Eŋɛnywiwema Matie Tɔ 7:1-29
7 “Mími kojo ɖoɖo nɔ amɛwo nɔ woŋgbeɖo kojo nɔ mí o.
2 Ðo kojo ci míɖokɔ nɔ amɛwoɔ, eyi lɔ ke woaɖo nɔ mí yí enu ci mísɔ drekɔ nu nɔ amɛwoɔ, eyi lɔ ke woasɔ dre enu nɔ mí.
3 Nyi yí taɖo èkpɔkpɔ ebekwi le ŋkuvi ji nɔ nɔvio, gan yí dènya mɔ acikpu le eoŋtɔ tɔ jiɔ?
4 Lé àwɛ anu nɔ nɔvio mɔ, ‘Maɖe ebekwi le ŋkuvi ji nɔ eo,’ gan yí acikpu trɔgbɔ le eoŋtɔ tɔ jiɔ?
5 Ayemɛnuwatɔ! Ðè acikpu ci yí le ao ŋkuvi ji si keŋ, eyi nàkpɔ nu nywiɖe yí aɖe ebekwi ci yí le nɔvio ŋkuvi ji.
6 “Míŋgbesɔ ŋci yí le kɔkɔɛɖe jo nɔ avuwo alo asɔ míwo jenuwo dɔŋkpe do ŋkɔ nɔ ehawo nɔ woŋgbevagbiji wo koɖo afɔ yí atrɔ adrɛn mí o.
7 “Míkpɔtɔ abiɔkɔ yí woana mí; míkpɔtɔ ajijiɛ yí míakpɔɛ; míkpɔtɔ axoxoɔ ehɔn yí woahuin nɔ mí;
8 ɖo mɛɖekpokpui ci yí biɔkɔ nu akpɔ axɔ, mɛɖekpokpui ci yí jijiɛ nu akpɔɛ yí mɛɖekpokpui ci yí xoxoɔ ehɔn ɔ, woahuin ni.
9 Mi yí le mí mɛ yí nɔ eviɛ biɔ kpɔnnɔ yiɔ, asɔ ekpe jo niɔ?
10 Alo nɔ ébiɔ kpavi yiɔ, asɔ edan jo niɔ?
11 Eyi taɖo nɔ míwo ciwo yí nyi amɛvwinwo nya enunywiwo nana míwo viwo ɖe, míwo Da ci yí le jeŋkwi mɛ dana enunywiwo mɛ ciwo yí biɔɛni sɔwu ba?
12 “Eyi taɖo enushianu ci míjinɔ mɔ amɛwo le wanɔ nɔ yewoɔ, míwo can míɖo awɛni nɔ wo. Le nyɔnɔnwi mɛɔ, enyɔ ci yí Ese lɔ koɖo Enyɔnuɖɛtɔwo nu nɛ.
13 “Míɖo mɛ to agbo hwɛhwɛtɔ nu, ɖo emɔ ci yí kplɔ amɛ yi gugu mɛ keke, agbo yitɔ le gbajaa yí amɛ sugbɔ yí tuikɔ.
14 Vɔ emɔ ci yí kplɔ amɛ yi agbe mɛ hwe, agbo yitɔ le cɔnjwin yí amɛ kankin yí kpɔɛni.
15 “Míkpɔ míwoɖekiwo ji nywiɖe le enyɔnuɖɛtɔ ŋsukantɔwo nu. Wonyi ehla nyinashuwo gan yí sɔ lɛngbɔgbaza do yí vanɔ mí gbɔ.
16 Eku ci wosɛnkɔ yí míasɔ jeshi wo. Wodegbɛnnɔ rɛzɛnwo le ŋjaciwo ji abi figiwo le aŋwakanwo ji gbeɖe o, alo?
17 Ahanke aci nywi sɛnnɔ eku nywi, vɔ yí aci dɔndɔn sɛnnɔ eku dɔndɔn nɛ.
18 Aci nywi datɛnŋ asɛn eku dɔndɔn o, ahanke aci dɔndɔn datɛnŋ asɛn eku nywi hɛnnɛ nɛ.
19 Woaso aci ɖekpokpui ci yí desɛnnɔ eku nywi asɔ dɔ do ezo mɛ.
20 Eyi taɖo eku ci wosɛnnɔ yí míasɔ jeshi wo.
21 “De mɛshiamɛ ci yí nukɔ nɔŋ mɔ, ‘Axwetɔ, Axwetɔ’ yí ayi jeŋkwi mɛ Fyɔɖuxu lɔ mɛ o; vɔ mɛ ci yí wanɔ Edanyɛ ci yí le jeŋkwi mɛ dro ɖekɛ kpaŋ yí ayi mɛ.
22 Amɛ sugbɔ anu nɔŋ gbenɔgbe mɔ: ‘Axwetɔ, Axwetɔ, de ao ŋkɔ mɛ mìnu nyɔ ɖɛ le ba, de ao ŋkɔ mɛ mìnya gbɔngbɔnvɔnwo ti le ba yí de ao ŋkɔ mɛ mìwa enujiŋ sugbɔ le ba?’
23 Eyi naɖo ŋci nɔ wo mɔ: ‘Ŋdejeshi mí ɖɛ o! Mígboteyi ɖaa, míwo ciwo yí dewanɔ do ese ji o!’
24 “Eyi taɖo mɛɖekpokpui ci yí se enyɔ cɛwo ci ŋnukɔ yí wanɔ do wo ji áɖyi ŋsu ŋɖɛnyatɔ ci yí cu yi xɔ do ekpe ji.
25 Eyi eshi gangan ja, etɔwo ɖɔ keke yí gban go, jihɔn ganganwo xo, gan exɔ lɔ demu o; ɖo wocui do ekpe ji.
26 Vɔ mɛɖekpokpui ci yí se enyɔ cɛwo ci ŋnukɔ yí dewa do wo jiɔ, áɖyi ŋsu ŋɖɛmanyatɔ ci yí cu yi xɔ do kɔwu mɛ.
27 Eyi eshi gangan ja, etɔwo ɖɔ keke yí gban go, jihɔn ganganwo xo yí exɔ lɔ mu yí gban hannyahannya.”
28 Ci Yesu nu nyɔ cɛwo ɖegbɔɔ, lé ekpla nu amɛ do jiŋ nɔ amɛahwa lɔ.
29 Ðo ékpla nu lɔ shigbe mɛ ci yí xɔ ŋsɛn so Mawu gbɔ nɛ yí dewɛ shigbe esekplamɛtɔwo nɛ o.
