Deu ngüneduamiyiñ, mülepalu Jesús mapu mu rume cüdahui ñi amuldungual Chau Ngünechen ñi ngünenietual mapu (Lucas 8:1). Huall püle trecayahui Israel mapu mu ñi quimeltucheal. Cafei Biblia mu ti meli lifru nütramcalu Jesús ñi mongen ca tañi amuldungun, doi pataca rupa huirintuculei Chau Ngünechen ñi ngünenietual mapu, epe com tüfa Jesús ñi feipin llemai. Rüfcünu mai, doi fentren rupa nütramcai Chau Dios ñi ngünenietual mapu (Juan 21:25).

Jesús, ¿chumngelu rume falintufi Chau Dios ñi Gobierno? Elcünungelu cai ñi lonco ülmencüleal (Isaías 9:6; Lucas 22:28-30). Huelu amuldungulai Chau Dios ñi Gobierno quisu tañi saquingeal müten (Mateo 11:29; Marcos 10:17, 18). Doi mai rume piuqueyeniefi tañi Chau ca tañi pu inanieteu, fei quimniei ñi cümelcangeal engün ngünenietule Chau Ngünechen.⁠ *

Jesús piuqueyefi tañi Chau com piuque meu (Proverbios 8:30; Juan 14:31). Afmatulqueyu tañi chumngen, tañi piuqueyechefengen, tañi cutranpiuqueyechen, ca tañi femquen nor dungu (Deuteronomio 32:4; Isaías 49:15; 1 Juan 4:8). Feimu lladcüquei ñi huesa dunguyengen tañi Chau. Tati pu che feipiquei Chau Dios duamcülelai tati pu che ñi cutrancahun mu, sufrilchequei pingequei cütu. Feimu llemai Jesús rume nehuentui ñi amuldungual Chau Ngünechen ñi ngünenietual mapu. Femngechi yamniengetuai Chau Dios ñi üi, ¿chumngechi cai? (Mateo 4:23; 6:9, 10).

Fütra cüme elcünutuai ti dungu mapu meu. Ngünenietule Chau Jehová liftuñmayafi com pu che ñi cülleñu, ngehuelayai chem no rume taiñ hueñancülqueteu, “ngehuelayai ta lan, ngüman no rume, eyütun no rume, cutrantun no rume” (Apocalipsis 21:3, 4) Ngünenietule Chau Dios cutrancahuelayai pu che.⁠ *

Feimu llemai Jesús fente cüpa amuldungui Chau Ngünechen ñi Gobierno. Chau Ngünechen ngünenietule mapu quimfalcünuai ñi cutranpiuqueyechen ca tañi nehuen-ngen (Santiago 5:11). Huelu fei ca müten no, ca cümelcayafi Jesús tañi pu inanieteu.

Jesús petu ñi cüpanon mapu mu, fentreñma mülerquefui huenu mu tañi Chau engu. Quellufi ñi deumayal itrocom, ti huangülen ca com ñi mülen fütra huenu mu, tati mapu ca itrofill mongen (Colosenses 1:15, 16). Huelu com tati deumangelu, Jesús rume piuqueyefi tati pu che (Proverbios 8:31).

Fei tüfa yafültucueyu ñi amuldungual. Ellaca mu müten feipi ñi cüpan mapu mu ñi amuldungulelafiel Chau Dios ñi cümeque dungu tati pu duamnielu (Lucas 4:18). Huelu Jesús re dungulai müten. Quiñe rupa trahuluulu fentren che ñi allcütuaeteu, Jesús “cutranpiuqueyefi, fei tremolyefi tati pu cutran” (Mateo 14:14) Ca rupa quiñe huentru feipieyu: “Pifulmi cai, tremoltuafen tañi cutran meu”. Fei cutranpiuqueyefi, piuqueyen mu feipifi: “Ayülen tati. Tremotunge”. Fei tremoltufi (Lucas 5:12, 13). Cafei ñi pefiel ta María ñi ngümamequen ñi lan tañi lamngen Lázaro, Jesús “rume fütra cutrantupiuquei”, “hueñancünagi”, fei “ngümai” (Juan 11:32-36) Fei quiñe afmatun dungu femi. Meli antü yenierquei ñi lan ta Lázaro, huelu Jesús huiñomongeltufi (Juan 11:38-44).

