OZUMALƐDƖYƐ 34

Kɛ Yɛkɛyɛ Na Yɛahile Kɛɛ Yɛdɔ Gyehova a?

BƆ́

Ɔzʋmɩ kɛɛ ɔwɔlɩ yɩ tʋ kɛɛ osumaa Bayɩbʋlʋ yɩ, ɛdɩ nɣanlɩ kɛɛ eɣike Nyamɩnlɩ a? Ɛkɛbɛ kɛɛ ɔkɔhɔ ɔzʋlɔ ɛkɛhyɛ ɛ nɩɩ yɩ ɔhɔnwʋvalɛ yi nu ɛzɩzɩbɛ a? Sɛ ɔzɔ a, mɛyɩ kakɛ kɛɛ sɛ Gyehova ɩnwʋ kɛɛ ɔlɔlɛ mɔɔ ɔwɔ ma yɩ nɩ inyii a, mɛyɩ sʋ̃ ɩkɔlɔ wʋ na iahila wʋ. Kɛ ɛkɛyɛ na wʋama Gyehova ɩanwʋ kɛɛ ɔdɔ yɩ a?

1. Kɛ yɛkɛyɛ na yɛama Gyehova ɩanwʋ kɛɛ yɛdɔ yɩ a?

Sɛ yetiye Gyehova a, nɩ ikile kɛɛ yɛdɔ yɩ. (Kɩnga 1 Dwɔɔnʋ 5:3.) Ɩáhyɛ abiyela kɛɛ idiye yɩ. Mfomi, kɛ yekediye yɩ anzɛnyɩɩ yelétiye yɩ nɩ, ɩva ɔnwʋmɔ ɔhʋanɩ ɩma abiyela kɛɛ izi nwʋmɔ pɔkɔ. Mɩnla ti a? Gyehova ɩpɛ kɛɛ ‘yɛzʋ̃ yɛ ahʋnlɩnɩ nu yɛyɛ sutiye.’ (Wulomimaa 6:17) Eyi ikile kɛɛ ɩpɛ kɛɛ ɔzʋ̃ wʋ ahʋnlɩnɩ nu ɛyɛ sutiye ma yɩ, na kɛ ebiye a ɩwɔ kɛɛ ɛyɛ ɔzɔ nɩ ti a. Bɛyɛ buuku eyi yɩ ɔfʋã 3 nɩɩ 4 yɩ kɛɛ ɩwʋwa wʋ ma ɛla kezimɔ ɔdɔ Gyehova nɩ ali iluwa mɔɔ ɩpɛ mɔɔ ɛkɛyɛ na wʋahyi mɔɔ ikyi nɩ.

2. Mɩnla ti mɔɔ ɩkɔhʋla ɩkɛyɛ sɩ kɛɛ yɛkɛma Gyehova ɩkɔnwʋ kɛɛ yɛdɔ yɩ a?

“Ɛdɩnɣɛlɛnii yɩ amanɩyɛnwʋnlɛ ɩzʋnɩ.” (Ndwomi 34:19) Ye munwatĩĩ yɛ sinidɔlɛ ɩkʋ̃ itinyia yɛ. Ebiye sʋ̃ a, yɛ nwʋ kyɩlɩ yɛ wɔ ozukuasɛmɩ nu, yeyiyia nsisi nɩɩ ndwokɔzɩzɩbɛ mvʋlɔ. Sɛ yeyiyia ndwokɔzɩzɩbɛ a, ɩkɔhʋla ɩkɛyɛ sɩ ɩkɛma yɛ kɛɛ yekediye Gyehova. Eyi ɩdɩ ɔzɔ iluwakɛɛ ɩáyɛ sɩ kɛɛ yɛkɛyɛ mɔɔ ɩdɩbɛ. Naasʋ̃ sɛ ɛyɛ mɔɔ Gyehova ɩkɛhã kɛɛ ɛyɛ nɩ a, nɩ ɛmaa ɩkɔnwʋ kɛɛ ɔdɔ yɩ ɛtɛla dɩyɛ bela. Na eyi ikehile kɛɛ edi yi nɔhʋanlɛ. Na yɩzayɩ sʋ̃ ikeli wʋ nɔhʋanlɛ. Iléyiaki wʋ kyɩ̃.—Kɩnga Ndwomi 4:3.

SUMÁ SƲ̃MAA

Kilá sianti mɔɔ wʋ sutiyeyɛlɛ nwʋ ihyinyia Gyehova, na sumá mɔɔ ɩkɔwʋwa wʋ ma ɔkɔhɔlɩ ɔzʋlɔ ekeli nɔhʋanlɛ ɛkɛma yɩ.

