OZUMALƐDƖYƐ 7
Nyamɩnlɩ Bulombunlililɛ Nɩ, Mɛyɩ Yɛ Lɛ Mɩnla?
1. Nyamɩnlɩ Bulombunlililɛ nɩ, mɛyɩ yɛ lɛ mɩnla?
Mɩnla yɛɛ ɩma Gyisɛsɩ ɩyɛ Bulombunli mɔɔ abiyela ɩnɩ yɩ ɩázɛ a?—MAAKƖ 1:40-42.
Nyamɩnlɩ Bulombunlililɛ ɩdɩ sʋlɔ aɣanɩ. Sa ɩba isiye oyuwadɩ aɣanɩ azʋlɔtʋ bɛagyianu na ɩkɛma Nyamɩnlɩ yɩ apɛdɩ ɩkɛyɛlɩ ɛkɛnɩ wɔ sʋlɔ nɩɩ azɩlɛ ɩzʋ. Odwokɔ mɔɔ ɩfalɩ Nyamɩnlɩ Bulombunlililɛ yɩ nwʋ nɩ ɩdɩ baaba. Ɩlɛ́kyɛ Nyamɩnlɩ Bulombunlililɛ ɩkɛhã mmenii mɔɔ bɛpɛ aɣanɩ ba nɩ bɛ ahʋnlɩnɩ ikediã bokunlu. Sa ɩkã mmenii mɔɔ bɔwɔ azɩlɛ yɩ zʋ munwatĩĩ ɩbɔ numɔ.—Kɩnga Luuku 4:43; Matiyu 6:9, 10; 24:14.
Ɩsɛ kɛɛ bulombunlililɛ bela inyia bulombunli. Gyehova ɩyɩ ɩ Ɣa, Gyisɛsɩ Kɩlayɩsɩ kɛɛ Bulombunli wɔ yɩ Bulombunli Manlɩ yɩ zʋ.—Kɩnga Yikile 11:15.
Kilá vidiyo mɔɔ ise Nyamɩnlɩ Bulombunlililɛ Nɩ, Mɛyɩ Yɛ Lɛ Mɩnla?
2. Mɩnla ti mɔɔ Gyisɛsɩ ɩdɩ Bulombunli mɔɔ abiyela ɩnɩ yɩ ɩázɛ a?
Nyamɩnlɩ ɩ Ɣa yɩ ɩdɩ Bulombunli mɔɔ abiyela ɩnɩ yɩ ɩázɛ iluwakɛɛ ɩnwʋ ngokɛ na ikyina nɔhʋanlɛlilɛ mɛda pindinyii. (Dwɔɔnʋ 1:14) Akʋ̃ sʋ̃, ɩwɔ tumi mɔɔ ɩkɔhʋla ɩkɔwʋwa mmenii sianti yɛ lɛ kɛɛ, ɩzʋ̃ sʋlɔ yɛɛ ikeli tumi wɔ azɩlɛ yɩ zʋ a. Mmɩlɩ mɔɔ bodunwonli yɩ mɛda nɩ, ɩhɔlɩ sʋlɔ na ɩhɔ ɩwʋwalɩ Gyehova yɩ sa nyini zʋ. (Hibulumaa 10:12, 13) Aɣinzi nɩ, Nyamɩnlɩ ɩmanlɩ Gyisɛsɩ ɔnwʋmɔ ɔhʋanɩ kɛɛ ili tumi.—Kɩnga Luuku 1:32, 33.
3. Aninyiammɔ yɛɛ bɛnɩ Gyisɛsɩ keli tumi a?
Okuwu be mɔɔ bɔfʋlɛ bɛ kɛɛ “nwanzanwanzamaa” yɛɛ bɛnɩ Gyisɛsɩ keli tumi wɔ sʋlɔ a. (Daniel 7:27, NW) Nwanzanwanzamaa mɔɔ belili bɔmʋnlɩ bɛyɩlɩ bɛ nɩ yɛ lɛ Gyisɛsɩ yɩ adʋwavʋlɔ nɔhʋanlɛmaa yɩ nɩ. Gyehova ɩhɔ ɔzʋlɔ ɩyɩ mmenyia nɩɩ mmaalɛ mɔɔ bɛdɩ nɔhʋanlɛmaa be kɛɛ nwanzanwanzamaa ɩɣa ɩbʋmɩ nnɛ. Dɩkɛ Gyisɛsɩ nɩ, sɛ bowu a, botunwo bɛ kɛɛ sunzuma nu abɔdɩ.—Kɩnga Dwɔɔnʋ 14:1-3; 1 Kɔlɛntɩmaa 15:42-44.
