QUIMELÜN ÑI PAPILTUNGEAL 33
ÜLCATUN 130 Huiñoduamtuchefengeaiñ
Quiñe cristiano yabcale, ¿chumngechi inayentuabüiñ Jehová?
“Quiñe yabcale, [...] müli iñi taiñ quelluatu” (1 JUAN 2:1).
¿CHEM QUIMAIÑ?
Quiñe che hueda yabcalu Corinto trahunche mu, ¿chem upai ca chem quimeleleiñmu?
1. Jehová, ¿chem ayüni ñi bemal com pu che?
CHAU JEHOVÁ deumafilu pu che, ca elufi quisuque ñi dullial tañi chumal. Fill antü dulliqueiñ fillque dungu, huelu ti doi falin dungu taiñ dulliqueel: taiñ serfiafiel ta Chau Jehová ca taiñ conal tañi troquiñche mu. Jehová ayüniei com che ñi femngechi femal, ¿chumngelu? Fente taiñ piuqueyeteu ca ayüniei taiñ cümelcaleal. Quisu ayüniei taiñ cüme hueniyeafiel ca taiñ rumel mongeleal (Deut. 30:19, 20; Gál. 6:7, 8).
2. Chau Jehová, ¿chem ayüni ñi bemal pu hueda yabcalu petu ñi huiñoraquiduamtunon? (1 Juan 2:1).
2 Huelu Chau Jehová obligaquelafi inei no rume tañi serfiaeteu. Eluñmaquefi quisuque ñi chumal engün. Huelu quiñe cristiano fautizaucülelu fütra culpale ca repentiutunole, mülei ñi entungeal trahunche meu (1 Cor. 5:13). Rupale rume tüfachi huesa dungu, Chau Jehová üngümcülequei ti che ñi repentiutual ca tañi huiñotual quisu meu. Feimu huli tañi Fotüm taiñ montulaeteu culpan dungu mu rüf repentiuliyiñ (papeltunge 1 Juan 2:1). Chau Jehová piuqueyenquechi mangelquefi pu culpalu ñi repentiutual (Zac. 1:3; Rom. 2:4; Sant. 4:8).
3. ¿Chem ngüneduamaiñ tübachi papiltun mu?
3 Chau Jehová feipiqueiñmu chem raquiduamquei culpan mu ca tati pu fütra culpalu meu, ca ayüniei taiñ ca femngechi raquiduamal. Feimu tüfachi troquiñ mu peaiñ cüla dungu: 1) cuifi mu, ¿chumngechi norümtungei quiñe fütra culpan Corinto trahunche mu? 2) Repentiutulu ti culpalu, ¿chem feipifi Pablo tati Corinto trahunche? 3) ¿Chem raquiduamquei Jehová pu fütra culpalu meu?
CORINTO TRAHUNCHE MU YABCALU QUIÑE PEÑI, ¿CHEM UPAI?
4. ¿Chem dungu upai Corinto trahunche mu? (1 Corintios 5:1, 2).
4 (Papeltunge 1 Corintios 5:1, 2). Feichi amuldunguyaulu Pablo, allcüi rume huesa dungu ñi femmequen ti hue trahunche Corinto huaria mu. Quiñe peñi cudumuuquefui tañi chau ñi domo engu. ¡Afmatufali! “Tüfachi fütra huesa dungu pengequelai pu feyentulenochi che meu no rume”. Ti trahunche chumquelafuingün rume. “Mülecape müten trahunche mu” ¿pipelafuingün? Feipiquefuingün chi: “Cutranpiuqueyeafiyiñ chumngechi Chau Jehová cutranpiuqueyechequei”. Huelu Chau Jehová re rulpacünuquelai huesaque dungu trahunche mu. Fente tañi huesa femquen tüfachi huentru, huesa dunguyemequengei ti trahunche. Entungenofule, caquelu cristiano ca inayentuafeyu. Feimu, ¿chem pieyu Pablo tañi femal engün? Peafiyiñ.
5. Pablo, ¿chem huirintuculelbi tati trahunche? (1 Corintios 5:13; ca pebinge tati adentun).
5 (Papeltunge 1 Corintios 5:13). Jehová adniefi ta Pablo ñi huirintuculelafiel quiñe carta pu Corinto che. Pablo feipi ñi entungeal ti huentru trahunche mu. Feimu pu peñi ca lamngen mülefui ñi quiñeucülenoal feichi huentru engu ca quiñentrür inoal rume (1 Cor. 5:11). Quiñentrür in mu ta che, doi nütramcauquei ca doi hueniyeuquei. Feimu Pablo cüpa feipifui ñi hueniyengenoal tati culpalu, femngechi cuñiutucuhuafui ti trahunche ñi inaconnoal ti culpan dungu mu (1 Cor. 5:5-7). Cafei ti culpalu ngüneduamafui fente tañi huesa femün, fei yehueafui ca cüpa huiñotuafui Jehová mu.
