Ti dungun püllü rulpadungungequei rúaj hebreo quehun mu,cafei rulpadungungequei pnéuma griego quehun mu. Fillque dungu mu ca femngechi rulpadungungeafui, huelu com tüfachi dungu pengequelai, quimfali ñi nehuen-ngen. Hebreo ca griego quehun mu, ¿chem cüpa feipi tüfachi dungun? 1) Ti cürüf. 2) Ti neyen eluquefilu ta che ca com pu culliñ ñi mongeleal. 3) Chem ñi nehuentucuquefiel ta che piuque mu ñi femal ca feipial chem rume. 4) Fillque quimeltun quiñe püllü mu cüpalu. 5) Pu püllü. 6) Chau Ngünechen ñi nehuen (Éxodo 35:21; Salmo 104:29; Mateo 12:43; Lucas 11:13).

 Chau Jehová deumafilu ta Adán, ti hunen che, Biblia feipilei, Chau Jehová ‘pimuntuculelelfi neyen ñi yu meu, fei elurquefi ta mongen’ (Génesis 2:7). Chumngechi ngüneduamaiñ, Chau Jehová elulafi quiñe laquenochi püllü, doi mai elufi neyen tañi mongeleal.

Lale quiñe che ¿mongelepei mai tañi püllü?

 Salmo 104:29 feipi: “Jehová müntuñmafilmi tañi püllü engün [rúaj], laqueingün ca trufür mu huiñotuqueingün”. Cafei Santiago 2:26 feipilei: “Quiñe cuerpo nienole püllü [pnéuma] lalei”. Tüfachi epu versiculo cüme pengeli tati dungun rúaj ca pnéuma cüpa feipi ti nehuen hulquefilu mongen tati cuerpo, femnofule tüfa layafui. Feimu ti mangiñ co Noé ñi antü mu Chau Ngünechen feipi: “Iñche ta huercüan quiñe fütra tripacon, fei com mangiñmayai ta mapu, ca apümafiñ itrocom tati nielu mongen com mapu meu [com tati nielu neyen (rúaj), Tradución del Nuevo Mundo]” (Génesis 6:17; 7:15, 22). Tati dungun rúaj mu üytungequei pengequenoelchi nehuen eluquefilu mongen com pu mongelelu.

Quiñe pengelün dungu

 Quiñe radio duamniei electricidad ñi üyümngeal. Ca femngechi tati cuerpo duamniei ti püllü ñi mongeleal. Quiñe pichi radio tuculelfiliyiñ pila, fei ti nehuen nielu tachi pila üyümquefi ti radio. Nienole pila cam tucungenole electricidad mu, pepi üiquelai. Ca femngechi rupaquei ti püllü mu, tüfa ti nehuen eluquefilu mongen tati cuerpo. Ti electricidad reque, tati nehuen hulquelu mongen ayüuquelai, hueñancüquelai, raquiduamquelai rume, quiñe nehuen müten felei. Huelu mai taiñ cuerpo,nienole tüfachi püllü, ti nehuen hulquelu mongen, fei rupaquei chumngechi feipi quiñe huirintuculu ti Salmo, “laqueingün, ca trüfür mu huiñoquetuingün” (Santiago 2:26).

 Eclesiastés 12:7 feipi, lalu quiñe che “tati trufür [cuerpo] huiñoquetui ta mapu mu, fei ngequefulu nga, ca tati püllü huiñoquetui tati rüfngechi Ngünechen mu tañi elueteu”. Feimu tüfachi püllü cam nehuen hulquelu nielu mongen, elcünuquei ti cuerpo, fei tüfa laquei ca huiñoquetui cheu ñi tuhun-ngen, ti mapu mu. Ca femngechi tati nehuen hulquelu mongen huiñoquetui cheu tañi cüpan, Chau Ngünechen mu (Job 34:14, 15; Salmo 36:9). Huelu tüfa cüpa feipilai tüfachi nehuen hulquelu mongen püraquetui huenu mu. Doi mai lale quiñe che, Jehová müten dulliquei ñi huiñomongeltuafiel ca ñi femnoafiel cüpalechi antü mu. Feimu tañi mongen, Chau Ngünechen ñi cuhu mu mülei. Chau Jehová ñi nehuen müten huiñoleltuafi feichi che tañi püllü cam nehuen, fei ñi huiñomongetual.

Laquelai ti püllü piquei ta che. Huelu, ¿cheu chi tuhui tüfachi quimeltun?

 Pu che feipiquei lale quiñe che tañi püllü amulei ñi mongelen, piqueingün. Huelu Biblia quimeltuquelai ta tüfa, doi mai tüfachi quimeltun tuhui pu cuifique griego ñi quimün mu cam caquelu che ñi raquiduam mu. Chau Dios huesa dungu troquiquefi ñi reyulngeal tañi quimeltun quiñentrür pu che ñi quimün mu. Feimu Biblia feipilei: “Cuñiutuucülemün ca eluuquilmün tamün ngünencayaeteu tüfei engün tati ayüquelu tamün quimeltuaeteu ti falinochi dungu ca ti nütramquelchi coila ngünen dungu, fei quisu engün am ta maneluuquenolu ta Cristo meu, huelu mai, tati pu che ñi pepicaelchi huimtun dungu meu” (Colosenses 2:8).