INU NKWEEN̄ 7
Ama Ubọọn̄ Awaji ire keke?
1. Ama Ubọọn̄ Awaji ire keke?
Keke orọ Jisọs ochubọk igbe irere Ogwu Ubọọn̄ ya? —MAK 1:40-42.
Ama Ubọọn̄ Awaji ire mkpulu eyi emen inyọn̄. Mkpulu yi mosan̄a otutuuk mkpulu kechi isan̄a mè irọ inyi nkeek Awaji irọ iso me emen inyọn̄ mè inyọn̄ ijọn̄. Ire ata etip ibe ke Awaji mosa Ama Ubọọn̄ kan̄ isi ikwaan̄ me oniin̄ okup ikeyi. Sọnja mgbọ Awaji monyi bọn ebilene ujot owot inan̄a me lek ata mkpulu. Mkpulu yi morọ inyi otutuuk ene eluk me obọp ge me inyọn̄ ijọn̄.—Fuk Danien 2:44; Matiyu 6:9, 10; 24:14.
Ama geelek ikekikaan̄ ogwu okikpulu. Jioba igobo ogwu Gwun̄, Jisọs Karais, ibe ire Ogwu Ubọọn̄ me Ama Ubọọn̄ kan̄.—Fuk Ichichili 11:15.
Ikpọ fidio What Is Godʼs Kingdom?
2. Keke orọ Jisọs ochubọk igbe irere Ogwu Ubọọn̄ ya?
Jisọs ichubọk igbe irere Ubọọn̄ bak lek ikaan̄ ata ejit mè ikikeke inye me lek inu geelek otatat. (Matiyu 11:28-30) Isọkọ melek si, ikaan̄ unye enenen isasa itap ubọk inyi ene, mije, ibokup me emen inyọn̄ ikikpulu isi ijọn̄ keyi. Eyi ejomobe ọmọ me mkpa, ifofo emen inyọn̄ mè isi ikweek irek me agan̄ ubọk ulum kè Jioba. (Ebi Iburu 10:12, 13) Me ota kan̄, Awaji inyi ọmọ unye isasa ibene ikpulu.—Fuk Danien 7:13, 14.
3. Ebi owa ebegọọk Jisọs ikpulu?
Urum ife egwenbe ebi ikup me mbuban ebegọọk Jisọs ikpulu me emen inyọn̄. (Danien 7:27) Adasi ebi ikup me mbuban egobobe ire ebi otuchieen̄ kè Jisọs igbegbe utoon̄-ejit. Abayaage inire mgbọ keyi Jioba ikpọkpọk ikigobo ebibaan̄ mè ebireen̄ igbegbe utoon̄-ejit kubọk ebi ikup me mbuban. Kubọk Jisọs, ema si ire ebi ejomobe me mkpa inu me ugwem eyi ekwukwu.—Fuk Jọn 14:1-3; Ebi Kọrint Eyi Adasi 15:42-44.
Ire ene inen ebefo emen inyọn̄ ni? Jisọs igwen ema “sọntiik urum arọọn̄.” (Luk 12:32) Otu ifuk kiban̄ ire 144,000. Ema ebegọọk Jisọs ikpulu.—Fuk Ichichili 14:1.
4. Keke obọkọ irek mgbọ Jisọs obenebe mkpulu kan̄?
Mkpulu eyi Ama Ubọọn̄ Awaji ibene me acha 1914. * Adasi inu Jisọs orọbe mgbọ ikanabe Ubọọn̄ ire ilalap Setan mè ebi ijo ekwukwu ikwaan̄ kan̄ isibi me emen inyọn̄ igwook me isi ijọn̄. Setan onanaan̄ ejit enenen mè ibene ikitap ufialek ikana me inyọn̄ ijọn̄. (Ichichili 12:7-10, 12) Karake ya, ufialek bọn ebilene ikpikiwa. Akọn̄, akan̄ ura, esese esese chieen̄ orukan̄, mè sikisik-ijọn̄ ire usini melek “oriọọn̄” okijeen̄ ibe ke sọnja mgbọ Ama Ubọọn̄ ya mobọkọ irek mkpulu inyọn̄ ijọn̄.—Fuk Luk 21:7, 10, 11, 31.
5. Keke ke Ama Ubọọn̄ okirọ me mgbọ keyi?
Sa me ilolook ata etip ikana otutuuk linyọn̄, Ama Ubọọn̄ Awaji okititiin̄ owuwa ebi ene inan̄a me otutuuk ido, ebi ikup me esuuk mè obọp ge. Efie efie ebi ikup esuuk esuuk mekikana ebi ibekup me Ama Ubọọn̄ Awaji eyi Jisọs obore ogwu ubọọn̄. Ama Ubọọn̄ Awaji mobem ema mgbọ mobofiat ijo ukọt keyi me inyọn̄ ijọn̄. Eya orọ, ebi geelek iweek ikakaan̄ oruru inan̄a me lek Ama Ubọọn̄ Awaji mekween̄ ubọk ebere ebi ikisikibot me irak mkpulu kè Jisọs.—Fuk Ichichili 7:9, 14, 16, 17.
Me emen obop acha ge, Ama Ubọọn̄ ya morọ iso otutuuk inu Awaji owuukbe lek ikaan̄ me nkeek irọrọ inyi bọn ebilene. Otutuuk ubọk linyọn̄ yi okupbe mokana paradais. Me ota kan̄, Jisọs monenikana mkpulu Ama Ubọọn̄ ya itap Nte kan̄ me ubọk. (Ebi Kọrint Eyi Adasi 15:24-26) Ire ikaan̄ ogwu oboma ikpakpa inu ofolek Ama Ubọọn̄ Awaji inyi ni?—Fuk Okwa Itọn̄ 37:10, 11, 29.
^ par. 6 Inyi okaan̄ owuwa ukpatu ofolek ubọk nriran Baibul osabe ikpa inu ofolek acha 1914, si fuk ikpa What Can the Bible Teach Us? Me isi ikpa 217-220.
