Hulda Idwuli Yɩ Bʋtayɩ Nwʋ
NƖ YE mmeliyema mmaalɛ asã be da pamɩ ɛgyɩkɩ̃ɩ̃ be mɔɔ bɔfʋlɔ yɩ Sangir Besar zʋ wɔ Indonesia. Alʋbɔ be mɔɔ idua nu nɩ, nɩ bɛyɛ egyima bɔbɔ numɔ wɔ ngyemvile yi munwa. Nɩ mmenii zi bɔ bʋwɔ paa wɔ pamɩ yɩ zʋ, iluwakɛɛ nɩ bɛkã odwokɔba yɩ na bɔbʋwa mmenii ma bɛtɩ Bayɩbʋlʋ yɩ tʋ. Naasʋ̃ ɔzɔ mmɩlɩ yɩ, nɩ bɛyɛɛ egyima fʋlɔ be.
Sangir Besar pamɩ mɔɔ ɩwɔ Indonesia manlɩ tisʋlɔ
Nɩ bɔkɔ nzulo yi nu bɔkɔ bɛsɩza awʋlɔ nɣezile bɛba ngyemvile yi munwa. Nɩ awʋlɔ yɩ be wɔ kɛnɩ a, yi kezile kɛyɛ kɛɛ bɔɔlʋ. Sɛ bɛfa bɛba a, nɩ bɔwʋwa abaalɛ ayuwa zʋ bɛva hama bobuko awʋlɔ yɩ ngyɩkɩ̃ɩ̃ ngyɩkɩ̃ɩ̃. Sɛ bowie yi a, nɩ bɛva awʋlɔ yɩ bogua bokiti nu bɔzʋwa bɔhɔ dɩka mɔɔ bɛda nɩ. Akʋ̃ bɔsʋwa awʋlɔ yɩ bokua ahodoku nɣezile nu na bɛava bɛagua ahaalɩ nɣezile nu na bɛava bɛahɔ bɛayɛ kaalɩ ɔhʋanɩ.
Hulda, ɩsɩzaa awʋlɔ wɔ ngyemvile yi munwa
Ɔzɔ mmeliyema mmaalɛ yɩ, bo nu ɔkʋ̃ yɛ lɛ Hulda. Nɩ yɩ bʋwabɩlɛ ma ɔhʋanɩ yɩ ma ɩfa mmɩlɩ sʋ̃maa ɩyɛ ɔzɔ egyima yɩ be ɩtɛla nɣalɩyɛ maa yɩ. Mbɔmɩ sʋ̃maa nɩ, nɩ ɩfa ɔzɔ ozukua yɩ ikila yɩ abusunwa. Naasʋ̃ kakɩ yɩ, nɩ ɩpɛ kɛɛ isiye ozukua yɩ be na ɩava ɩayɛ dɩyɛ fʋlɔ. Nɩ ɩpɛ kɛɛ ɩtɔ tabɩlɛtɩ na ama ɩahʋla ɩava JW Library® iali egyima. Nɩ Hulda zi kɛɛ vidiyo azʋlɔtʋ nɩɩ nninyeni mɔɔ ɩwɔ JW Library® yɩ zʋ nɩ, ɩkɔwʋwa yɩ ma yɩ dasɩlɛlilɛ kodu mpʋnɩ na ɩadɩ Bayɩbʋlʋ yɩ tʋ bʋwɔ.
Nɩ nwɔnɩ bela Hulda ɩfa dɔnɩhwɩlɩ anwɩ̃ ipuko awʋlɔ. Ɩvalɩ eziyianɩ ɔkʋ̃ nɩɩ ɔfʋã ɩyɛlɩ ɔzɔ egyima yɩ na inyianlɩ awʋlɔ kɛyɛ kaalɩ ɛgyɩkɩ̃ɩ̃ ɔkʋ̃. Aɣinzi yi, inyianlɩ ozukua mɔɔ ɩkɛva ɩkɔdɔ tabɩlɛtɩ yɩ.
Hulda mɔɔ yɩ tabɩlɛtɩ wɔ yɩ sa nu
Hulda hanlɩ kɛɛ, “Ɩwɔ numɔ kɛɛ nɩ awʋlɔ mɔɔ mupuko nɩ ɩma mɩfɛ na mʋ nwʋ fʋvʋ mɩ dɩyɛ, naasʋ̃ mmɩlɩ mɔ mʋdɔlɩ tabɩlɛtɩ yɩ na mʋnwʋnlɩ kezimɔ ɩbʋwaa ma mɩ dasɩlɛlilɛ kodu mpʋnɩ na mʋkʋla misiyeziye mʋ nwʋ bʋwɔ mɩma dɩyɛzumanlɛ nɩ, ɩákyɛ kʋlaa yɛ mɩ ɛɣɛɛlɛ vili mɩ ɛyɛkɛ yɩ munwala a.” Ɩhanlɩ sʋ̃ kɛɛ, tabɩlɛtɩ yɩ wʋwalɩ mɩ mmɩlɩ mɔ Covid-19 adimakɛlɛ yɩ wɔlɩ yɩ tʋ nɩ, iluwakɛɛ nɩ yɛyɛ dasɩlɛlilɛ nɩɩ dɩyɛzumanlɛ munwala wɔ foonu zʋ. Ɩyɛ yɛ fɛ paa kɛɛ Hulda idwuli yɩ bʋtayɩ nwʋ.
