Kiñe pichi malen ngüneduami ñi tripameken fitrun kiñe fabrika ñi trolol senchu mu, fey kiñe tromü reke künuwi. Feymu tati fabrika ñi dewmakeel tromü trokifi. Kiñe ayekan dungu trokikefiyiñ femngechi welurakiduamlu kiñe pichiche. Welu fütrake dungu mew welurakiduamliyiñ, tüfa wedalkayafeiñmu taiñ mongen. Kiñe pengelün: welupapeltulmi ñi feypingeel kiñe lawen mew, kiñe kutran kontuafeymu.

Kafey welurakiduamliyiñ Chaw Ngünechen ñi dungu mew, tüfa doy wedalkayafeiñmu. Kiñeke che welurakiduamingün Jesus tañi kimeltun mu (Juan 6:48-68). Eluwlayngün ñi doy kimeltuaetew Jesus, famentukefingün kom ñi feypiel. ¡Müna weda!

¿Papeltukefimi ti Biblia tami ngüyulaetew? Müna kümey. ¿Kuñiwün-ngey tami welurakiduamken tami papeltun mu? Fentren che femngechi femkey. Feymu ngüneduamaiñ küla dungu ñi welurakiduamken fentren che.

• Fentren che welurakiduamkey Biblia ñi werküel mu taiñ ‘ekunieafiel tati rüfngechi Ngünechen’, tüfa wingkadungun mu feypilelu am kiñe dungu ñi rakiduamelkefiel tati pu che tañi llükanieafiel ta Chaw Ngünechen (Eclesiastés 12:13). Welu kidu ayükelay taiñ poyeafiel llükalen mu. Feymu feypi: “Llükakilnge, iñche am eymi mu mülen. Fill rakiduamkülekilnge, iñche am eymi tami Ngünechen. Iñche ta yafülaeyu, may, iñche ta kelluaeyu” (Isaías 41:10). Feley llemay, Chaw Ngünechen ayükelay taiñ llükanieafiel, welu may taiñ ekunieafiel ka yamnieafiel.

• Kafey kiñeke che welurakiduamkey tüfachi dungu mu küpalu Chaw Ngünechen mu: “Müley kiñe medin antü ñi femngeal itrokom dungu, [...] kiñe antü ñi choyüngeal, ka kiñe antü ñi layal”. Rakiduamkeyngün Chaw Ngünechen ñi elkünuel kiñe antü taiñ layal (Eclesiastés 3:1, 2). Welu tüfachi versikulo nütramkakey chem ñi rupaken ta mongen mu, ka ngüneduamkey kom tati pu che ñi laken. Tati Biblia ka feypiley, taiñ dulliel mu doy mongeleafuiñ. Feymu feypiley: “Ekuniefilmi ta Jewba, alüntuay tami mongen” (Proverbios 10:27; Salmo 90:10; Isaías 55:3). ¿Chumngechi? Kiñe dungu, yamniefiliyiñ ti Biblia, fey wedake dungu femlayaiñ, ngollikalayaiñ, ka yenieaiñ lif mongen (1 Korintio 6:9, 10).

• Kafey Biblia feypilu tati wenu mapu ka ti nag mapu “elniengey tañi apümngetuael kütral mew”, fentren che rakiduamkey Chaw Ngünechen ñi apümafiel tüfachi Mapu (2 Pedro 3:7). Welu Chaw Ngünechen feypikünuy ñi eluñmanoal tañi apümngeal ti Mapu. “Kidu tukukünufi chi Mapu chew ñi newentuwkülemum, turpu nengümngelayay tañi mülekemum” (Salmo 104:5; Isaías 45:18). Aflayay ti Mapu, welu may tañi wedake müleyechi dungu apümkangeay turpu ñi mületunoal, lüpümngelu reke kütral mu. Kafey feypilelu wenu mapu, trokifalngeafuy ñi dunguel ti kallfü wenu mu, ti fütra wenu ñi mülen pu wangülen, kam chew ñi mülen ta Chaw Ngünechen. Welu tüfa apümkangelayay.

Tüfachi dungu mu taiñ ngüneduampeel, inaduamafuymi fentren che ñi welurakiduamken fillke versikulo mu ñi papeltuel engün. Welu Chaw Ngünechen, ¿chumngelu eluñmakey tüfa? Kiñeke che feypiafuy: “Kom kimnielu am ta Chaw Ngünechen, fey eluafeiñmu kiñe lifru küme kimfalngelu, femngechi kom pu che ñi pürüm adümnieafiel. ¿Chumngelu femngechi femlay?”, piafuyngün. Ngüneduamnge küla dungu taiñ kimal chumngelu pu che welurakiduamkey Biblia ñi feypiel mu.

