Rupalu quiñe tripantu, Betel mu feipingeiñ ñi duamniengeel cüdaufe Betel Sudáfrica mu. Fei mu mülerquealu quiñe hue maquina ñi deumangeam lifru ca revista. Iñche huirintucun tañi üi. Iñche ca cüla peñi dullingeiñ: Dennis Leech, Bill McLellan, Ken Nordin ca pingei ñi üi engün. Feipingeiñ taiñ alüñma mülenagpual Sudáfrica mapu mu.

Mütrümfiñ tañi ñuque, “nieleyu quiñe dungu” pifiñ, “amualu ta iñche Sudáfrica mapu mu”. Tañi ñuque dungufengelafui huelu müna feyentulefui Jehová mu ca cüme hueniyefi. Nehue chem pilaeneu rume, huelu cüme quimniefun tañi quelluntucuaeteu. Tañi pu chau hueñancülefui engu rume fente camapu ñi amual, huelu catrütulaeneu engu chem tañi dulliel iñche.

Hunelu meu amuiñ ta Brooklyn. Fei mu cüla cüyen pepicangeiñ taiñ cüdaupual Sudáfrica mu, ca püneafiel chi maquina ñi deumayam papel ca lifru. Fei hula coniyiñ quiñe barco taiñ yeaeteu Ciudad del Cabo, Sudáfrica mapu mu mülelu. Hue puhulun epu mari tripantu. Puulu iñchiñ pürapuiñ quiñe tren mu taiñ yeaeteu Johannesburgo huaria mu, puncülen tripaiñ. Hunlu puhuiyiñ quiñe pichi huaria mülelu el Karoo mu, quiñe fütra huellilechi lelfün. Adquintulu ventana mu pelqueduamiyiñ, “¿chumngealu chi ti cüdau tañi elungeal?” pihuiyiñ. Tati pichi huaria trüfürngei ca rume arengei, huelu rupayechi antü mu ngüneduamiyiñ tüng mongen ñi yenien pu che mülelu fei mu.

Müfüque tripantu mu cüdauquefun cheu ñi deumangequen taiñ revista. Pünequefun quiñe maquina linotipia pingelu, cüme maquinafel huelu cüdaungefui ñi pünengeal. Feichi imprenta mu deumangequefui revista fillque quehun dungu mu, dungungequelu Sudáfrica ca fentren pais fülcülelu. Tati imprenta rume cüme püneniengefui, feimu camapulefun rume tañi ruca mu, rume cüme duamelnieneu tañi cüdau.

Doi rupachi antü mu, cüdahurpun cheu ñi adcünungequen ñi rulpadungungeal, deumangeal ca huercüngeal taiñ papel ca lifru. Fentren duam niequefun, huelu ayüucülequefun.

1968 tripantu mu niehuiyu Laura Bowen iñchiu. Quisu püllelefui Betel mu, precursorangefui ca quelluntucuquefui cheu ñi rulpadungungequen taiñ papel ca lifru. Feichi mu niehun mu epu betelita mülenagquelafui Betel mu, fei feipingeyu tayu precursor especialngeal. Mari tripantu tañi mülen Betel mu, fill antü elungequefun iyael ca niequefun cheu tañi umayal, fei mülefulu ñi tripayal raquiduamcülehuen. Pichin plata müten llohuafulu cai iñchiu tayu precursor especialngefel, “¿chumngechi cai culliayu com tayu duamnieel?” pin. Fill cüyen quisuque iñchiu llouquefuyu 25 rand (famülque mu 90.000 peso chileno peno faliafui) huelu elungeafuyu puhulfuliyu müten tati hora, revisita ca hulqueelchi lifru tayu feipingeel. Fenten plata mu müten mülefui tayu iyal, tayu cullial ti arriendo, transporte, doctor ca caquelu duamfalchi dungu.

Huercungeyu tayu quelluntucual quiñe pichi trahunche fülcülelu Durban pingechi huaria mu. 1875 tripantu püle, fentren che India mapu tuhun-ngelu cüdaupaingün Sudáfrica mapu mu, feimu tati huaria cheu tayu amuldunguqueel müleyefui fentren India tuhun-ngechi pu che. Fei engün ca femngechi yeniecai tañi huimtun chumngequefel tañi mapu mu. Huelu gringodunguquefuingün, feimu ngelafui tayu quimal quiñe hue quehun tayu amuldungulelafiel.

Pu precursor especial mülefui tañi amuldungual 150 hora fill cüyen, feimu hunen antü “fachantü cayu hora amuldunguayu” pihuiyu tañi domo iñchiu. Huelu huesa arengefui, nielafuyu estudio ca revisita no rume, feimu mülefui tayu amuldunguyahual müten cayu hora. Pichi müten rupalu, lelihulun tañi reloj fei 40 minuto müten ruparquefui, “¿chumngechi am huechurpuayu 150 hora?” pin.

