LE GBEÐU Nyigban ji le Ebretɔwo gbɔɔ, exwe yoyu tɔnɔ ji nɔ wotɔ agble dede yí ado jinukuwo. Esɔ koɖo septembre koɖo octobre gblamɛ le egbɛ mɛ.

Mɛɖewo kpɔnɔ wleci asɔ hlɛn azanwo (wleci ɖeka nyinɔ ŋkeke 29 alo 30). Mɛbuwo zannɔ ewe asɔ hlɛn azan. Vɔ nɔ wozan wleci yí sɔ drɔ exwe ɖekaɔ, ehwenɔ wu nɔ wozan ewe yí sɔ drɔɛ. Gbɔxwe wo koɖo ve lɔwo asɔgbeɔ, woɖo awa ŋɖeka, ele mɔ woasɔ ŋkeke ɖewo sɔ ta nɔ wleci lɔwo alo woasɔ wleci ɖeka kpi yí taŋfuin gbɔxwe exwe yoyu bu atɔ ji. Nɔ wowɛ ahan gbɔxwe azan hlɛnhlɛn lɔ sɔnɔ koɖo jinukudodo alo jinukusɔsɔ hwenu.

Le Moizi hwenuɔ, Yehowa nu nɔ yi jukɔn mɔ Abib alo Nisan wleci yí anyi tɔtɔmɛ nɔ exwe le ye sɛnsɛn mɛ. Wleci ŋtɔ́ le mars koɖo avril gblamɛ. (Hun. 12:2; 13:4) Woɖunɔ jinukusɔsɔ xwe hɛnnɛ le wleci ŋtɔ́ mɛ.—Hun. 23:15, 16.

Wemanyatɔ Emil Schürer ŋwlɛ do yi wema ɖeka ci yí nyi The History of the Jewish People in the Age of Jesus Christ mɛ mɔ: “Enu ci wokpɔnɔ gbɔxwe yí amɔ woasɔ wleci ɖeka kpi alo wodasɔ kpi le fafɛɖe. Gbɔxwe woaɖu Paki xwe lɔ le Nisan (14 Nisan) wleci mɛɔ, ezan koɖo kede ɖo ahlɛn gaxoxo wive-wive. Vɔ nɔ wokpɔ mɔ le exwe ci yí gbɔgbɔ mɛ, Paki xwe lɔ datɛnŋ avaje do hwenu yí ezan koɖo kede awa gaxoxo wive-wiveɔ, wosɔnɔ wleci witɔntɔ sɔ kpenɔ nɔ exwe ci mɛ wole gbɔxwe Nisan wleci lɔ ava.”

Kɔnŋta cɛwo yí Yehowa Kunuɖetɔwo wanɔ gbɔxwe yí anya azan ci ji yí Axwetɔ Fiɛfi Ŋɖuɖu lɔ aje do. Woɖunɔ Axwetɔ Fiɛfi Ŋɖuɖu lɔ le ŋkeke 14 tɔ nɔ Nisan wleci, sɔ koɖo Ʒuifuwo zan hlɛnhlɛn. Le xexeɛ keŋkeŋ mɛɔ, hamɛwo nyanɔ azan cɛ doŋkɔ xoxoxo. *

Vɔ lé Ebretɔwo wɛ yí nyanɔ nɔ wleci ɖe jikɔ avɔ yí ebu atɔ jiɔ? Egbɛɔ, degbɔnnu o, nɔ èkpɔ azanwemawo ji, telefu alo ɔdinatɛɛ mɛɔ, ànya zeɖeka. Vɔ denɔnɔ fafɛɖe le Bibla hwenu o.

Le Nɔwe hwenuɔ, wleciwo hlɛnnɔ ŋkeke 30. (Gɔnm. 7:11, 24; 8:3, 4) Vɔ le yiyimɛɔ, Ebretɔwo wleciwo denyinɔ ŋkeke 30 duu o. Le Ebretɔwo zanwema mɛɔ, nɔ wleci to le jeŋkwi mɛɔ, wonunɔ mɔ wleci ɖeka tɔ ji. Ecɛ wanɔ ŋkeke 29 alo 30 gbɔxwe wleci bu agbeto.

