“በምትጸልዩበት ጊዜ . . . አንድ ዓይነት ነገር ደጋግማችሁ አታነብንቡ።”—ማቴዎስ 6:7

ይሖዋ የተሸመደዱ ጸሎቶችን እንድንደጋግም ወይም ከጸሎት መጽሐፍ ላይ እያነበብን እንድንጸልይ አይፈልግም። ከዚህ ይልቅ የልባችንን አውጥተን እንድንነግረው ይፈልጋል። ነጋ ጠባ አንድ ዓይነት ነገር የሚደጋግም ጓደኛ ቢኖርህ ምን ያህል አሰልቺ እንደሚሆንብህ አስበው። ጥሩ ጓደኞች እውነተኛ ስሜታቸውን በግልጽ ይናገራሉ። በራሳችን ቃላት ተጠቅመን መጸለያችን በሰማይ ያለውን አባታችንን እንደ ጓደኛ እንደምንቀርበው ያሳያል።

“በምትጠይቁበት ጊዜም አታገኙም፤ ምክንያቱም የምትጠይቁት ለተሳሳተ ዓላማ . . . ነው።”—ያዕቆብ 4:3

አምላክ እንድናደርግ ወይም እንዲኖረን የማይፈልጋቸውን ነገሮች እየጠየቅን ለጸሎታችን መልስ እናገኛለን ብለን መጠበቅ የለብንም። ለምሳሌ ያህል፣ ይሖዋ ስግብግብነትንና በዕድል ማመንን በግልጽ አውግዟል። ታዲያ አንድ ቁማርተኛ ዕድል እንዲቀናው ያቀረበውን ጸሎት ሊሰማው ይችላል? (ኢሳይያስ 65:11፤ ሉቃስ 12:15) ይሖዋ እንዲህ ያሉ ጸሎቶችን ይሰማል ብሎ መጠበቅ ምክንያታዊነት የጎደለው ነው! አምላክ ጸሎታችንን እንዲሰማ ከፈለግን፣ የምናቀርበው ጥያቄ በመጽሐፍ ቅዱስ ውስጥ ከሚገኘው የአምላክ ትእዛዝ ጋር የሚስማማ መሆን አለበት።

 “ሕግን ለመስማት አሻፈረኝ የሚል ሰው፣ ጸሎቱ እንኳ አስጸያፊ ነው።”—ምሳሌ 28:9

በጥንት ዘመን አምላክ የጽድቅ ሕጎቹን የሚጥሱ ሰዎች ለሚያቀርቡት ጸሎት መልስ አይሰጥም ነበር። (ኢሳይያስ 1:15, 16) ዛሬም ቢሆን አመለካከቱ አልተለወጠም። (ሚልክያስ 3:6) አምላክ ጸሎታችንን እንዲሰማ ከፈለግን የእሱን ሕጎች ለመታዘዝ የምንችለውን ሁሉ ማድረግ አለብን። ሆኖም ከዚህ በፊት አንዳንድ ስህተቶችን ሠርተን የነበረ ቢሆንስ? ይሖዋ ጸሎታችንን ጨርሶ አይሰማም ማለት ነው? በፍጹም! አካሄዳችንን ለማስተካከልና እሱን ለማስደሰት አቅማችን የፈቀደውን ሁሉ የምናደርግ ከሆነ አምላክ በፍቅር ተነሳስቶ ይቅር ይለናል።—የሐዋርያት ሥራ 3:19