Pichin antü rupalu cüme adcünuyu tayu femal. Fill antü pepicaquefuyu roquin, cafe, corü cam cofque tayu yeñmual. Fei duamtuliyu tayu pichi cansatuam, elcünuquefuyu tayu auto miñche anümca mu. Quiñeque mu cüpaquefui quiñeque pichiqueche India mapu tuhun-ngelu, hualloñmapaquefeiñmu taiñ lelihulnieaeteu. Pichin antü rupalu fente cüdautuhuelayu, rupalu quiñeque hora müten mütai müten rupaquefui ti antü.

Rume ayuhuiyu ñi quimeltulelafiel feichi mapu mu müleyechi pu che. India tuhun-ngechi pu che cüme piuquengefuingün, yamchefengeingün ca feyentuleingün Chau Dios mu. Fentren che hindu religion-ngelu, cüme lloufingün Chau Dios mu cüpachi dungu. Ayüquefuingün ñi quimafiel Ngünechen, Jesús, tati Biblia, tati cümeque dungu ñi rupayal cüpalechi antü mu, ca pu layelu ñi huiñomongetual. Quiñe tripantu rupalu, 20 estudio nierpuyu. Tayu pu estudiante mangelqueyumu fill antü tayu iyael, rume ayüucülequefuyu.

Pichiñma mu ca llohuiyu quiñe hue cüdau, elfalcünungeyu ñi huitran-ngemeal pu trahunche inafülcülelu Océano Índico meu. Fill semana huitrangemequeyu trahunche mu ca umauquefuyu quiñeque peñi ñi ruca mu, fei quiñentrür tripaquefuiñ ñi amuldungual ca taiñ yafültucuafiel pu peñi, pu lamngen. Quisu engün ñi familia troquinieyu, ayüquefuyu ñi cüme rupaleal com fei engün mu. Epu tripantu rupalu mütrümrumeeneu quiñe peñi Betel mu, “ayünieiñ tami huiñotual Betel mu” pieneu. Rume ayüucülefuyu cheu tayu mülen, huelu mütrümngeliyu cheu rume tayu cüdahual, eluucüleyu tayu amual.

Betel mu cüdahun departamento de servicio mu. Cüdahun pu peñi iñchiñ fente cüme pepicaucülelu. Feichi mu ti huitran-ngepaquechi loncolelu huercüfi quiñe carta Betel mu, fei mu huirintucui ñi chumlen ca chem ñi duamnieel ti trahunche ñi huitranmamefiel. Fei hula tati departamento de servicio huercüfi quiñe carta ti trahunche mu ñi quelluafiel ca yafültucuafiel.  Feimu pu peñi rulpadunguquelu rume fentren cüdau nieingün, rulpadunguqueingün gringodungun mu ca quiñeque quehun dunguquelu África mapu mu. Iñche rume falintuñmaquefuiñ ñi cüdau ti pu peñi. Feichi pu peñi rulpadunguquelu ca quimeleneu engün ñi huesa rupan pu curüque peñi ca lamngen África meu mülelu.

Feichi antü mu Sudáfrica mapu meu pu curüche ca pu flangche püntücülequefuingün. Püntüquemongelequefuingün, feimu quiñentrür trahuquelafuingün. Taiñ pu curüque peñi ca lamngen quisu ñi quehun dungu meu dunguqueingün, amuldunguqueingün ca trahuqueingün.

Iñche coneltuquefun quiñe trahunche gringodungun mu, feimu quimquelafuiñ pu curüque peñi ca pu lamngen. Feula doi quimürpufiñ pu curüche ñi chumngen engün ca tañi huimtun. Taiñ pu peñi ca pu lamngen chaftufingün fillque huimtun ca tati religion ñi nieel pu che cheu tañi mülen engün. Nehuentucünuhuingün ñi chaftuafiel calcu dungu, caiñetuelumu rume tañi pu familia. Lelfün mu pu che pofrelefui. Fentren che colegiotuquelafui rume, fentren quimün nielafui, huelu yamniefingün ta Biblia.

Iñche quelluntucufiñ quiñeque peñi ca lamngen juiciantucungelu tañi feyentulen Jehová mu. Müna yafültucueneu ñi femün pu huecheque testigo. Coneltuquelaingün caquelu religion ñi ngillatun mu ca tañi ülcantun mu, feimu huemünentungeingün colegio mu. Fei rume yafültucueneu ñi femün mu engün.