Davidi koɖo Ʒonatan xokɔ nuxu so wleci nu yí mɔ: “Esɔ yí a nyi wleci yoyu.” (1 Sam. 20:5, 18) Edasɛ mɔ, taŋfuin so exwe sanŋdi 11 tɔ lɔ D.Y. ɔ, wokpɔnɔ wleci sɔ drɔnɔ azanwo kpɔ doŋkɔ. Lé Izraɛliviwo wɛ yí nyanɔ mɔ yewoje wleci yoyu mɛɔ? Mishnah ci mɛ woŋwlɛ Ʒuifuwo se koɖo kɔnuwo do kpedo mì nu mìnya lé wowɛni do. Wema cɛ mɔ Sanhedrin (ci yí nyi Ʒuifuwo kojoɖoxu gangantɔ) yí kpɔnɔ enyɔ lɔ gbɔ hwenu wogbɔ so hwashigbemɛ so Babiloni. Le wleci amadrɛ ciwo mɛ woaɖu exwe leɔ, kojoɖuxu gangantɔ lɔ donɔ go le ŋkeke 30 tɔ lɔ ji nɔ wleci ɖekaɖeka. Mɛ ciwo yí le Sanhedrin lɔ mɛ yí donɔ jeshi hwecinu yí wleci ci yí kplɔɛdo atɔ ji. Lé wowɛ yí nyanɔɔ?

Woɖo amɛwo ɖɛ yí wonɔnɔ afi kɔyijiwo le Ʒerusalɛmu keŋ akpɔkɔ jeŋkwi mɛ ɖaɖa zanmɛ keŋ akpɔ mɔ wleci yoyu va ji ma. Eyi nɔ wokpɔɛɔ, woɖe blɛ nuini nɔ Sanhedrin lɔ. Nɔ Sanhedrin mɛ tɔwo kpɔ kpeɖoji ciwo yí dasɛ mɔ wleci yoyu bu toɔ, wona yí amɛwo nyanɔ. Vɔ nɔ ejiɖoɖwi alo azɔ dɔ yí mɛ ciwo yí kpɔkɔ jeŋkwi mɛ denya mɔ wleci yoyu bu to ɖe, lé woawɛ doɔ? Wonunɔ mɔ wleci ci mɛ yewole vyɛ awa ŋkeke 30, yi goduɔ, yoyu bu atɔ ji.

 Mishnah wema lɔ ɖe mɛ mɔ Sanhedrin mɛ tɔwo tɔnɔ zo do Olivu To ci yí sɔ Ʒerusalɛmu gbɔ ji nɔ amɛwo akpɔ anya mɔ wleci yoyu bu to. Wogbetɔnɔ zo do afi vovowo le Izraɛli lɔ keŋkeŋ yí asɔ dasɛ mɔ yewoje wleci yoyu bu mɛ. Hwenu ɖe goduɔ, wodɔnɔ amɛwo ɖaɖa eju lɔ pleŋpleŋ mɛ nɔ woakaka nyɔ lɔ. Ecɛ dɔ yí Ʒuifu ciwo yí le Ʒerusalɛmu, Izraɛli koɖo texwe buwo nyanɔ zeɖeka mɔ yewoɖo wleci yoyu bu mɛ. Eyi na Izraɛliviwo pleŋ tɛnŋ ɖunɔ wowo zanwo le hwenu ɖekɛ lɔ ji.

Ʒuifuwo zanwema ci wosɔ bɔdo nyɔta cɛ nu akpedo eo nu nakpɔ lé Ebretɔwo drɔnɔ wleciwo, exwe zanwo koɖo agbledede hwenuwo do.