1. Tati pu ñomngelu ka tati pu eluwkülelu ñi kimeltungeal, tüfa engün müten adümafuyngün ti Biblia. Jesus feypifi tañi Chaw: “Iñche ta püramyeeyu, Chaw, Ñidolkülelu ta wenu  mapu mew ka nag mapu mew. Eymi ta kimelelfimi tati pu ñom piwkengelu, welu elulafimi ñi kimael tüfachi dungu tati pu fütrake kim wentru” (Luka 10:21). Tati Biblia wirintukungey ñi adümafiel tati pu küme rakiduamnielu müten. Feymu tati pu mallmangelu, “pu fütrake kim wentru” reke, welurakiduamkeyngün Biblia ñi feypiel mu. Welu tati “pu ñom piwkengelu” ñi papeltukefiel ti Biblia ka eluwkülelu ñi kimeltungeal kiñe pichiche reke, tüfa engün elungeyngün ñi doy küme adümnieafiel Chaw Ngünechen ñi dungu. ¡Pütrü müna kimi taiñ Chaw Ngünechen chumngechi ñi dewmafiel ti Biblia!

2. Tati Biblia wirintukungey ñi papeltuafiel tati pu che küme piwke mu duamnielu Chaw Ngünechen ñi kellun tañi adümnieafiel. Jesus pengeli tati pu che ñi duamtunieel kellu ta adümnieafiel tañi kimeltun. ¿Chumngechi kellungeafuy engün? Jesus feypi: ‘Chaw Ngünechen ñi newen, tamün adnieaetew, ta Chaw ñi werküael ta iñche ñi üy mew, fey ta kimeltuaeymünmew kom ti dungu’ (Juan 14:26). Chaw Ngünechen wülkey tañi newen ñi kelluafiel tati pu che ñi adümafiel tati Biblia. Welu elukelafi ñi newen tati pu maneluwkenolu kidu mew ñi kellungeal, feymu pepi adümlafingün ti Biblia. Kafey Chaw Ngünechen ñi newen mu, ngüyulkefi kiñeke tañi pu che doy adümuwkelu Biblia mu, ñi kelluafiel tati pu doy küpa kimlu (Hecho 8:26-35).

3. Tañi medin antü mew müten, kiñeke versikulo Biblia mu adümngeafuy. Kiñe dungu, ti pelon wentru Daniel feypingey ñi wirintukual chem ñi rupayal küpalechi antü mu. Kiñe küme püllü feypieyew: “Daniel, ellkakünufinge ti dungu, ka rakümkünufinge ti lifru, akule wüla ñi afael ta antü”. Fentren pataka tripantu mu, alün che papeltuy Daniel ñi lifru, welu pepi adümlafingün. Daniel kütu adümlafi kiñeke dungu kidu ñi wirintukuel. Feymu ñom piwke mew feypi: “Allkün, welu pepi adümlafiñ”. Rupalu chi antü mu tati pu che adümafuyngün Ngünechen ñi pelon dungu ñi wirintukuel Daniel, welu Chaw Ngünechen ñi elkünuelchi medin antü mew müten. Ti küme püllü feypi: “Amunge Daniel, tüfachi dungu am ellkakünungealu ka rakümkünungeay akule wüla ñi afael ta antü”. Fey, ¿iney adümafuy Ngünechen ñi werkün dungu? “Kiñe weda che no rume adümlayafi, welu tati pu kim ngüneduamlu müten adümafingün” (Daniel 12:4, 8-10). Feymu Chaw Ngünechen pengeli chem pifel kiñeke trokiñ Biblia mu, puwlu müten ñi medin antü.

Rupachi antü mu, pu Dungukelu Iney Ngen Jewba, ¿welurakiduamingün Biblia ñi feypiel mu? May. Welu puwlu Chaw Ngünechen ñi medin antü ñi kimfalngeal ti dungu, fey Jewba ñi pu che küme elkünufemtuyngün ñi rakiduam. Femngechi inayentukefingün Jesus tañi pu apostol, tüfa engün ñom piwke mu küme elkünutuyngün ñi rakiduam Jesus ñi norümfiel mu (Hecho 1:6, 7).

Newe falin-ngelay welulkawlu ti pichi malen ñi rakiduam mu chew tripakelu tati tromü. Welu Biblia ñi kimeltukeel, feyke ta falin-ngey eymi mu. Fente ñi falin-ngen Biblia ñi werkün dungu, iney no rume adümlayafuy kidutu ñi chillkatukefiel mu. Feymu kintunge tami kellungeal, femngechi tami adümnieafiel. Elunge tami kelluaetew feychi che chillkatukelu ti Biblia ñom piwke mu, maneluwkülelu Ngünechen tañi newen mu tañi kelluaetew, ka küme rakiduamkelu taiñ mülen falin-ngechi antü mu Chaw Ngünechen ñi ayüel taiñ adümnieafiel ti Biblia. Feymu eluwnge tami nütramkayafiel pu Dungukelu Iney Ngen Jewba, kam tami papeltual kidu engün ñi ngüneduamnieelchi dungu internet jw.org mu. Tati Biblia feypikünueiñmew: “Rakiduamyefinge tüfachi dungu tañi feypipeel, fey Ñidol eluaeymew itrokom küme kimün tami fente küme adümafiel tañi feypipeelchi dungu” (2 Timotew 2:7, Proverbios 2:3-5).