4 | Biblia hulquei cümeque ngülam
BIBLIA FEIPI: ‘Chau Ngünechen ñi huirintucun cümei’ (2 TIMOTEO 3:16).
¿Chem quimeltueiñmu?
Tati Biblia quiñe medicina lifru no, huelu eluquefi cümeque ngülam tañi quelluafiel pu che cutrancülelu ñi raquiduam. Peaiñ quiñeque ngülam.
¿Chumngechi quelluafeiñmu?
“Pu tremolelu duamlai lahuentuchefe, huelu pu cutrancülelu duamniei llemai” (MATEO 9:12).
Biblia feipi quiñeque mu duamfalngei amual quiñe doctor mu taiñ quelluaeteu. Fentren che cutrancülelu ñi raquiduam quellueyu amual doctor mu ca cüme quimal ca inaduamal chem cutran tañi nieel.
“Cümelcaquei ti che pepicauquelu ñi nehuentucual tañi cuerpo” (1 TIMOTEO 4:8).
Femal quiñeque dungu tami nehuentucual tami cuerpo quelluafeimu ñi cümelcaleal tami raquiduam. Por ejemplo, rumel femmequeal fillque deporte, iñmual cümeque iyael ca cüme umautual.
“Quiñe ayüucülechi piuque cüme lahuen reque trüri, huelu ti huesa duamcülechi piuque ngañhuadelmaqueyu ñi nehuen” (PROVERBIOS 17:22).
Cutrancülele tami raquiduam, ¿chem quelluafeimu tami ayüucületual? Papeltual quiñeque troquiñ Biblia tami yafültucuqueteu ca feipicünual quiñeque dungu tami diturpuafel. Ca raquiduamtucuaimi cümeque dungu tami mongen mu ca maneluucüleaimi ñi cümelcaletual ti dungu.
“Tati pu ñom chengelu niequeingün quimün” (PROVERBIOS 11:2).
Quisu pepi femlayafuimi chi com tami ayünieel, feimu eluucüleaimi tami quellungeal. Tami pu familia ca tami pu hueni cüpa quellunieimu, huelu quimlaingün chi chumngechi tañi femal. Feipifinge chumngechi tami quelluaeteu, huelu raquiduamquilnge tañi femal engün com tami duamnieel. Ca rumel mañumniefinge com tati quellu tami elungequeel.
Biblia ñi cümeque ngülam quelluquefi pu cutrancaucülelu
Nicole, a nielu trastorno bipolar cutran feipi: “Inaduamuuquen ñi cümelcalenon ta iñche, feimu amun quiñe doctor mu. Quisu feipieneu chem cutran tañi nien. Feita quimeleneu chumlen tañi cutran ca quellueneu tañi quimal chem tratamiento llohual tañi doi cümelcaletual”.
Pedro, depresion cutran nielu feipi: “Fill antü papeltufiel Biblia tañi domo iñchiu, fei quelluqueneu cümeque raquiduam nietual. Quiñeque antü mu doi huesalcaletui ñi cutran, fei yafültucuqueneu quiñeque troquiñ Biblia”.
Gina, quiñe trastorno alimenticio nielu feipi: “Rume yehuequefun ñi feipilelafiel caquelu che chem cutran tañi nien. Huelu quiñe cüme hueni allcütueneu, fei eluhui ñi quimaeteu chum rupalen iñche. Tañi hueni quellueneu tañi doi cümelcaletual ca quimün tañi quisulenon”.
Timoteo, nielu quiñe trastorno obsesivo compulsivo cutran feipi: “Tati Biblia quellueneu tañi norümnietual ñi raquiduam, tañi cüme ürcütual ca rume cüdaunoal. Biblia ñi cümeque ngülam quellueneu tañi fente fanetunoafiel tañi huesaque rupan”.
a Tüfachi troquiñ mu, ca üi tuculelngei ta quiñeque che.
