¿Quimquefuimi tüfa?
Pu Roma che langümfilu quiñe che orcon mamüll mu, chumngechi ñi femngen ta Jesús, ¿eluquepefi mai ñi rüngalngeal?
EPE COM che quimniefui Jesús ñi clafantucungen orcon mamüll mu, quisu ca epu hueñefe (Mat. 27:35-38). Biblia feipi deu lalu ta Jesús pepicangei ñi cuerpo ñi rüngaltucungeal ca elcünungei quiñe lolo mu (Mar. 15:42-46). Huelu quiñeque che feyentuquelai tüfachi dungu.
Quiñeque che feipiquei pu Roma che eluquelafi ñi rüngalngeal pu hueñefe. Quiñe periodista, Ariel Sabar pingelu, feipi chumngelu quiñeque che femngechi raquiduamquei. Feipi: “Cuifi mu, tati doi huesaque che clafantucungequefui cruz mu. Quiñeque che feipiquei pu Roma che turpu elulayafui femngechi che ñi rüngalngeal” pi tüfachi huentru. Pu Roma che illamcaquefui tati pu hueñefe. Deu lalu feitachi hueñefe, elcünungei ñi cuerpo orcon mamüll mu fei ñi iyaeteu pu auca culliñ. Deu iyeteu mu tati pu culliñ, ütrüftucungequefui quiñe lolo mu cheu ñi mülemum caquelu pu la (ñi feipiel ti revista Smithsonian).
Huelu femngechi dungu femngequelafui quiñeque judio, langümngefulu rume orcon mamüll mu. 1968 tripantu mu, peñmangei quiñe huentru ñi foro cheu ñi rüngalngepeyüm pu judio. Tüfa mülei inafül Jerusalén mu. Tüfachi huentru langümngefui hunen siglo mu. Feitachi foro mu pengei quiñe foro rüngcoi namun mu tripalu. Feichi foro clafaconcülefui quiñe pichi mamüll mu, niefui quiñe clafo 11,5 cm de largo. Ti periodista Ariel Sabar ca feipi: “Feitachi rüngcoi namun Jehohanán tañi foro ürquefel. Feitachi rüngcoi namun pengeli rüfngei Jesús ñi rüngaltucungen quiñe lolo mu, chumngechi ñi feipin tati Evangelio. Jehohanán ñi rüngcoi namun pengelquei langümngelu quiñe huentru cruz mu, pu Roma che catrütuquelafui ñi rüngalngeal chumngechi ñi femquefel pu judio”.
Pengelu feitachi rüngcoi namun caquerumequei ñi feipin ta che chumngechi ñi pültrülequefel ta Jesús. Huelu rüfngei llemai, quiñeque hueñefe langümngelu orcon mamüll mu chuchi mu rume ütrüftucungequelafuingün, huelu mai rüngalngequefui. Rüfngei ñi feipin ta Biblia. Lalu ta Jesús, tañi cuerpo tucungei quiñe rüngan mu.
Doi mai, Jehová feipicünufui Jesús ñi rüngalngeal quiñe ricu huentru ñi rüngan mu. Femngechi tripai. Inei no rume catrütulayafui Chau Jehová ñi feipin (Is. 53:9; 55:11).
