Rüfngei llemai ñi feipin tati Biblia
Fütra cuifi ca fantepu mu, manelfalngelu troquingequei chem pin tati Biblia. Ca fentren che inaniequei ñi ngülam. Huelu ca mülei che feyentuquenolu Biblia mu, quisu engün feipiquei: “Falilai ñi ngülam”, “re epeu müten niei” ca “huinca ñi lifru tati” piqueingün. ¿Chem pimi cai? ¿Rüfngepei mai chem pin tati Biblia?
¿CHUMNGELU MANELUHUAFUIMI BIBLIA ÑI FEIPIN MU?
¿Chem quelluaimu tami quimal ñi rüfngepen mai chem pin tati Biblia? Raquiduamnge tüfa: quiñe hueni afquentu rüf dunguqueimu, turpu coilatulquelaeimu, fei manelfal chengelu troquiquefimi. Ca femngechi, tati Biblia afquentu quimeltuquei ti rüf dungu, ¿chumngechi quimafuimi tüfa? Ngüneduamnge quiñeque dungu.
Pu huirintucufe rüf dunguingün
Pu huirintuculu Biblia com huirintucuingün, quisuque tañi huelulcan cütu. Quiñe tüfa tati profeta Jonás. Quisu huirintucui ñi inanofiel chem ñi feipieteu tañi femal Chau Dios (Jonás 1:1-3). Cafei, aflu tañi huirintucun, pengeli chumngechi tañi norümeteu Chau Dios. Huelu tañi saquingenoal peno, huirintuculai chumngechi cüme elcünutui tañi raquiduam (Jonás 4:1, 4, 10, 11). Jonás reque, com tati pu huirintuculu Biblia ca rüf dunguingün.
Niei cümeque ngülam
Cafei Biblia ñi ngülam quelluafeiñmu taiñ cüme feleal. Quiñe dungu, Biblia hulquei cümeque ngülam taiñ cüme yeucüleal caquelu che iñchiñ. Ngüneduamnge ñi feipin Mateo 7:12: “Feimu llemai, chumngechi ayüqueimün tamün femngeal, ca femngechi femafimün ta caquelu che”. Cafei Proverbios 15:1 feipi: “Tati huiñoldungulu tüngcülen mu, quiñepülecünuquei ti illcun, huelu tati nehuentu dungulu illcuduamelchequei”. Cümeque ngülam, ¿felelai am chi? Cuifi huirintucungelu rume, fantepu mu ca quelluqueiñmu.
Rüfngechi cuifique nütram
Biblia mu tripai fillque nütram ca üitungequei fillque troquiñche ca fillque lof. Fei pu che ngüneduamquefilu cuifique dungu, arqueologo pingelu, fentren dungu peingün pengel-lu ñi rüfngen ñi feipiel tati Biblia. Quiñe dungu, 2.500 tripantu cuifi mu mülequefui quiñe huentru, Nehemías pingelu, tüfa huirintucui quiñe troquiñ Biblia. Quisu nütramcai quiñeque che Tiro pingechi mapu mu tuulu mülerquefui Jerusalén huaria mu (Israel mapu mu). Ca feipi ñi cüpalquefel engün challhua ca fillque fillem ñi negociayal üyeu (Nehemías 13:16).
¿Chem dungu ñi peel pu arqueologo pengeli ñi rüfngen ta tüfa? Jerusalén huaria mu, pu arqueologo rüngafingün chi mapu, fei peingün pichiquen mülehuechi challhua, tüfa cüpalngepelai Tiro pingechi mapu mu. Cafei, Israel mapu mu, pu arqueologo peingün fillque fillem Tiro mapu mu tuulu. Tüfa pengeli pu Tiro tuuchi che ca pu Israel che engu cüme yeuquei ñi negociayal engu. Quiñe quimche ngüneduami tüfa, ca feipi: “Rume feyentufali ñi feipin Nehemías 13:16 tati pu Tiro tuuchi che fendequeingün challhua Jerusalén mu”.
Rüfngei ñi feipin ciencia dungu mu
Tati Biblia doi nütramcaquei Chau Dios ñi ngülam ca cuifique nütram mu. Huelu nütramcalu ciencia dungu mu ca rüfngei tañi feipin. Peaiñ quiñe dungu.
3.500 tripantu cuifi mu, Biblia feipi tati mapu chem meu no rume recüluucülequelai (Job 26:7). Huelu feichi mu, ¿chem feyentungequefui? “Quenaiquiyahui chi mapu huente co mu” piquefui cuifique che. Cafei “quiñe fütra tortuga meñcuniefi chi mapu” piquefuingün. 1.100 tripantu rupalu ñi huirintucungeel Job pingechi lifru, pu che petu feyentuquefui ti mapu ñi recüluucüleafel chem mu rume. Huelu feichi 1687 tripantu mu, quiñe huentru adümuulu ciencia dungu, Isaac Newton pingefui, cüme quimfalcünui tati mapu chem meu no rume recüluucülequelai. Ñi quimfalcünuel tüfachi huentru... ¡Biblia deu feipicünui 3.000 tripantu cuifi meu!
Feipicünulu quiñe dungu, femtripaquei
¿Ca manelfalngepei ñi feipicünungeel Biblia mu? Femi llemai. Ngüneduamaiñ quiñe: Chau Dios ñi duam mu, ti profeta Isaías feipicünui ñi apümcangeal Babilonia.
¿Chem feipicünungei? 2.800 tripantu püle cuifi, Isaías feipicünui Babilonia pingechi fütra huaria nüngerpuafui, fei ñi apümcangeal ca ñi mülehuenoal che üye mu. Huelu feichi mu, Babilonia quiñe fütra huaria ngerquelafui (Isaías 13:17-20). Isaías ca feipi quiñe huentru, Ciro pingelu, nüafi ta Babilonia. Tüfachi huaria niefui fütraque puerta, ca hualloñmaniequefeyu quiñe leufü, femngechi ñi contunoaeteu pu caiñe. Huelu Isaías feipicünui ñi arcüal ti leufü ca ñi nülacünungeal ti fütraque puerta (Isaías 44:27–45:1).
¿Chum femtripai? Epu pataca tripantulu Isaías ñi feipicünuel, Babilonia huaria quehuatupaeyu Persia ñi lonco ülmen. ¿Inei pingei tüfachi huentru? Ciro llemai. ¿Chumi ñi nüafiel chi huaria? Quisu ngüneduami ñi cüdaungeafel conpual Babilonia mu, nielu cai fütraque cura malal. Huelu ti huaria hualloñmaniequefeyu Éufrates pingechi leufü, feimu Ciro ñi pu hueichafe cañpüle hutrul amulfi ti leufü ñi arcümafiel. Fei naglu ti co, pu hueichafe rumeingün ti leufü mu. Huelu, ¿chumngechi conpuafuingün ti huaria mu? Feichi pun pu Babilonia che fiestaingün, fei nülacünungerquei ti puerta. Fei pu hueichafe femconpuingün müten Babilonia meu ca nüfingün.
Isaías ca feipi ñi mülehuerpunoal che üye mu, ¿femtripapei mai tüfa? Fentren tripantu mu mülerquefui che Babilonia mu, huelu fantepu mu ngehuetulai. Cheu ñi mülequemum Babilonia, feula fülcülei quiñe huaria, Bagdad pingelu (Irak mapu mu). Üyeu chem che no rume mülehuetulai, huelliletui chi huaria. Felei llemai, tüfachi nütram pengeli tati Biblia feipicünulu quiñe dungu manelfali llemai.