Jehová adniefi ta Pablo ñi huirintucual quiñe carta. Feipi ñi entungeal trahunche mu ti culpafe repentiutunolu. (Inaduamnge parrafo 5).
6. Lloulu tati carta, ¿chumi tati trahunche ca tati yabcalu?
6 Pablo deu huercüfilu ti carta, ramtuumequefui ñi chem pial ti trahunche. Rupachi antü, Tito cüpaleleyu ayühun dungu: ti trahunche cüme llohui ti carta (2 Cor. 7:6, 7). Cüme inafingün Pablo ñi ngülam. Cafei pichin tiempo rupalu, ti huentru fütra culpalu repentiutui. Cüme raquiduamtui, cüme elcünutui ñi mongen, fei eluhui ñi inayal Chau Jehová ñi huercün dungu (2 Cor. 7:8-11). Feula Pablo, ¿chem feipifi ti trahunche ñi femal? Peafiyiñ.
TATI TRAHUNCHE, ¿CHUMNGECHI LLOHUABÜI BEICHI HUENTRU HUIÑORAQUIDUAMTULU?
7. ¿Chumi tati huentru nentungelu trahunche mu? (2 Corintios 2:5-8).
7 (Papeltunge 2 Corintios 2:5-8). Pablo feipi: “Deu norümtufimün feichi huentru culpalu. Feicai” pifi. Ti huentru entungelu am trahunche mu cüme raquiduamtui, feimu feula mülefui ñi cüme lloungetual (Heb. 12:11).
8. Pablo, ¿ca chem eipibi tati trahunche?
8 Huelu ti culpalu ngelai ñi cüme lloungetual müten. Pablo ca feipifi ti trahunche: “Com piuque mu mülei tamün perdonayafiel. Yafültucuafimün”, ca “pengelelafimün fente tamün piuqueyeniefiel”. Femngechi femle ti trahunche, ti huentru ngüneduamafui ñi perdonangen ca ñi piuqueyenquechi lloungetun.
9. Quiñeque che, ¿chemu cüdaungepebüi ñi ulpacünoabel tati peñi ñi yabcan, huiñoraquiduamtulu deuma?
9 Quiñeque müte ayüucülelafui chi ñi cüme lloungetun ti huentru. ¿Chemu feipiafuiñ? Quiñeque, ¿petu illculepelafui ñi huesa femfiel ti trahunche? Caquelu, ¿petu huesa duamcülepelafui tañi huesa femeteu ti culpafe huentru? “Iñchiñ rumel inaniequeiñ Chau Jehová ñi ngülam, ¿chumngelu fente cüme lloungetui ti huesa culpalu?” pipelaingün tañi raquiduam mu (ca ngüneduamafuimi Lucas 15:28-30). Huelu chem raquiduamfule rume engün, mülefui ñi pengelelafiel ti peñi fente tañi piuqueyefiel. ¿Chumngelu? Inaduamafiyiñ.
10, 11. Pu loncolelu pinobüle ulpacünoñmaabel ñi yabcan tati huiñoraquiduamtulu ¿chem upaabüi?
10 Pu loncolelu eluñmanofile ti huentru ñi huiñotual, ¿chum duamafui? Cam huiñotule rume trahunche mu, huelu pengelngenole piuqueyen, ¿chum duamafui ti huentru? Rume hueñancüpelayafui. “Turpu cüme serfilayafun Jehová” piafui chi. “Tunte cüme elcünutuli rume tañi mongen, Chau Jehová turpu perdonalayaeneu” piafui chi.
11 Cafei pu peñi ca lamngen perdonanofile ti culpalu, doi huesalcalerpuafui dungu. ¿Chumngelu? Inayentunofiel mu Chau Jehová ñi perdonachequen, quisu hueniyehuelayafeyu engün. Inayentuafuingün Huecüfü, tüfa rume huesalcachequei ca cutranpiuqueyechequelai. Eluhuafuingün ñi quelluntucuafiel Huecüfü ñi püntünentuafiel ti huentru Jehová mu (2 Cor. 2:10, 11; Efes. 4:27).
12. Corinto trahunche, ¿chumngechi inayentuabüi Jehová?
12 Feimu, ¿chem mülefui ñi femal Corinto trahunche ñi inayentuafiel Jehová? Mülefui ñi perdonayafiel pu culpalu repentiutulu chumngechi femquei Jehová. Biblia cüme pengelquei Jehová ñi perdonachequen. “Cüme piuquengeimi ca pepicaucüleimi tami huiñoduamtual” pi David (Sal. 86:5). Miqueas huirintucui: “¿Mülepei mai cangelu Dios eimi reque, perdonaquefilu ti culpan ca rulpañmaquefilu ti huelulcan?” (Miq. 7:18). Isaías feipi: “Ti huesa huentru elcünupe ñi rüpü ca ti huesa piuquengelu elcünupe ñi raquiduam; huiñotupe Jehová meu, tañi cutranpiuqueyeaeteu, huiñotupe taiñ Chau Ngünechen mu, quisu am tañi fütra huiñoduamatuaeteu” (Is. 55:7).