Jesús quimniefui ñi huiño cutrantual feichi pu che tremoltufilu, ca ñi huiño layal feichi pu che huiñomongeltufilu. Huelu ca quimniefui ñi turpu ngehuenoal huesaque dungu ngünenietule Chau Ngünechen. Feimu re afmatun dungu müten femlai, doi mai nehuentui ñi amuldungual Chau Ngünechen ñi ngünenietual mapu (Mateo 9:35). Ti afmatun dungu ñi femün Jesús pengeli chem ñi femal cüpalechi antü com mapu meu. Biblia pengeli chem ñi rupayal.

• Ngehuelayai cutran

  “Feichi antü meu pu trauma tañi nge pelotuai, tati pu pilungelu allcütuai engün. Feichi antü meu tati cüntrongelu huemul reque rincüyautuai, ca tati quetro huirarpüramai ñi ayühun mu”. Cafei “inei no rume feipilayai: ‘Iñche cutrancülen’” (Isaías 33:24; 35:5, 6).

• Ngehuelayai lan

  “Tati pu norngechi che llohuai ti Mapu ñi ngen-ngeal engün, ca rumel müleaingün fei mu” (Salmo 37:29).

  “Ñidol Ngünechen Jehová lümüafi tati lan dungu, ca liftuñmayafi engün tañi cülleñu ñi ange meu” (Isaías 25:8).

• Huiñomongetuai tati pu layelu

  “Itrocom tati pu layelu allcüai ta quisu ñi dungun, fei tripapatuai engün” (Juan 5:28, 29).

  “Tati pu layelu tañi huiñomongetual engün” (Hechos 24:15).

• Com pu che nieai ruca ca cüdau

  “Deumarucayaingün, ca fei mu müleaingün, anümaingün ofad ca iñmuaingün ñi fün. Deumarucalayaingün ca che ñi müleam, ca anümlayaingün caquelu ñi iñmual. [...] Tañi dullinche ayühuaingün ñi deumael quisu ñi cuhu mu” (Isaías 65:21, 22).

• Ngehuelayai hueichan

  Chau Dios “apümcaniefi ti hueichan itrocom Mapu mu” (Salmo 46:9).

  “Quiñe troquiñ mapu huitrañpüramlayai tañi fütra cuchillo cangelu troquiñ mapu engu, ca quimhuelayaingün hueichan” (Isaías 2:4).

• Itrocom che nieai iyael

  “Tati Mapu hulai ñi fün; Ngünechen, taiñ Chau Ngünechen, cümelcayaiñmu” (Salmo 67:6).

  “Fentren iyael müleai tüfachi Mapu meu; huente huincul cütu huefpayai ti fün” (Salmo 72:16).

• Pofrehuelayai che

  “Pu pofre ngoimanentungelayai” (Salmo 9:18).

  “Quisu montulafilu cai tati fillalelu llellipumequelu ñi quellungeal, cafei tati cuñifallcülelu ca inei rume nienolu tañi quelluaeteu. Cutranpiuqueyeafi tati pu pofre, fei montulafi engün” (Salmo 72:12, 13).

Taiñ ngüneduamfiel com tüfachi dungu, quimtucuiñ chumngelu Jesús fente falintufi Chau Ngünechen ñi ngünenietual mapu. Fei amuldungulelfi com pu che eluulu tañi allcütueteu. Cüme quimniefui ngünenietule Chau Dios, fei müten afai huesaque dungu.

¿Ayüfimi chem ñi feipicünuel Chau Dios? Fei, ¿chumngechi doi quimafuimi tañi Gobierno mu? ¿Chumafuimi tami llohual com tüfachi dungu? Cüpalechi troquiñ mu ngüneduamaiñ.