Agyiahʋnlɩmaa mɔɔ bɛ avinli ɩáyɛ baaba ta ka kɛɛ, sɛ yeyiaki agyiahʋnlɩ a, yɛ ɩkɔwʋwa yɛ nnwuakula yɩ a. Na ɩ́dɩ baaba kɛɛ bɛ nɩɩ awʋvʋlɔ mɔɔ bɛáyɛ ɔkʋ̃ kɔwʋwa. Mɩnla nɔhʋanlɛ yɛ ɩwɔ odwokɔ eyi nu a?

•  Kɛ agyiahʋnlɩyiakilɛ kã nnwuakula se a?

•  Sɛ miyiaki agyiahʋnlɩ a, asʋ̃ mu nnwuakula anyɩ kele a?

•  Sɛ yeyiaki agyiahʋnlɩ na sɛ yɛkɔ zʋlɔ yekila nnwuakula yɩ sʋ̃ ɛ?

•  Asʋ̃ ɔhʋanɩba wɔ kɛnɩ mɔɔ ɩkɔhʋla ɩkɔwʋwa yɛ ma yekeziyeziye yɛ agyiahʋnlɩ nu ndwokɔ a?

 Ɛbɩbɛlɛnu kile kɛɛ agyiahʋnlɩyiakilɛ dide nnwuakula paa. Nnwuakula mɔɔ bɛ awʋvʋlɔ yiaki agyiahʋnlɩ nɩ:

•   fa ɛya, adwɩnɩndwɩnɩ hyɛ bɔ zʋ na benyia adwɩnɩ nu adimakɛlɛ

•   da subanɩ tanɩ ali

•   bɛáwɔ mmɔdɩnɩ wɔ sukuulu anzɛnyɩɩ beyiaki po

•   ɩáhyɛ nɩ bɔ nwʋ ba bɛ

 Dɔkʋ̃ sʋ̃, nnwuakula sʋ̃maa bu bɔ nwʋ fɔ kɛɛ bɛzabɛ yɛ bɛmanlɩ bɛ awʋvʋlɔ yiakili agyiahʋnlɩ a, na bɔnwʋnlɩ yɩ ndɛ a, ankɩ bezili yi munwa ndɛndɛ.

 Agyiahʋnlɩyiakilɛ kʋla kã nnwuakula mmɩlɩ po mɔɔ benyi nɩ, na ebiye a, bɛkɛdɩ nɣanlɩ kɛɛ mfasʋ íni bɔ zʋ. Akʋ̃ sʋ̃, ebiye a, bɛkɛdɩ nɣanlɩ kɛɛ bɔlɔ́kʋla bekele abiyela bekeli. Biyekʋ̃ sʋ̃, ɩkɔhʋla ɩkɛma bɛzabɛ sʋ̃ bekeyiaki bɛ agyiahʋnlɩ mmɩlɩ mɔ beyiyiaa ndwokɔzɩzɩbɛ wɔ bɛ agyiahʋnlɩ nu nɩ.

 Nɔhʋanlɛ odwokɔ: Ɩwɔ numɔ kɛɛ mbiyemmɔ sunzu kɛɛ agyiahʋnlɩyiakilɛ kɔhʋla kɔwʋwa bo nnwuakula dɩyɛ, naasʋ̃ ɛbɩbɛlɛnu kile kɛɛ ɩáyɛ nɔhʋanlɛ. Baalɛ be mɔɔ bɔfʋlɛ yɩ Penelope Leach mɔɔ ɩnwɩ̃ wɔ nnwuakuladɩdɩlɛ nu nɩ hanlɩ kɛɛ, “Agyiahʋnlɩyiakilɛ kʋla ma nnwuakula bɛ ɛbɩlawɔlɛ yɛ basaa. a

 Mɔɔ Bayɩbʋlʋ yɩ kã: “Máma abiyela ɩdwɩnɩ yɩzayɩ nkʋ̃ yɩ bʋwɔyɛlɛ nwʋ, na ɩdwɩnɩ́ yɩ ɔhɔnwʋmmɔ sʋ̃ bɛ dɩyɛ nwʋ.”—Fɩlɩpɩmaa 2:4.

