Eŋɛnywiwema Luiki Tɔ 5:1-39
5 Gbeɖekaɔ, Yesu le te le Genezarɛti tan* tu yí le Mawu nyɔ nukɔ yí amɛwo cuin yí ɖokɔ to yi.
2 Eyi ekpɔ tɔjihun amɛve ɖekawo le etan lɔ tu, vɔ eɖɔdatɔwo to le wo mɛ yí vayi klɔkɔ wowo ɖɔ̀wo.
3 Éde tɔjihun ɖeka mɛ, tɔjihun cɛ nyi Simɔ tɔ. Eyi enu ni mɔ yɛ le kui so agoji hwɛɖeka. Énɔ nyinɔnɔ do mɛ yí tɔ enu kplakpla amɛahwa lɔ.
4 Ci exo nuxu ɖegbɔɔ, énu nɔ Simɔ mɔ: “Ku tɔjihun lɔ yi fini yí cito nɔ míada míwo ɖɔ̀wo yí alé kpavi.”
5 Vɔ Simɔ nu do nu ni mɔ: “Enukplamɛtɔ, mìdo gbla keke le ezan lɔ pleŋ mɛ gan mìdelé ŋɖe o, vɔ ci ènu ahan ɔ, nada eɖɔ̀ lɔwo.”
6 Ci woda eɖɔ̀ lɔwoɔ, wolé kpavi sugbɔ gbiŋ keke wowo ɖɔ̀ lɔwo tɔ vuvu.
7 Eyi wowa alɔ̀ nɔ wowo kpena ciwo yí le tɔjihun ɖetɔ lɔ mɛ mɔ wo le va kpedo yewo nu yí wova yí lɔ kpavi kɔ do tɔjihun amɛve lɔwo mɛ yí woɖɔ keke tɔ eshi gɔnmɛ yiyi.
8 Ci Piɛ kpɔ ŋcɛɔ, éje klo ji do ŋkɔ nɔ Yesu yí mɔ: “Axwetɔ so le ŋgbɔ, ɖo agɔjetɔ yí ŋnyi.”
9 Ðo lé wolé kpavi do jiŋ nɔ yɛ koɖo mɛ ciwo yí le koɖi sugbɔ.
10 Éjiŋ nɔ Ʒaki koɖo Ʒan, Zebede vi ciwo yí nyi Simɔ kpenawo hɛnnɛ. Yesu nu nɔ Simɔ mɔ: “Mi vɔnvɔn. So egbɛ jiɔ, agbetɔwo yí àlénɔ agbuagbu.”
11 Eyi taɖo woku tɔjihun lɔwo va agoji yí gbe wowo nuwo pleŋ ɖɛ keŋ yí kplɔɛ do.
12 Hwebunu ci Yesu le eju lɔwo ɖeka mɛɔ, ŋsu ɖeka ci ekpodɔ̀ xɔ gotu nɔ pleŋ le nɔ. Ci ekpɔ Yesu ɔ, écɔn ŋmɛ anyi yí ɖe kuku ni mɔ: “Axwetɔ, ŋnya mɔ nɔ èlɔn ɔ, àwɛ yí namɛ́ dru.”
13 Yesu do alɔ̀ ɖaɖa yí tɔ alɔ̀ yi yí nu mɔ: “Ŋlɔn! Gbaza le mɛ́ nɔ eo.” Eyi kpodɔ̀ lɔ vɔ ni zeɖeka le afɔdumɛ.
14 Eyi edo se nɔ ŋsu lɔ mɔ yɛŋgbenu nɔ mɛɖe o yí mɔ: “Vɔ so yi dasɛ eoɖeki nɔ avɔnsatɔ yí ana ŋciwo Moizi mɔ wo le na, ɖo gbaza mɛ nɔ eo, keŋ nɔ avɔnsatɔwo anya mɔ edɔ̀ mi nɔ eo.”
15 Vɔ amɛwo fɔn yí xoxoɔ nuxu so Yesu nu doji yí amɛahwa ganganwo va bɔnɔ keŋ ase yi nyɔwo nɔ agbeda edɔ̀wo nɔ wo.
16 Vɔ blaŋblaŋ ɔ, éyinɔ zogbejiwo vayi donɔ gbe ɖaɖa.
17 Gbeɖeka ci ekplakɔ nu amɛwoɔ, Farizitɔwo koɖo mɛ ciwo yí kplanɔ Ese lɔ amɛwo so Galile, Ʒude koɖo Ʒerusalɛmu kɔxwiwo pleŋ mɛ yí va keŋ yí le nyinɔnɔ yí Yehowa* na ŋsɛn yi nɔ ada dɔ̀ nɔ amɛwo.
18 Eyi mɛɖekawo kɔ ŋsu ɖeka ci yí kplibɔ do ba ji vɛ yí woteteɛkpɔ mɔ yewoahin yi fini Yesu le keŋ asɔ da do ŋkɔ ni.
19 Vɔ wodekpɔ fini woato ayi o, ɖo amɛwo ɖɔ nɔ kpiŋ. Eyi wode exɔ lɔ tamɛ yí ko exɔ lɔ do akpa ɖeka yí wosɔ kplibɔtɔnɔ lɔ koɖo eba ci ji ele to nɔ yí sɔ da do dodomɛ nɔ mɛ ciwo yí le ŋkɔ nɔ Yesu.
