Eŋɛnywiwema Matie Tɔ 28:1-20
28 Le Sabati godu, le ŋkeke ŋkɔtɔ ji nɔ kwɛshila lɔ ci eŋ tɔ kekeɔ, Mari Magdalɛnu koɖo Mari ɖetɔ lɔ va mɔ yewoakpɔ yɔdu lɔ.
2 Eyi nyigban hunhun sɛnsinɖe, ɖo Yehowa* dɔla ɖyi so jeŋkwi mɛ yí vabli kpe lɔ so yɔdu lɔ nu yí nɔ nyinɔnɔ do ji.
3 Dɔla lɔ zezeɛ shigbe ejiɖezo nɛ yí yi wu ɣe pepepe.
4 Jika gangan ɖeka so sɔja ciwo yí cɔcɔ yɔdu lɔ yí wohunhun yí vale shigbe amɛkukuwo nɛ.
5 Vɔ mawudɔla lɔ nu nɔ nyɔnu lɔwo mɔ: “Míŋgbevɔn o, ɖo ŋnya mɔ Yesu ci wokan do aci nu yí míjijiɛ.
6 Degbele lɛ o, ɖo wofuin so ku shigbe lé enui nɛ. Mívakpɔ fini wosɔ mlɔ sa.
7 Taɖo míɖe blɛ ayi nu nɔ yi nukplaviwo mɔ, wofuin so amɛkukuwo mɛ yí eje ŋkɔ nɔ mí ɖedo nɔ Galile. Enɔ míakpɔɛ le nɛ. Eŋɛ cɛ ŋva yí ado nɔ mí.”
8 Eyi taɖo woɖe blɛ yí so le yɔdu lɔ tu. Wovɔnvɔn, gan eji gbejɔkɔ wo sugbɔ yí wolɔ ju ɖedo avayi do ŋɛ nɔ yi nukplaviwo.
9 Zeɖeka tɔntɔn Yesu do go wo yí nu nɔ wo mɔ: “Ŋdogbe nɔ mí!” Wogbosɔɛ yí lé yi fɔwo yí bubɔ ni.
10 Eyi Yesu nu nɔ wo mɔ: “Míŋgbevɔn o! Míyi ayi nu nɔ nɔvinyɛwo nɔ woayi Galile. Enɔ woakpɔŋ le nɛ.”
11 Hwenu wole mɔ lɔ ji yikɔɔ, sɔja ciwo yí cɔ yɔdu lɔ ɖewo yi ju lɔ mɛ yí vayi nu ŋciwo pleŋ yí jɔ nɔ avɔnsatɔwo gawo.
12 Ci avɔnsatɔwo ga lɔwo koɖo jumɛgawo do go yí li kpɔ ɖegbɔɔ, wona gajunho sugbɔ sɔja lɔwo
13 yí mɔ: “Mínu mɔ, ‘Yi nukplaviwo va zanmɛ yí vafi hɛn yi hwenu mìle alɔn dɔnkɔ.’
14 Eyi nɔ ejujikpɔtɔ lɔ siɔ, mìadre nyɔ lɔ mɛ* ni. Taɖo míŋgbevɔn o.”
15 Woxɔ gajunho lɔwo yí wɛ shigbe lé wonui nɔ wo nɛ. Enyɔ lɔ gban kpedo Ʒuifuwo mɛ keke vaɖo egbɛ.
16 Vɔ enukplavi 11 lɔwo yi Galile, le eto ci ji Yesu mɔ yewoado go do.
17 Ci wokpɔɛɔ, wobubɔ ni, vɔ mɛɖewo dekando ji o.
18 Yesu gbosɔ wo yí nu nɔ wo mɔ: “Wosɔ ŋsɛn ciwo pleŋ yí le jeŋkwi mɛ koɖo nyigban ji naŋ.
19 Eyi taɖo míyi, ayi kpla nu amɛwo le jukɔnwo pleŋ mɛ nɔ woatrɔ anyi nukplaviwo. Míʒin wo do shi mɛ le Eda, Evi koɖo gbɔngbɔn kɔkɔɛ lɔ ŋkɔ mɛ.
20 Míakpla nu wo nɔ woawa do enyɔ ciwo pleŋ ŋnu nɔ mí ji. Ŋle koɖo mí ŋkekewo pleŋ keke sɔyi xexe* lɔ vɔvɔnu.”
Gɔnmɛnuŋwlɛnŋwlɛn
^ Kpɔ Enumɛɖeɖewo A5.
^ Yi gɔnmɛɖeɖe tiin: “mìawɛ keke akando ji.”
^ Kpɔ Enyɔgbe Veviwo mɛ Ðeɖe.
