• Niwipawseʼ ʉnkaʼgukʉngwa nʉnna. «Nʉʼn kingwi sakuku ʉnkichoʼ awaki nuʼkwin [...;] íkʉri mikʉna awʉn nʉngwa ni awiri kaʼgʉmʉ tʉgʉnsa nánʉkin neykari mazey nanʉngwa ni» (Salmo 2:6, 8).

• Sakuku David zʉkʉnkawʉ ipanʉngwa nʉnna. «Iʼngwi gʉmʉsinʉ kwákuma awaki nugin, iʼngwi gʉmʉsinʉ niweʼwe ukumaki nugin [...]. A reʼgukʉngwa tari tanʉ zanamʉ David zʉkʉnkáwʉseʼ reʼgukʉn nukʉngeʼri, ekʉchonuʼ nanʉngwa ni» (Isaías 9:6, 7).

• Belén kwakumʉngwa nʉnna. «Ma, Belén [...], maseʼ pari nʉsakuku nʉngwa aʼchonʉngwa ni [...,] kaʼgʉ́mʉseʼ tʉgʉnsa reʼgukʉn nukʉngwa ni» (Miqueas 5:2, 4).

• Áykʉnʉ iazari anagwaka awʉngwa nʉnna. «Áykʉnʉ iazari awʉtari aʼzʉna nʉnáy neki aʼchuʼ nʉnkwa nʉnna ni [...], niwikʉzánuga kawi aʼmʉchʉza awi nenʉ́n; agwaka una ni» (Isaías 53:3, 5).

• Chʉká aʼkukumiri zeywamʉ kʉkumʉngwa nʉnna. «Kaʼa ʉnkʉmʉyʉn nʉnʉchusuʼ nanʉngwa ni. Migunamʉ michusuʼ nʉnna pʉkanʉn kineki nʉgwasuʼ nanʉngwa ni [...]; midúrigʉn kiáy áʼkwakin zeyzey zanamʉ kwʉngwa ni» (Salmo 16:10, 11).

Birin pari du reʼgukʉkwéy kʉnʉna neykari Jesukristu nʉʼkin neyka ni. Iʼngwi Niwipáw zʉgunámʉseʼ María kʉyanari: «[Niwipáwseʼri] birin atiɉoma Dawí rey nʉnna zanaʼ gwi rey reʼgawi, atiɉoma zʉ kʉnkawakʉ saʼnigeʼri [...] a reʼguga kinkiri ekʉzagichuʼneyka zʉnʼ nanʉngwa naʼnanno» (Luka 1:31-33).

Jesú Kaʼseʼ nʉnkweʼri reʼgukuʼ nʉnna ni. Ey ʉweʼki, kuʼnawakʉ pari, Niwipawseʼ ʉnkaʼguna nameʼ, ikʉ kʉreʼgukʉn nukʉngwa ni. Iari Sakuku nari du reʼgukʉkwéy kʉnʉna nanʉnno. Bay Kaʼseʼ nʉnkweʼ niʼna neyka sekʉnanʉn.

•   Jesú ikʉ chʉwi ʉnkʉreʼgáwʉya nʉnna ni. Cheyrwa, aʼmía, abiti awiri achʉna ɉina, be zanʉn ne nanʉnki kwa azi aʼzari kwʉya ne nanʉnki igunámʉsa una ni (Marku 6:34; 10:16). Iʼngwi zowkwʉ aʼzʉnaseʼ: «Ey awʉmeʼɉunʉndi, ema wichamʉ ɉweɉweʼna nʉnpin ú» keyeʼri, Jesuseʼ chʉwi kʉnisi du aʼkusa una ni (Marku 1:40-42).

• Jesuri Niwipáw kwa ʉnkaʼkusʉkwasi niwiwía una ni. A yanari: «Niwipaw awiri ɉwisindi eʼ gunti riguzʉnhásʉkwey neki nanuʼ neykari nanuʼkinó». Ayeygwi nʉʼn azi nʉʼnhukumanari meʼzanʉndi, iʼngeygwi ayeygwi awkwa yana ni. Ey awiri, azi niga nʉʼkin nanuʼ nari, arúnhʉkwa awiri azi meʼzánʉkwa neyka Niwipawseʼ awʉtari áʼchwʉya ni niwiwía una ni. Ey ʉwameʼ, Niwipáw kwa ʉnkaʼkusʉkwasi, arunhʉkwaʼba du ʉnsekʉnanamʉ kawa ni (Marku 7:20-22; Luka 6:31; 16:13). Zeyzey kinki meʼzanʉkwásiri, Niwipawseʼ eméy nikʉndi aʼzʉna neyka du ɉwaʼsiri ayéy uzoyamʉ kawa ni, Jesuseʼri waseyna ni (Luka 11:28).

• Jesuri zaguzánʉkwa kinki neyka niwiwía una ni. Asʉyaʼba awiri unisi ʉwáʼbaʼri, ikʉseʼri ayeygwi nikʉnʉngwa aʼzʉnna ni. Bibriaseʼ yeykari: «Ey awi gaʼkʉnamʉ wesʉyʉndi ta kinki i zʉnʼ gun aseyeʼri, ikʉseʼri arunhá gunti winaʼchwana» (Luka 4:32). Awiri «ɉwe miwʉna nʉnkʉri sanusi riguzʉnhásʉkwa», winʉwía una ni. Ey awi, a kingwi anagwakʉngwa reʼgow unazey nari neki, gwamʉ sisa una ni: «Kakʉ, ema ɉinari azi riniʼkwin winaʼzaʼna ey rinigin gwamʉ winʉkʉreʼsow» (Luka 6:27; 23:34).

Jesú nʉʼkin du reʼgukʉkwéy kʉnʉna ni. Ey ʉwameʼ, niwinhaguzari niwingunámʉsa awʉn aʼɉúnʉya ni. Ey ʉweʼki, bin zanʉngeʼ reʼgukʉnpana awʉngwa nanʉnno.