FACHANTÜ fentren che doicülelu troquiuqueingün, feimu ayüqueingün tañi doi falintungeal. Chumte cümelcangefule rume, turpu ayüucülequelaingün. Feichi pu che quisutu duamuuquei ca quim mañumlai. Biblia feipicünui ñi rupayal femngechi dungu pichilehuechi antü meu (2 Tim. 3:2).

Cuifi mu ca mülequefui che doicülelu troquiuquefui. Adán engu Eva femngerpuingu. Ayüingu tañi quisutu dullial chem ñi cümen ca chem ñi cümenon, huelu com iñchiñ huesalcaeiñmu. Rupachi tripantu mu, ti lonco ülmen Uzías lüpümfi incienso ti ngillatuhue ruca mu, huelu elungelafui tañi femal (2 Crón. 26:18, 19). Cafei pu fariseo ca pu saduceo raquiduamquefuingün Dios tañi doi cümelcayaeteu tuulu cai Abrahán mu (Mat. 3:9).

Fill püle mülei che quisutu duamuuquelu, feimu iñchiñ inayentuafuiñ chi (Gál. 5:26). Doi falin che troquihuafuiñ, feimu ayüafuiñ taiñ doi duamtungeal. ¿Chumngechi famentuafuiñ feichi huesa raquiduam? Ngüneduamaiñ chem raquiduamquei Jehová tüfachi dungu mu. Peafiyiñ epu dungu.

Jehová feipiquei müten chumngechi taiñ troquingeal. Peaiñ quiñeque dungu.

• Chau Jehová ayüquei tati huentru ñi respetayaeteu tañi domo, ca femngechi tati domo ñi piuqueyeaeteu tañi füta (Efes. 5:33). Jehová ca adcünufi tati pu curehuen tañi rumel piuqueyehual ca ñi turpu  ñihuañpeunoal (1 Cor. 7:3). Jehová feipifi tati pu yall ñi allcütuafiel tañi pu chau. Ca tati pu chau mülei ñi piuqueyenquechi cuidayafiel tañi pu yall (2 Cor. 12:14; Efes. 6:2).

• Jehová feipi tati pu loncolelu mülei ñi respetaniengeal tañi fente cüme cuidaquefiel tati trahunche (1 Tes. 5:12). Huelu quisu engün ngelai tañi ngünenieafiel com ñi femün tañi pu peñi ca lamngen (1 Ped. 5:2, 3).

• Jehová ca feipicünui tañi respetaniengeal tati pu gobierno ca ñi cullingeal impuesto (Rom. 13:1, 6, 7).

Jehová cümelcaqueiñmu taiñ piuqueyeteu mu müten, iñchiñ taiñ duam mu no. Culpafengelu am iñchiñ, feimu mülefui taiñ layal müten (Rom. 6:23). Huelu Jehová rume piuqueyenieiñmu iñchiñ, feimu eluqueiñmu fentren cümelcan (Sal. 103:10, 11). Jehová ngelafui taiñ eluaeteu com tüfachi cümeque dungu, huelu fente ñi cutranpiuqueyechefengen cümelcaqueiñmu (Rom. 12:6-8; Efes. 2:8).

Cuñiutucuhuaiñ taiñ raquiduamnoal caquelu pu che reque poyequenofilu ta Jehová. Cuñiutucuunoliyiñ, ayüafuiñ taiñ doi falin-ngelu troquingeal. Jesús ñi quimfalcünual tüfa, entui quiñe nütram. Quiñeque cüdaufe cüdahuingün com antü quiñe denario mu. Rupalu quiñeque hora, tati ngen cüdau cüpalfi caquelu cüdaufe. Naglu tati antü, tati ngen cüdaufe elufi caque quiñeque quiñe denario engün. Tati cüdaulu quiñe hora müten ca elufi quiñe denario. Tati pu cüdaulu com antü ayüfuingün tañi doi cullingeal, “iñchiñ com antü cüdahuiyiñ ca arecahuiyiñ ta antü meu” pingün. Huelu cümelafui tañi femngechi raquiduamal engün (Mat. 20:1-16). ¿Chem quimeltueiñmu Jesús tüfachi nütram mu? Iñchiñ ayüucüleaiñ tunte taiñ elueteu Jehová.

Quim mañumaiñ ca ayüucüleaiñ taiñ elungen mu (1 Tes. 5:18). Inayentuafiyiñ Pablo. Ti trahunche felefui tañi quelluaeteu, huelu mülelu Corinto mu feipilai tañi  quellungeal (1 Cor. 9:11-14). Iñchiñ ca femngechi chumte elungefuliyiñ rume, ayüucüleaiñ. Feipilayaiñ taiñ doi elungeal.

Ñom piuquengeaiñ. Quiñe che doicülelu caquelu mu troquiule, ayürpuafui tañi doi falintungeal. Femngechi raquiduam cuñihun-ngei. Huelu ñom piuquengeliyiñ, famentuafiyiñ tüfachi huesa raquiduam.

Tati profeta Daniel inayentufali tañi ñom piuquengen mu. Daniel cüpafui quiñe cüme familia mu, cüme adngefui ca rume adümuuquefui, feimu raquiduamafui tañi doi falilu troquingeal (Dan. 1:3, 4, 19, 20). Huelu Daniel femlai. Ñom piuquengefui, feimu Jehová rume falintueyu (Dan. 2:30; 10:11, 12).

Famülque mu mülei fentren che quisutu duamuuquelu ca quim mañumnolu, huelu iñchiñ inayentulayafiyiñ. Rumel mañumcüleaiñ com taiñ eluqueteu Jehová fente taiñ cutranpiuqueyeteu.