Jesuri manʉnkaʼ gwasiri diwʉ́n nari kwakumana ni. Kaʼseʼ nakuʼ kíngwiri, kuʼnawa ánugwe nari kwana ni (Juan 8:23). Kʉtʉkʉnʉn Jeuwaseʼ gow awʉn nusi, ari pinna ɉuna gawi Niwipáw igunámʉsa una ni. Jesuri Niwipawseʼ a ikʉnʉ nari gow una nʉnnameʼ, aya nʉʼkin Niwipáw Zʉgʉmʉsinʉ ni Bibriáseʼri zakaʼchóʼsʉya ni (Juan 1:14). Jesuri Akákʉseʼ gaʼkʉnamʉ aʼgósʉya nʉnnameʼ, «Gaʼkʉnamʉ» zakaʼchoʼkumʉya ni. Proverbios 8:22, 23, 30; Colosenses 1:15, 16 aʼgwa ú.

Niwipawri Agʉmʉsinʉ Kaʼseʼ gaʼsa una ni. Iʼngwi gáysʉnʉ María zaʼkinuga awiri séymʉke judía neykaseʼ pari kwakumʉngwa reʼgow una ni. Ey ʉwameʼ, akakʉ ikuʼ nʉnna ni (Luka 1:30-35). Kaʼseʼ naka uyeʼri, máykʉnʉ ɉuna unikʉngwa nari naʼna ni: 1) Niwipáw sí nanʉyʉʼkin zawiʉngwasi, 2) chʉwi aʼzanʉngwa nareʼki, Niwipawseʼ aguzʉna neyka unikʉn nusi zawiʉngwasi, awiri 3) kʉzanukuʼ neyka nʉnnameʼ, niwinhaʼgukʉngwasi naʼna ni. Marku 10:45 aʼgwa ú.

Iʼngwi aʼguka awkwari azi gwasi izanʉnno. Iʼngeygwi zasánʉkin nari izasana awkwa gwasi ey awga ni (Éxodo 21:29, 30). Kʉtʉkʉnʉn Niwipawseʼ ikʉ gow uyeʼri, wichʉngwasi awiri achʉná nikʉngwasi neki gauʼ nʉnna ni. Iari eymí ʉwa ná niweʼzanʉnno. Eʼ Adán Jeuwaseʼ keyeʼri, nʉnoʼkuʼ nʉnanʉngeʼri, nʉwicha awʉngwa ni. Gugín noʼsi zoya unʉndi, iwa neki eyki kwʉn nusiza ni (Génesis 2:16, 17; 5:5). Bibriáseʼri, Adán kawi pinna anawichi zweingwa niʼna ni wásʉya ni. Eymí unameʼ, wíchʉkwa awiri niwikʉzʉn awʉngwa niwinreʼgow una ni. Ey anownameʼ, niwinhaʼguka awiza niwikʉɉúnʉya ni. Romanos 5:12; 6:23 aʼgwa ú.

 Ey awʉndi, wichuʼ nanʉkwasi ínʉri niwinhaʼguka awkwéy kʉnanʉnno. Ʉnwicha anawʉndi, mikʉzʉn awkwa neykari ʉnzasana ʉwa zana niga ni. Manʉ́nkaʼri niwikʉzanugagwi nameʼ, iʼngeygwi kʉzánuga neykari izasana awkwéy neki nanuʼ neyka ni. Salmo 49:7-9 aʼgwa ú.

Jesuri manʉnkaʼ nari kʉzʉn ʉwa neki nanuʼ nʉnna ni. Ey ʉwameʼ, akʉzʉn awi neki wichuʼ nʉnna ni, a niwinhaʼgusi wicha una ni. Niwipáw niwinhaguzʉna chwizʉnhasi Agʉmʉsinʉ gaʼsa una ni. Jesuri Akákʉseʼ kʉyʉʼkin noʼkwʉn nusi, niwikʉzánuga awiri wíchʉkwa nigameʼ, niwinhaʼgusi wicha unari niwinhaguzʉna chwizʉnhasi ey niʼna ni. Juan 3:16; Romanos 5:18, 19 aʼgwa ú.

Widew Azi nameʼri Jesukristuri wichʉkwa kʉzʉnʉnno chwa ú

Jesú Kaʼseʼ nʉnkweʼri, ikʉ aʼmʉchi aʼzʉna du aʼkusa, wichana chʉká aʼkusa awiri chʉwi aʼzʉnari igunámʉsa una neykari, tʉkin pari Niwipáw sí aʼzari zoya igunámʉsa awʉngwa neyka chwizʉnhasi ey niʼna ni (Luka 7:20-23). Jesú wicha uyeʼri, Niwipáwseʼri ánugwe nari kuʼnawa kwʉngwasi chʉká anaʼkusa una ni (1 Pedro 3:18). Ey awiri, Akakʉ acheynáy nika awiri iwáʼkʉkwa kʉzarín sakuku reʼgow awi Kaʼseʼ reʼgukʉn nukʉngwasi (Hebreos 10:12, 13). Íwari, Jesuri sakuku nari kuʼnawa reʼgukʉn nusiri, awiri iwa Kaʼseʼri a sí winaʼzʉna ɉinari pin zʉnáy gaʼkʉnamʉ duna neyka wasein nuga ni. Daniel 7:13, 14; Marku 13:10 aʼgwa ú.

Niwipawseʼ Sakuku nʉngwa reʼgow unari, bin zanuʼgwi ikʉ du nikuʼ neyka awiri chʉwi niweʼkúsʉya kʉchunha awʉngwa ni. Ey unigeʼri, Jesú sí ta naʼnó aʼzari aʼnoʼsi zoyari, Kaʼseʼ paraísu ʉnzanika unigeʼri, tanʉ aʼzari kukwéy kʉnanʉngwa ni. Salmo 37:9-11 aʼgwa ú.