20 Ci ekpɔ xɔse ci woɖoɔ, énu nɔ kplibɔtɔnɔ lɔ mɔ: “Ðajɛ, wosɔ ao nuvɔnwo ke eo.”
21 Eyi esekplamɛtɔwo koɖo Farizitɔwo tɔ nunu nɔ wowonɔnɔwo mɔ: “Mi yí nyi cɛ yí nunuɔ enyɔkpotu ahan ɔ? Mi yí atɛnŋ asɔ nuvɔn ke amɛ sɔ zeto Mawu nuɔ?”
22 Vɔ Yesu nya enyɔ ci wonunuɔ yí nu nɔ wo mɔ: “Nyi míbubuɔ kpɔ le míwo jiwo mɛɔ?
23 Nɔ woamɔ, ‘Wosɔ ao nuvɔnwo ke eo,’ alo ‘So je te azɔn zɔnlin’ ɖe, ci nunu yí le fafɛɖe wuɔ?
24 Gan nɔ míanya mɔ Agbetɔvi lɔ ɖo acɛ le nyigban ji yí asɔ nuvɔnwo ke amɛɔ, . . .” énu nɔ kplibɔtɔnɔ lɔ mɔ: “Ŋnukɔ nɔ eo mɔ, so je te, sɔ ao ba yí ayi axomɛ.”
25 Eyi mɛ ci yí xo kplɛ lɔ so je te le ŋmɛ nɔ wo yí sɔ ŋci ji emlɔ anyi do yí kpe axwe yí kanfukɔ Mawu.
26 Ékpaca wo pleŋ sugbɔ yí jika so wo yí wokanfukɔ Mawu mɔ: “Mìkpɔ enujiŋwo gbɛ!”
27 Le yɛ goduɔ, évayikɔ yí kpɔ tagajɔtɔ ɖeka ci yí tɔ mɔ Levi yí enɔ nyinɔnɔ do tagajɔxu yí enu ni mɔ: “Kplɔ ŋdo.”
28 Eyi etashi enuwo pleŋ ɖɛ yí so yí kplɔɛ do.
29 Levi vaɖu azan gangan ɖeka nɔ Yesu le yi xomɛ. Tagajɔtɔwo sugbɔ gbiŋ yí va yí mɛbuwo can va yí ɖukɔ nu* koɖo wo.
30 Eyi taɖo Farizitɔwo koɖo wowo sekplamɛtɔwo tɔ enyɔ toto yí biɔ yi nukplaviwo se mɔ: “Nyi yí taɖo míle enu ɖukɔ yí le aha nukɔ koɖo tagajɔtɔwo sɔ kpe nɔ nuvɔnwatɔwoɔ?”
31 Yesu ɖo ŋci nɔ wo mɔ: “Mɛ ciwo nu agan le deʒan doto o, vɔ dɔ̀nɔwo yí ʒan doto.
32 Denyi amɛjɔjɔɛwo yɔgbe ŋva o, vɔ nuvɔnwatɔwo yɔ, keŋ nɔ woatrɔ ji mɛ.”
33 Wonu ni mɔ: “Ʒan nukplaviwo blanɔ nu blaŋblaŋ yí wanɔ kwifanwo yí Farizitɔwo nukplaviwo can wɛni ahan, gan yí ao nukplaviwo ɖuɖuɔ nu yí nunuɔ.”
34 Yesu nu nɔ wo mɔ: “Míatɛnŋ aʒin mɛ ci yí jikɔ aɖe nyɔnu xlɔwo ji mɔ wo le bla nu hwenu ekpɔtɔ le wo gbɔ ba, alo?
35 Vɔ gbeɖekaɔ, woavakplɔ mɛ ci yí jikɔ aɖe nyɔnu lɔ so wo gbɔ. Eyi woabla nu gbenɔgbe.”
36 Égbedo labalu bu nɔ wo mɔ: “Mɛɖe dekannɔ le avɔn yoyu nu yí sɔ tanɔ awu xoxwi o. Nɔ wowɛ ahan ɔ, avɔn yoyu lɔ anyɔ so awu xoxwi lɔ nu yí avɔn yoyu kankan lɔ dagbesɔgbe koɖo xoxwi lɔ o.
37 Ahanke mɛɖe desɔ vɛn yoyu kɔnɔ do elangbazagodu xoxwi mɛ nɛ. Nɔ wowɛ ahan ɔ, vɛn yoyu lɔ awó elangbazagodu lɔ yí akɔŋgbe, eyi elangbazagodu lɔ adahɛn.
38 Vɔ elangbazagodu yoyu mɛ woɖo asɔ vɛn yoyu kɔ do.
39 Mɛɖe denunɔ vɛn xoxwi ɖegbɔ keŋ agbejijiɛ yoyutɔ o, ɖo énunɔ mɔ, ‘Xoxwitɔ lɔ nyɔ.’”
