Biblia ñi quimeltuqueel griego quehun mu, ti huiñomongetun anástasis pingei. Femngechi ñi feipin pünengequei ñi feipial ñi huitrapüratun quiñe che. Ca femngechi huiñomongetulu quiñe che, huitrapüratuquei reque. Huiñomongetuquei chumngechi chengefel em petu tañi lanon (1 Corintios 15:12, 13).

 Ti dungu huiñomongetun tripalai ti Antiguo Testamento mu. Huelu quimeltuquei mai ñi müleal ta huiñomongetun. Por ejemplo, Daniel pingechi lifru mu Chau Dios feipicünui “fentren pu umaucülelu trufür mapu mu nepeaingün” (Daniel 12:2, 13; Oseas 13:14; Job 14:13-15; Isaías 26:19).

 ¿Cheu huiñomongetuai tati pu layelu? Quiñeque che huiñomongetuai huenu mu ñi gobiernongeal Jesús engu (2 Corintios 5:1; Apocalipsis 5:9, 10). Fei tüfa tati “hune huiñomongetun“ pingei ta Biblia mu. Tüfa pengeli tañi müleal cangelu huiñomongetun, tüfa ñi femal Mapu mu (Apocalipsis 20:6). Fentrenque che huiñomongetuai Mapu mu (Salmo 37:29).

 ¿Chumngechi huiñomongetuai am pu che? Chau Dios elufi ta nehuen ta Jesús ñi huiñomongeltuafiel ta pu che (Juan 11:25). Jesús huiñomongeltuafi tati pu che. Fei engün chumngechi chengefel petu tañi lanon, ca femngechi feleaingün müten (Juan 5:28, 29). Pu huiñomongetulu Mapu mu nieaingün quiñe tremolechi cuerpo, niehuelayaingün culpan. Pu huiñomongetulu huenu mu, fei engün püllüngeai (Isaías 33:24; 35:5, 6; 1 Corintios 15:42-44, 50).

 ¿Inei engün am huiñomongetuai? Biblia feipi “ñi huiñomongetual pu norngechi che ca pu norngenochi che” (Hechos 24:15, TNM). Feiti rüf norngechi che fei tati serfiquefulu ta Dios, quiñeque engün ta Noé, Abrahán, Sara pingefui (Génesis 6:9; Hebreos 11:11; Santiago 2:21). Pu norngenochi che turpu quimürpulafingün ta Chau Dios, feimu feyentuquelafuingün.

 Ca femngechi quiñeque che ñi huesa raquiduam ñi yenieel turpu cangelu chengetulayaingün. Feimu larumele engün, nielayaingün quiñe huiñomongetun (Mateo 23:33; Hebreos 10:26, 27).

 ¿Chumül mülepeai tati huiñomongetun? Biblia feipicünui müleai huiñomongetun huenu mu Cristo deu reyngele. Cristo reyngerpui 1914 tripantu mu (1 Corintios 15:21-23). Cristo ngünenierpufile ti Mapu quiñe huaranca tripantu mu, fei huiñomongetuai che Mapu mu, cüme mülehue ngetuai (Lucas 23:43, TNM; Apocalipsis 20:6, 12, 13).

 ¿Chumngelu maneluhuafuiñ tañi huiñomongetual ta pu layelu? Biblia feipi 9 che huiñomongetui. Fentrenque che pei feichi huiñomongetun (1 Reyes 17:17-24; 2 Reyes 4:32-37; 13:20, 21; Lucas 7:11-17; 8:40-56; Juan 11:38-44; Hechos 9:36-42; Hechos 20:7-12; 1 Corintios 15:3-6). Quiñe ejemplo, Jesús huiñomongeltufi ta Lázaro 4 antü deu ñi lan. Huiñomongeltufi fentren che ñi adquiñ mu (Juan 11:39, 42). Ca femngechi quiñeque üdequefulu rume ta Jesús, huelu quimürpuingün ñi huiñomongeltufiel ta Lázaro. Feimu ayüfui ñi langümafiel ta Jesús ca Lázaro (Juan 11:47, 53; 12:9-11).

 Biblia feipi Dios ta niei ta nehuen ñi huiñomongeltuafiel lachi pu che. Chau Ngünechen acordaniei chumngechi chengefel tati pu che petu tañi lanon (Job 37:23; Mateo 10:30; Lucas 20:37, 38). Dios re femngechi nielai müten ta poder, ca ayüniei ñi huiñomongeltuafiel pu layelu. Biblia feipi Dios rume ayühuai huiñomongeltufile ta pu layechi che (Job 14:15).

Quiñeque che ñi raquiduamquen ñi huiñomongetual layechi che

 Quiñeque che raquiduamquei: Huiñomongetun mu, tati am engu ti cuerpu quiñeucületuaingu.

 Ti rüf dungu: Biblia quimeltuquelai lan mu ta che ti am tripaquei, mongelequei cañpüle (Génesis 2:7; Ezequiel 18:4). Doi mai Biblia quimeltuquei Chau Dios huiñomongeltufile ta che, cüme deumatuafi.

 Quiñeque che raquiduamquei: Quiñeque huiñomongetulu langümfemngetuaingün.

 Ti rüf dungu: Biblia quimeltui petu ñi lanon quiñe che huesaque dungu femquefulu, fei huiñomongetule juiciangeai (Juan 5:29, TNM). Tati pu che juzgangelayai tañi femün cuifi petu tañi lanon, doi mai rupalechi antü mu tati pu che juzgangeai tañi femün deu tañi huiñomongetun mu. Jesús feipi ti pu la allcüñmayafi ñi dungun Dios tañi Fotüm, feyentulu mongetuaingün (Juan 5:25, TNM). Feyentufilu Jesús tañi quimeltun, fei engün huirintucuñmangeai ñi üi engün ti mongen lifru mu (Apocalipsis 20:12, 13).

 Quiñeque che raquiduamquei: Huiñomongetule ti che, chumngechi cuerpo ñi niequefel femngechi cuerpo müten nierputuai.

 Ti rüf dungu: Lan mu quiñe che, funarpuquei ñi cuerpo ca felehuetuquelai (Eclesiastés 3:19, 20).