Иисус божоордоҥ озо: «Ончо калыктарга кере болзын деп, Каандык керегинде Сӱӱнчилӱ Јар јер-ӱстине јарлалар. Ол тушта чак тӱгенер» — деп айткан (Матфей 24:14). Је сӱӱнчилӱ јар јер ӱстине јарлалзын деп, нени эдер керек? Иисустаҥ тем алар керек (Лука 8:1).

Улус айылында тушта барадыс. Иисус Бойыныҥ ӱренчиктерин сӱӱнчилӱ јарды айылдар сайын јарлазын деп ӱреткен (Матфей 10:11—13; Апостолдордыҥ ижи 5:42; 20:20). Баштапкы чакта јарчыларда јарлаар јер болгон (Матфей 10:5, 6; 2 Коринфтегилерге 10:13). Бӱгӱнги кӱнде бистиҥ јарлаар ижибис база јакшы башкарылат. Кажы ла јуунга јарлаар јер берилген. Мындый башкару Иисустыҥ«јарлыктазын ла јазап керелезин» деген јакылтазын бӱдӱрер арга берет (Апостолдордыҥ ижи 10:42, ЈТ).

Улус бар јерлерде јарлайдыс. Иисус кӧп улусту јерлерде, темдектезе, талайдыҥ јарадында ла кутуктыҥ јанында улам-сайын јарлаар болгон (Марк 4:1; Иоанн 4:5—15). Оныҥ теминеҥ ӱренип, бис улусла Агару Бичик керегинде куучындажарга албаданадыс: тышкары, улус иштеер јерлерде, амыраар јерлерде керек дезе телефонло до. Анайда ок айылдаштарыска, кожо иштеп турган улуска, сургалда кожо ӱренип турган балдарга ла тӧрӧӧн-тугаандарыска јарлайдыс. Мынайып јарлаганынаҥ улам «ийип јаткан арганданыш керегинде сӱӱнчилӱ јарды» бастыра јердиҥ ӱстинде миллиондор тоолу улус угуп јадылар (Сарын 96:2).

Слер Кудайдыҥ Каандыгы керегинде сӱӱнчилӱ јарды ла келер ӧй керегинде сӱреен јакшы ижемјини кемге куучындаар эдер? Мындый билгирлерди бойыгарда тутпагар. Бу билгирлерди арга ла болзо улуска куучындагар!

• Бастыра јердиҥ ӱстинде кандый јар јарлалар учурлу?

• Иегованыҥ Керечилери Иисустаҥ тем алып нени эткилейт?