ГВАТЕМАЛАНЫҤ кичинек бир деремнезинде Йомара, оныҥ карындаштары Марсело ло Ивер јадып турган. Агару Бичикти озо Йомара ӱренип баштаган. Карындаштары дезе оныҥ кийнинде кожулган. Је олордыҥ бастыразыныҥ кӧзи кӧрбӧй турган. А Брайльдиҥ шрифтин кычырып билбес болгон. Оныҥ учун олорло Агару Бичик ӱренип турган ака олорго ӱренетен материалды ла Агару Бичиктиҥ ӱлгерлерин бойы кычырып туратан.

База бир кӱч неме, олорго јуунныҥ туштажуларына јӱрерге јеҥил эмес болгон, нениҥ учун дезе јуук ла деген Каандыктыҥ Туразына једерге 40 минут керек. Оныҥ учун ака-эјелер олорго бир де туштажуларды божотпоско болушкан. Је качан олор јакылталар алып баштаарда, јуун олорго јакылталарын эске ӱренип аларга болушкан.

2019 јылдыҥ кӱӱк айында јуунныҥ туштажулары олордыҥ деремнезинде ӧдӱп баштаган. Ол ӧйдӧ ары текши пионерлер болуп турган эш-нӧкӧрлӧр кӧчкӧн. Олордыҥ амадузы — Йомараны, Марселоны ла Иверди Брайльдиҥ шрифтине бичип ле кычырып ӱредери. Је олор бойлоры да бу шрифтти кычырып билбес болгон. Оныҥ учун олор Брайльдиҥ системазын ла бу системага ӱредетен методиканы ӱренерге библиотека баргылаган.

Канча да айдыҥ бажынаҥ олор ӱчӱ Брайльла јакшы кычырарга ӱренип алдылар. Бу олорго кӧгӱс јанынаҥ ӧзӧргӧ болушкан a. Эмди Йомара, Марсело ло Ивер текши пионерлер болуп иштегилеп јат. Марсело болушчы ишчи болот. Олор кӧгӱс ишке эрчимдӱ турушкылайт. Олорды кӧрӱп, јуунныҥ улузы база мынайып ла иштеер кӱӱндӱ боло бергилеген.

Йомара, Марсело ло Ивер бойыныҥ јуунына сӱреен јаан быйанду болот. Йомара айдат: «Иегованыҥ Керечилериле баштапкы ла катап танышканыстаҥ ала олор бисти чын сӱӱшле сӱӱген». Марсело мындый сӧстӧр айдат: «Бисте јуунда сӱреен јакшы најылар бар. Анайда ок бис бой-бойын сӱӱп турган бастыра телекейлик карындаштыкка киредис». Йомара ла оныҥ карындаштары Иегова јерди рай эдип саларын кӧрӧргӧ энчикпей сакып јадылар (Сар. 37:10, 11; Иса. 35:5).