3. Odwokɔ be mɔɔ ɩfalɩ wʋ nwʋ

Dwoobu buuku nɩ ɩma yɛnwʋ kɛɛ, kɛ Dwoobu nkʋ̃ la yɛ Setanɩ ɩhanlɩ odwokɔ idianlɩ yɩ zʋ a, mfomi bɛzabɛ mɔɔ bɛpɛ kɛɛ bɔsʋ̃mɩ Gyehova munwala sʋ̃. Kɩnga Dwoobu 1:1, 6–2:10, na akʋ̃ bozunzú ndwokɔɣizialɛ eyimmɔ nwʋ:

Nɩ Setanɩ ɩpɛ kɛɛ ikile kɛɛ, mɩnla ti mɔɔ Dwoobu itiye Gyehova a?—Kilá Dwoobu 1:9-11.
Mɩnla yɛ Setanɩ ɩhã ɩvalɩ adasamaa munwala mɔɔ wʋzawʋ sʋ̃ ɛkɩnla nwʋmɔ nɩ nwʋ a?—Kilá Dwoobu 2:4.

Kɩnga Dwoobu 27:5b, na akʋ̃ bozunzú odwokɔɣizialɛ eyi nwʋ:

Mɩnla ɔhʋanɩ zʋ yɛ Dwoobu ɩlalɩ yɩ ali kɛɛ ɩdɔ Gyehova amba a?

Dwoobu ɩhɔlɩ ɔzʋlɔ ilili nɔhʋanlɛ ɩmanlɩ Gyehova ɩva ihileli kɛɛ ɩdɔ yɩ

Sɛ amɩyɛ sʋ̃ yɛkɔ ɔzʋlɔ yedi nɔhʋanlɛ yɛma Gyehova a, nɩ ikile kɛɛ yɛdɔ yɩ

4. Má Gyehova yɩ anyɩ ile

Kɩnga Ɛɣɛlɛwulɛ 27:11, na akʋ̃ bozunzú ndwokɔɣizialɛ eyimmɔ nwʋ:

Ekila a, sɛ ɛyɛ wʋ dɩyɛ wɔ nɣɛlɛbɛ nu na ɛyɛ sutiye ɛma Gyehova a, kɛ ɩtɩ nɣanlɩ ise a? Mɩnla ti a?

5. Sa ɔkʋla edi Gyehova nɔhʋanlɛ

Ɔlɔlɛ mɔɔ yɛwɔ yɛma Gyehova nɩ, ɩkã yɛ ma yɛkã yɩ nwʋ odwokɔ yekile mmenii mvʋlɔ. Nɔhʋanlɛ mɔɔ yɛpɛ kɛɛ yedi yɛma Gyehova nɩ, ɩkã yɛ ma yɛyɛ ɔzɔ wɔ mmɩlɩ po mɔɔ ɩyɛ sɩ nu. Yɩ́ VIDIYO nɩ, na akʋ̃ bozunzú ndwokɔɣizialɛ mɔɔ ili ɛkɛnɩ nɩ nwʋ.

VIDIYO: Kã Wʋ Dedi Nwʋ Odwokɔ Ɩávalɩ Nwʋmɔ Kɛɛ Eyiyiaa Odwodwudiyialɛ Nɩ (5:09)

Asʋ̃ ɩyɛ a, ɩyɛ sɩ ɩma wʋ kɛɛ ɛkɛhã Gyehova nwʋ odwokɔ ekehile mmenii mvʋlɔ a?
Wɔ vidiyo yi nu nɩ, mɩnla yɛ ɩwʋwalɩ Grayson ma ilili bɔlɔ zʋ a?

Sɛ yɛyɛ mɔɔ Gyehova ɩpɛ na yekyi mɔɔ ikyi a, ɩlɛ́yɛ sɩ kɛɛ yekeli nɔhʋanlɛ yɛkɛma yɩ. Kɩnga Ndwomi 97:10, na akʋ̃ bozunzú ndwokɔɣizialɛ eyimmɔ nwʋ:

Kɛmɔ ozuma nɩ, mɩnla nninyeni yɛ Gyehova ɩpɛ a? Mɩnla nninyeni yɛ ikyi a?
Kɛ ɩkɛyɛ na wʋazuma kɛɛ ɔkɔlɔ mɔɔ ɩdɩ baaba na wʋahyi tanɩ a?

6. Sɛ yɛyɛ sutiye yɛma Gyehova a, yenyia ɔzʋlɔ mfasʋ

Sɛ yetiye Gyehova a, ikezi yɛ bʋwɔ daabaa. Kɩnga Ayɩzaya 48:17, 18, na akʋ̃ bozunzú ndwokɔɣizialɛ eyimmɔ nwʋ:

Asʋ̃ ede edi kɛɛ Gyehova yɛ izi mɔɔ yɛyɛ a ikezi yɛ bʋwɔ a? Mɩnla ti a?
Bayɩbʋlʋ nɩɩ nɔhʋanlɛ Nyamɩnlɩ Gyehova nwʋ dɩyɛ mɔɔ ozuma nɩ, mɩnla mfasʋ yɛ enyia wɔ zʋ a?

ABIYEMMƆ BƐKÃ KƐƐ: “Sɛ mɩyɛ baaba o mɩyɛ tanɩ o, Nyamɩnlɩ mɛyɩ ɩávalɩ yɩ nwʋ.”