Fentren che rume cutrancahui tati Holocausto ñi duam mu. Feimu duamnieingün ñi yafültucungeal. Quiñeque che feipiquei ñi rume huesa dungungen ti Holocausto. Feimu raquiduamqueingün ñi ngenon ta Chau Ngünechen. “Mülele Chau Dios femngechi dungu rupalayafui” pingün.

 Quiñeque che feipiquei: “Cümelai taiñ ramtuhual ‘¿chumngelu Chau Dios catrütulafi ñi rupan ti Holocausto?’”.

 Ti rüf dungu: Quiñeque huentru, domo, poyequefilu ta Chau Dios ramtuuquei “¿chumngelu Chau Dios catrütulafi huesaque dungu?”. Quiñe tüfa, fei ta Habacuc. Tüfachi huentru ramtufi ta Chau Dios: “¿Chumngelu catrütuquelafimi ñi müleal ti illamcahun? ¿Chumngelu mülei apümcahun ca quehuan dungu iñche ñi adquiñ meu?” (Habacuc 1:3). Chau Dios illculai tañi ramtungeel, doi mai huirintucui Biblia meu ñi feipin ta Habacuc. Femngechi iñchiñ taiñ cümelcayaeteu.

 Quiñeque che feipiquei: “Chau Dios cutranpiuqueyelaeiñmu taiñ cutrancahun mu”.

 Ti rüf dungu: Chau Dios üdequefi ti huesaque dungu ca cutrancahun ayüquelai (Proverbios 6:16-19). Biblia feipi Noé ñi antü mu mülefui fentren huesaque dungu. Fei Chau Dios pefiel mu tüfa, ‘rume cutrantupiuquei’ (Génesis 6:5, 6). Feimu Chau Dios pefiel mu fente huesa dungu ñi rupan Holocausto mu, ca femngechi rume cutrantupiuquei (Malaquías 3:6).

 Quiñeque che feipiquei: “Dios femi ti Holocausto ñi cutrancayafiel pu judio”.

 Ti rüf dungu: Hunen siglo mu, Chau Dios catrütulafi pu romano ñi teifücayafiel Jerusalén (Mateo 23:37–24:2). Huelu deu ñi rupan ta tüfa ta fantepu meu, Chau Dios castigaquelafi chem tuhun troquiñche no rume, ca femngechi fürenequelafi. Chau Dios tañi adquiñ mu “ngelai ta caquerume che tunte judiongeai rume cam judio tuhun-ngenolu rume” (Romanos 10:12).

 Quiñeque che feipiquei: “Rüf mülele ta Ngünechen, ngelayafui ti Holocausto”.

 Ti rüf dungu: Chau Dios cutrancaquelafi ta che, huelu quiñeque mu catrütulafi ñi rupayal huesaque dungu (Santiago 1:13, TNM; 5:11).

 Chau Dios catrütulafi ñi rupan huesaque dungu, femngechi ñi norümngeal quiñeque dungu ñi rupan cuifi mu. Biblia feipi Ngünechen ngünenielafi huall mapu, doi mai Huecüfü ta ngüneniei ta mapu (Lucas 4:1, 2, 6; Juan 12:31). Biblia mu, ngüneduamafiyiñ epu dungu pengelquelu chumngelu Chau Dios catrütulafi ñi rupan ti Holocausto.

1.   Chau Dios elufi ta che ñi femal cümeque dungu cam ñi femal huesaque dungu. Chau Dios deumafilu ti hunen huentru, ti hunen domo, Adán ca Eva pingelu, ayüniefui cümeque dungu ñi femal engu. Huelu obligalafi ñi femal. Adán Eva engu huesa dullingu chem tañi chumal, feimu cüpalechi antü mu mülerpui fentren cutrancahun (Génesis 2:17; 3:6; Romanos 5:12). Feichi mu ca fantepu mu, pu che rume cutrancauquei fei engün tañi huesa dullin mu. Quiñe falin-ngechi lifru feipi: “Fentren rupa pu che huesa dulliquei chem tañi femal, feimu fentren cutrancahun mülei huall Mapu mu” (Ti lifru gringodungun mu feipingei: Statement of Principles of Conservative Judaism). Chau Dios catrütulafi ta che ñi dullial chem tañi femal engün, doi mai eluquefi ta tiempo ñi ngünenieafiel tañi mongen chumngechi tañi ayüqueel engün.

2.   Chau Dios niei nehuen ca rume ayüniei ñi cümecünutuafiel ti huesa dungu ñi femün ti Holocausto. Chau Dios feipicünui ñi huiñomongeltuafiel fentrenque pu che, fei ca huiñomongeltuafi pu lalu ti Holocausto mu. Cafei Chau Dios quelluafi feichi pu che mongetripalu ti Holocausto mu ñi loncontucunienoal tañi huesa rupan engün (Isaías 65:17; Hechos 24:15, TNM). Chau Dios piuquentucuniei com tati pu che, feimu rüf tripayai tañi feipicünuel (Juan 3:16).

 Fentren che mongetripalu ti Holocausto mu, falinturpui tañi mongen ca maneluhurpui Chau Dios mu. ¿Chem quellueyu? Quimürpuingün chumngelu Chau Dios catrütulafi ti huesaque dungu ca quimürpuingün chem tañi femal ñi cümecünutuafiel tañi huesa rupan engün.