13. ¿Chemu cümebüi tati huentru ñi huiñotual trahunche mu? (Ngüneduamnge ca mülechi dungu “ ¿Chumten tiempo upai ñi lloungetun ti huentru Corinto trahunche mu?”).
13 Tañi inayentuafiel ta Jehová, ti Corinto trahunche mülefui ñi perdonayafiel ti huentru ca pengelelafiel ñi piuqueyefiel. Pablo feipi perdonafilmün ti huentru culpalu, pengelaimün tamün feyentulen com dungu mu (2 Cor. 2:9). Quiñeque cüyen müten rupai ñi entungen trahunche mu, huelu tüfa quellueyu tañi rüf repentiutual. Feimu cümelayafui ñi doi rupayal tiempo ñi huiñotual trahunche mu, ti huentru deu pengeli ñi cüme yenietun ñi mongen.
JEHOVA ÑI NORNGEN CA TAÑI CUTRANPIUQUEYECHEN, ¿CHEM QUIMELELEIÑMU?
14, 15. Ñi chumün pu Corinto che hueda yabcalu quiñe huentru, ¿chem quimeleleiñmu? (2 Pedro 3:9; ca peabimi tati adentun).
14 Tüfachi dungu ñi rupan Corinto huaria mu “huirintucungei taiñ quimeltungeal” (Rom. 15:4). Tüfachi nütram quimeltuqueiñmu Chau Jehová rulpacünuquelai fütra culpalu quiñe cristiano. Quiñeque che raquiduamafui: “Jehová cutranpiuqueyechequei, feimu mülefui ñi perdonayafiel pu culpalu repentiutunofule rume”. Huelu feingelai. Chau Jehová rüf cutranpiuqueyechequei, huelu turpu quiñepülecünuquelai tañi huercün dungu (Jud. 4). Chau Jehová entunofile pu culpafe ti trahunche mu, huesalcangeafui pu peñi ca lamngen, fei mai cutranpiuqueyechequelai pingeafui Jehová (Prov. 13:20; 1 Cor. 15:33).
15 Ñi rupan Corinto trahunche mu ca quimeltuqueiñmu: Jehová ayüquelai inei no rume ñi apümcangeal, doi mai ayüniei com che ñi montual. Quiñe che cüme elcünutule tañi raquiduam ca tañi femün fei tañi huiño serfituafiel Jehová, Chau Jehová cutranpiuqueyeayu (Ezeq. 33:11; papeltunge 2 Pedro 3:9). Femngechi femi Chau Jehová Corinto mu, feimu quimelngei ti trahunche ñi perdonayafiel ti huentru repentiutulu.
Pu peñi ca lamngen cüme llouquefi pu huiñotulu trahunche mu, femngechi inayentuquefi Jehová ñi piuqueyechen ca cutranpiuqueyechen. (Inaduamnge parrafo 14, 15).
16. Ngüneduamlu eimi, Corinto trahunche mu ñi upan, ¿chum duamcülimi Jehová ñi chumngen mu?
16 Ñi rupan Corinto trahunche mu ca pengeleiñmu Chau Jehová ñi piuqueyechen ca tañi norngen (Sal. 33:5). Quimlu tüfa, doi cüpa püramyequefiyiñ ta Jehová. Com culpafe chengeiñ, feimu mañumquefiyiñ Chau Jehová taiñ perdonaqueteu. Felei, Jehová huli tañi Fotüm taiñ montulaeteu, feimu doi mañumcülei taiñ piuque. Quimfali, Chau Jehová piuqueyefi tañi pu che ca ayüniei tañi cüme feleal. Tüfa tüngduamelqueiñmu, ¿felelai?
17. ¿Chem ngüneduamaiñ epu cüpalechi papiltun mu?
17 ¿Fachantü cai? Fütra culpale quiñe peñi cam lamngen, ¿chumngechi pu loncolelu inayentuafui Chau Jehová ñi piuqueyen? ¿Chumngechi quelluafuingün ñi repentiutual? Pu loncolelu entufile quiñe che trahunche mu, ¿chumafui pu peñi ca lamngen? Huiño lloungetule ti che, ¿chumafui ti trahunche? Tüfachi ramtun ngüneduamaiñ cüpalechi epu troquiñ mu.
ÜLCATUN 109 Piuqueyehuaimün com piuque mu
