelu iñche ayülafun tañi inanieafiel Biblia tañi ngülam. Feimu elcünufiñ tañi novia ca trahuluhun ca domo engu.

Huelu tüfachi domo ca eluhui ñi chillcatual ta Biblia, fei cüme elcünutui tañi mongen. Iñche afmatulehuen, doi cüme chengetui. Quiñe antü mangelngen ñi amual quiñe trahun mu, fei amun. Pefiñ cümeque che, cüme piuquengeingün, com engün cüme llohueneu. ¡Rume cüme duamcülefun! Tañi familia duamtuquelaeneu iñche ca piuqueyelaeneu rume, huelu pu Dunguquelu Ineingen Jehová rume piuqueyeneu. Tüfa tañi duamnieel iñche, feimu feipingelu tañi chillcatual ta Biblia, mai pin.

Feichi mu iñche defequefun fentren plata tañi aucantun mu, feimu tañi nieal plata trahuluhun caquelu hueñefe engün. Huelu Biblia ñi ngülam quellueneu tañi hueñenoal, fei ta montuleneu. ¿Chumngelu? ¿Chemu? Feichi antü quiñe tati pu hueñefe langümngei, cangelu presuntucungei.

Biblia pengeleneu duamfalngefui femal caquelu dungu ñi cüme elcünutual tañi mongen. Papeltulu 1 Corintios 6:10 ngümacahun, tüfa mu feipi: “Pu hueñefe, pu diñmatufengelu, pu ngollife, pu huesa pimequelu ca pu ngünencachequelu conlayaingün Chau Ngünechen ngünenietule ta mapu”. Quimtucun duamfalngefun ñi cüme elcünutual tañi mongen (Romanos 12:2). Iñche rume quehuachefengefun ca re coilaque dungu mu adniequefun tañi mongen.

Cafei quimürpun Jehová cüme piuquengei ca perdonachequei (Isaías 1:18). Fei com tañi piuque mu llellipufiñ ta Chau Dios, “quelluen ñi elcünual tañi huesaque huimtun ca ñi cüme elcünutual tañi mongen” pifiñ. Fei ñochiquechi quellueneu ñi doi cüme chengetual. Quiñe falin dungu tañi femün, niehuiyu tañi novia iñchiu.

Feichi mu deu nierquefun cüla yall, huelu iñche 24 tripantu müten niefun. Duamniefun quiñe cüdau tañi cuidayafiel engün, huelu epe amulan escuela mu ca cüdaulafun rume. Ca huiño “quelluen” pifiñ ta Jehová, fei eluhun ñi quintumeal cüdau. “Duamnien cüdau, ayülen tañi cüme elcünutual tañi mongen” piquefun tati pu ngen cüdau. Quiñeque mu feipiquefun engün tañi chillcatumequen Biblia tañi doi cüme chengeal, huelu elungequelafun cüdau. Quiñe antü nütramcalelfiñ tañi rupan quiñe huentru, fei feipieneu: “Cüpa elueyu cüdau, huelu quimlan chumngelu”. “¡Jehová ta quellueneu!” piquefun. Rupalechi antü, tañi domo iñchiu Dunguquelu Ineingen Jehová ngerpuyu.

Tañi inaniefiel ta Cristo ca ñi inaniefiel Biblia ñi ngülam montuleneu tañi mongen. Rume ayüfiñ tañi familia ca cüme quimnien Jehová tañi perdonaeteu ta iñche, feimu cüme raquiduam nien.

Yenien mari meli tripantu tañi precursorngen. Fill antü quelluquefiñ ta caquelu che ñi quimafiel Biblia. Feula tañi domo ca femquei tüfachi falin cüdau. Cafei ti rupachi cüla mari tripantu mu, quelluquefiñ 22 chaf cüdau tañi poyeafiel Jehová engün. Petu amuquen fütraque negocio mu, huelu ngünencachehuelan chumngechi ñi femquefel cuifi. Feula eluquefiñ engün tati doi falin dungu tañi llohuafel, tüfa tati maneluhun ñi cüme feletual ti Mapu, ngehuelayai hueñefe (Salmo 37:10, 11).