 Abiyemmɔ kɛhã kɛɛ nyɛ. Ma ɩwʋwá wʋ adwɩnɩ nu kɛɛ, mɔɔ awʋvʋlɔ behyinyia nɩ, kɛ mɛyɩ la yɛ nnwuakula yɩ sʋ̃ behyinyia a. Mɔɔ isunzuu agyiahʋnlɩyiakilɛ nwʋ nɩ pɛ kɛɛ ɩbɔ ɛbɩla fʋlɔ. Naasʋ̃ nnwuakula sʋ̃maa pɛ kɛɛ bɛ nɩɩ bɛ awʋvʋlɔ bʋwa bɔ nu, bɛábɛ kɛɛ bɛ awʋvʋlɔ bo nu kɛdɩdɩ.

 Mmɩlɩ mɔ beɣiziaɣizialɩ nnwuakula mɔɔ bɛ awʋvʋlɔ yiaki agyiahʋnlɩ ndwokɔ nɩ, buuku be mɔɔ bɔfʋlɔ yɩ The Unexpected Legacy of Divorce nɩ hanlɩ kɛɛ: “Odwokɔ eyi dɩ nɔhʋanlɛ petee: nnwuakula yɩ bɛáhã kɛɛ bɛ anyɩ de, mfomi bedi ɛyɛkɛ na bɛkã kɛɛ, ‘Eɣile mɔ mɩ awʋvʋlɔ yiakili agyiahʋnlɩ nɩ, nɩ ɩyɛ mɩ kɛɛ mɩ ɛbɩlawɔlɛ ɣa awielɩyɛ.’” Buuku yi zialɩ hanlɩ kɛɛ, bɛtɩ nɣanlɩ kɛɛ “béni banɩwɔlɛ bela wɔ oyuwadɩ yɩ nu iluwakɛɛ mmenii anwɩ̃ mɔɔ bɔkɔwɔ bɔ nwʋ banɩ nɩ, bo nu dɩdɩ.”

 Nɔhʋanlɛ odwokɔ: Ɩyɛ sɩ ɩma nnwuakula kɛɛ bɛ anyɩ kele mmɩlɩ mɔ bɛ awʋvʋlɔ yiaki agyiahʋnlɩ nɩ.

 Mɔɔ Bayɩbʋlʋ yɩ kã: “Sunzuma mɔɔ iwuwu nɩ ɩma enii yɩ anwʋzɩzɩbɛ zʋ ɩtɩ.”—Ɛɣɛlɛwulɛ 17:22.

 Agyiahʋnlɩmaa be mɔɔ beyiaki nɩ bɔ mmɔdɩnɩ kɛɛ bekehila bo nnwuakula dɩkɛɛ mɔɔ bɛla nwʋ la bɛda kɛɛ agyiahʋnlɩmaa. Naasʋ̃ eyi ɩyɛlɛ ɩ́la azɩ. Ɛbɩbɛlɛnu da yɩ ali kɛɛ, mbɔmɩ sʋ̃maa nɩ, agyiahʋnlɩmaa mɔɔ beyiaki nɩ:

•   bɛányia mmɩlɩ bɛma bo nnwuakula

•   ɩsʋnɩ mɔɔ bo nu bela kile kuakula yɩ

•   iluwakɛɛ be ti ɔwʋwaba bu bɔ fɔ anzɛnyɩɩ bɛ vɛ nɩ ti, bɛma nnwuakula yɩ yɛ mɔɔ bɛpɛ yɩ

 Kuakula mɔɔ yɩ awʋvʋlɔ yiaki agyiahʋnlɩ nɩ kɔhʋla kɛdɩ nɣanlɩ kɛɛ nwʋmɔ iáhyinyia kɛɛ ikediye yɩ awʋvʋlɔ dɔkʋ̃. Iluwakɛɛ, yɩ awʋvʋlɔ hanlɩ ndamɩ kɛɛ bɔkɔwʋwa bɔkɔwɔ nu naasʋ̃ bɛákʋla bedidili ɔzɔ anʋhʋba yɩ zʋ. Kuakula yɩ kɔhʋla kɛhã kɛɛ, ‘Mɩnla ti mɔɔ ɩsɛ kɛɛ mitiye bɛ a?

