Tati Biblia quiñe rupa müten dungui tati tatuaje mu, fei mülei Levítico 19:28 mu, cheu feipi: “Ngelai tamün tuculuhual tatuaje”. Dios elufi tüfachi huercün dungu tati pu Israel che, fei ñi trürnoal caque lof mapu tuhun-ngechi pu che mu. Tüfachi pu che tuculuuquefui tatuaje tañi cuerpo mu ñi püramyeafiel tañi pu dios (Deuteronomio 14:2). Famülque mu pu cristiano inaquelai Moisés ñi ley engün, huelu ngüneduamqueingün chem ayüniei ta Ngünechen.

¿Cümeafui quiñe cristiano ñi tuculuhual tatuaje?

 Ngüneduamaiñ quiñeque troquiñ Biblia taiñ huiñoldungual feichi ramtun.

•   Biblia feipi: “Tati pu domo mülei ñi adelcahual […] mallmangenon mu ca cüme raquiduam meu” (1 Timoteo 2:9, TNM). Tati pu huentru ca mülei ñi inayal tüfachi ngülam. Taiñ chumngen taiñ ad, ngelai taiñ huesa duamelafiel caquelu pu che. Ca quintuquelaiñ fente taiñ ngüneduamngeal.

•   Quiñeque che tuculuuquei tatuaje ñi pengelal chem troquiñche mu ñi coneltulen. Caquelu femquei ñi pengelal ñi ngen-ngen tañi cuerpo mu, fei tañi chumal chem rume tañi ayüqueel engün. Huelu Biblia feipifi tati pu cristiano: “Hultucuaimün tamün cuerpo ca tamün mongen ta Chau Ngünechen meu, quiñe lif chalintucun reque fei ñi llohuafiel. Feimu com tamün raquiduam meu serfiafimün ta Chau Ngünechen” (Romanos 12:1, TNM). Feimu cümeafui quiñe che ñi cüme raquiduamal chumngelu duamniei ñi tuculuhual tatuaje. Raquiduamnge, eimi ayüimi chi tuculuhual tatuaje tami conal quiñe moda mu cam quiñe troquiñche mu. Huelu ca antü chi caletuafui tami raquiduam, huelu tati tatuaje entulayafuimi. Feimu doi cümeafui quiñe che ñi cüme raquiduamal petu ñi tuculuunon tatuaje, femngechi inayafi tañi cüme femal (Proverbios 4:7).

•   Biblia feipi: “Chem ñi adcünuel tati cüme cüdauquelu, cüme tripayai llemai, huelu tati matucaufe fillalerpuai” (Proverbios 21:5). Fentrenque che matu dulliquei ñi tuculuhual tatuaje. Huelu tati che deu tuculuulu raquiduamtuafui ñi huesa femün, caquelu che cüme pequelaeyu cam pepi pelayafui chi cüdau. Huelu ti che entutual ti tatuaje culliafui fentren plata ca rume cutrantuafui ñi cuerpo. Fentren che ayüquei ñi entutual ti tatuaje, fei pengeli ñi repentiuquetun engün.