Quiñe pais mu Suazilandia pingequefui, taiñ pu peñi ca pu lamngen rume caiñetungequefuingün. Lalu tati lonco ülmen Sobhuza pingelu, com pu che feipingei ñi inayal quiñeque huimtun chumngechi ñi püramyengequen pu la. Pu huentru mülefui ñi cupiluhual ca pu domo mülefui ñi pichiquecünuhual ñi lonco. Huelu taiñ pu peñi ca pu lamngen inalafingün feichi huimtun ñi püramyengeal pu la, feimu rume caiñetungeingün. Püramniepiuqueeneu ñi femün engün. Taiñ pu peñi ca lamngen África mu mülelu hunentucufingün Jehová, rume yafüluhun-ngei.

1981 tripantu mu, elfacünungen ñi cüdahual imprenta mu. Mülefui ñi püneafiel computador ñi entuhuiringeal revista ca fillque papel. Mülefui hueque quimün ñi entuhuiringeal, afmatulehuen. Quiñe fendemaquinaquelu arelelquefi quiñe hue maquina ta Betel, rume cüme maquina ürque, feimu ngillangei cayu hue cümeque maquina. Fei pünengehuelai tati ailla maquina linotipia pingelu. Doi fentren lifru ca revista entuhuiringei.

Pu computadora ca quellui ñi doi cüme adcünungeal ti huirin papel mu. Pünengequei quiñe programa MEPS pingelu (Sistema Electrónico de Edición Plurilingüe). Hue aculu tati cüla peñi iñchiñ Sudáfrica mu, mülelafui fente cümeque maquina entuhuiringeam. Feula doi adümfalngechi maquina müleyei (Is. 60:17). Niehuiyiñ cümeque domo iñchiñ, poyequefilu Jehová ca huneleingün amuldungun mu. Feichi mu Bill iñchiu petu cüdauqueyu Betel mu. Ken ca Dennis pülleleingün iñchiu mu ca nieingün pichiqueche.

Alün cüdau mülefui Betel mu, doi quehun mu rulpadungungequefui ca entuhuiringequefui fillque papel ca huercüngequefui caquelu Betel mu. Feimu duamfalngefui quiñe hue edificio. Deumangei Johannesburgo huaria mu ca 1987 tripantu chalintucungei Jehová mu. Fentren tripantu coneltuquefun ti troquiñche adcünuquelu Betel ruca, rume ayühun ñi cüdahun Betel Sudáfrica mapu mu.

2001 tripantu mu afmatulehuiyu, feipingeyu ñi amual ti Betel Estados Unidos mapu mu. Iñche cüdahualu ti troquiñche adcünuquelu Betel ruca. Hueñancüleyu rume elcünual tayu pu hueni Sudáfrica mu, ayüucüleyu tayu amual ti Betel Estados Unidos mu.

Alücamapulefuyu, feimu raquiduamcüleyu Laura ñi cushe ñuque mu. Huelu Laura ñi cüla lamngen eluhuingün ñi cuidayafiel tañi ñuque, “iñchiñ pepi cüdahuel-lafiyiñ ta Jehová fill antü” pieyumu, huelu “cuidafiliyiñ taiñ ñuque, eimu cüme cüdaucüleaimu Betel mu” pingün. Rume mañumfiyu Laura ñi cüla lamngen.

Iñche ñi peñi ca tañi domo ca femngechi cuidaniefingu tañi ñuque. Doi 20 tripantu cuidanieyu tañi peñi, Toronto huaria mu. Pichiñma aculu iñchiu Nueva York huaria mu, tañi ñuque lai. Müna mañumniefiyu tañi peñi ca ñi domo. Tayu familia adcünuingün tañi mongen ñi cuidayafiel tayu pu ñuque cüdaungefui rume, feimu rume falintufiyu ñi femün engün.

Aculu iñche Estados Unidos mu, elungei ñi cüdahual cheu entuhuiringequei papel ca lifru. Tüfa nehue cüdaungehuelai, mülelu fentren hue cümeque maquina. Feula coneltulen ti troquiñche adcünuquelu chem ñi ngillacangeal. Ti Betel Estados Unidos mu epe 5.000 che peno cüdauqueingün ca 2.000 che peno quelluntucupai. Yenieyu 20 tripantu tayu cüdauquen fau, feimu rume ayüucüleyu.

Fütra cuifi mu raquiduamlafun rume ñi mülepayal fau. Tañi domo rume quelluntucuqueneu, rume ayühun mongen yenieyu. Huitranmaquefuyu fentren Betel huall Mapu mu, caquerumechi cüdau niequefuyu, rume falintufiyu tayu cüdau ca com pu che taiñ quimürpuel. Feula doi 80 tripantu nien, feimu fentren cüdau elungehuelan. Mülei fentren huecheque peñi fente cüme pepicaucülelu ñi femal ti cüdau.

Ti salmista feipi: “Ayühun-ngei tati troquiñche poyequefilu ta Chau Ngünechen Jehová” (Sl. 33:12). Rüfngei llemai, rume mañumcülen ñi serfiafiel ta Jehová tañi ayühun-ngechi troquiñche mu.