 Nɔhʋanlɛ odwokɔ: Ɩyɛ sɩ ɩma agyiahʋnlɩmaa mɔɔ beyiaki nɩ kɛɛ bɔkɔwɔ numɔ bekehila bo nnwuakula. Naasʋ̃ agyiahʋnlɩyiakilɛ kʋla ma nnwuakula nwʋ amanɩyɛ sʋ̃maa.

 Mɔɔ Bayɩbʋlʋ yɩ kã: “Mʋnlʋmmɔ awʋvʋlɔ, máma bɛyɛ bɛ mma hihe hihe ma bɛ apadi ikolɔ.” Kolosiyiamaa 3:21.

 Ide egyima ɛzɩzɩbɛ na ama abiye ɩawɔ ɛbɩla fʋlɔ tʋ mmɩlɩ mɔ iyiaki agyiahʋnlɩ nɩ. Mbɔmɩ sʋ̃maa nɩ, ɩkɛyɛ baaba kɛɛ bɔkɔwɔ mmɔdɩnɩ bekeziyeziye bɛ avinli mfomi. The Case for Marriage buuku yi hanlɩ kɛɛ, “Sɛ agyiahʋnlɩ be ɩáhɔ bʋwɔ a, mɛyɩ iáhile kɛɛ, ɔzɔ la yɛ ɩkɛyɛ eɣile bela a. Agyiahʋnlɩmaa mɔɔ ɩávalɩ nwʋ kɛɛ bɛ anyɩ iále naasʋ̃ bɔkɔ zʋlɔ bɔbʋwa nɩ, mmɩlɩ ɩkɔlɩ zʋlɔ nɩ, benyia anyɩnlɩlelɛ.” Nɔhʋanlɛ odwokɔ yɛ lɛ kɛɛ, sɛ agyiahʋnlɩmaa bɛkã bɔbɔ nu a, ɩma nnwuakula yɩ bɛ anyɩ de.

 Eyi iáhile kɛɛ, abiye lɔ́kʋla keyiaki yɩ agyiahʋnlɩ kyɩ̃. Bayɩbʋlʋ yɩ po kã kɛɛ, sɛ abiye yɩ nwʋkãvʋlɔ bɔ adwomanlɩ a, sa ɩkʋla iyiaki yi. (Matiyu 19:9) Naasʋ̃ Bayɩbʋlʋ yɩ siã kã kɛɛ, ‘nɣɛlɛbɛvʋlɔ dwɩnɩ agyiakɛ bela mɔɔ ikodu nɩ nwʋ.’ (Ɛɣɛlɛwulɛ 14:15) Agyiahʋnlɩmaa mɔɔ beyiyiaa ndwokɔzɩzɩbɛ mɔɔ besii pɔkɔ kɛɛ bekeyiaki agyiahʋnlɩ nɩ, ɩsɛ kɛɛ bɔdwɩnɩ nwʋmɔ bʋwɔ paa mɔɔ ɔhawʋ mɔɔ ɩkɛva ɩkɛɣa bo nnwuakula zʋ kɩnla nwʋ.

 Eyi sʋ̃ iáhile kɛɛ, bʋwa agyiahʋnlɩ yɩ nwʋ nkʋ̃ʋ̃ mɔɔ olótu agyiakɛ bela. Bayɩbʋlʋ yɩ fʋlɔdulɛ kɔhʋla kɔwʋwa ohunɛmaa nɩɩ ɛyɩlɛmaa ma bekenyia subanɩba mɔɔ ɩkɔhʋla ɩkɔwʋwa bɛ ma bekegyina ndwokɔzɩzɩbɛ munwa na bɛanyia anyɩnlɩlelɛ wɔ bɛ agyiahʋnlɩ nu. Ɩáyɛ nnwʋánlɩ kɛɛ fʋlɔdulɛ eyimmɔ wɔ Bayɩbʋlʋ yɩ nu, iluwakɛɛ yɩ Ɛhɛlɛvʋlɔ mɔɔ ɩdɩ Gyehova nɩ yɛ ɩhyɩhyɛlɩ agyiahʋnlɩ a.—Matiyu 19:4-6.

 Mɔɔ Bayɩbʋlʋ yɩ kã: “Mamɩ Gyehova, mamɩ yɛ lɛ wʋ Nyamɩnlɩ, mɔɔ ikilehile wʋ ma isi wʋ bʋwɔ.”—Ayɩzaya 48:17.