Mmenii ana yɛɛ bɔkɔhɔ sʋlɔ a? Gyisɛsɩ ɩvʋlɔlɩ bɛ kɛɛ “mmuwuanɩ kubo ɛgyɩkɩ̃ɩ̃.” (Luuku 12:32) Bɔ dʋdʋ ikezi 144,000. Sa bɛnɩ Gyisɛsɩ di azɩlɛ yɩ zʋ tumi.—Kɩnga Yikile 14:1.
4. Gyisɛsɩ ɩwɔlɩ ɩtʋ kɛɛ idi tumi nɩ, mɩnla yɛɛ izizili a?
Nyamɩnlɩ yɩ Bulombunlililɛ ɩwɔlɩ ɩtʋ kɛɛ idi tumi wɔ 1914 nu. * Dɩyɛ mɔɔ Gyisɛsɩ ilili bɔmʋnlɩ ɩyɛlɩ kɛɛ Bulombunli nɩ yɛ lɛ kɛɛ, ivuandinli Abɔnsamɩ nɩɩ yɩ awɔvʋlɔ tanɩ igualɩ azɩlɛ yɩ zʋ. Abɔnsamɩ ɩvalɩ ɛya kezile na ɩwɔlɩ ɩtʋ ɩwɔlɩ asakala wɔ azɩlɛ munwatĩĩ zʋ. (Yikile 12:7-10, 12) Ɔzʋ̃mɩ ɔzɔ mmɩlɩ yɩ nɩ, adasamaa bɛ amanɩyɛnwʋnlɛ ɩhɔ ɔzʋlɔ ɩyɛɛ kezile. Ahʋnɛ, kɔmɩ, adimakɛlɛ azʋlɔtʋ, nɩɩ azɩlɛwʋsʋlɛ nɣezile nɣezile munwatĩĩ ɩdɩ “sɛnkyɩlɛdɩ” mɔɔ ikile kɛɛ ɩlɛ́kyɛ Bulombunlililɛ yɩ nɩ ɩbadindiã nninyeni bʋwɔ wɔ azɩlɛ yɩ zʋ.—Kɩnga Luuku 21:7, 10, 11, 31.
5. Mɩnla yɛɛ Nyamɩnlɩ yɩ Bulombunlililɛ yɩ nɩ ɩkɛyɛ a?
Iluwa odwokɔbahanlɛ egyima mɔɔ bɛyɛ wɔ oyuwadɩ yɩ dɩka bela nɩ ti, Nyamɩnlɩ yɩ Bulombunlililɛ yɩ nɩ ikohunwahunwa ɔlɔmɩ sʋ̃maa mɔɔ bɔzʋ̃ manlɩ azʋlɔtʋ nu bo munwa. Mmenii mbɩmmbɩɩ mɔɔ bɛkã bɔ nwʋ azɩ nɩ bede Gyisɛsɩ betiã numɔ kɛɛ bɛ Bulombunli. Nyamɩnlɩ Bulombunlililɛ yɩ nɩ ɩkɔwɔ bɔnwʋ banɩ mmɩlɩ mɔɔ ɩsɩkɛ nnɛ oyuwadɩ nhyɩhyɛlɩyɛ tanɩ wɔ ɛkɛnɩ nɩ. Meti ɩsɛ kɛɛ abiyela mɔɔ ɩpɛyɩ kɛɛ inyia Nyamɩnlɩ yɩ Bulombunlililɛ ɩzʋ mfasʋ nɩ isuma kɛɛ ɩkɛyɛ sutiye ɩkɛma Gyisɛsɩ.—Kɩnga Yikile 7:9, 14, 16, 17.
Wɔ alʋbɔ 1,000 nu nɩ, Bulombunlililɛ yɩ nɩ ɩkɛma Nyamɩnlɩ itile nu pɔkɔ mɔɔ ɩwɔ ɩma enii ɔzʋ̃mɩ oyuwadɩ eyi ɩtʋwɔlɛ nɩ ɩkɛɣa nu. Azɩlɛ yɩ munwatĩĩ ɩkɛyɛ paladayɩsɩ. Awielɩyɛ kʋlaa nɩ, Gyisɛsɩ ikezia ɩkɛva Bulombunlililɛ yɩ nɩ ɩkɛma ɩ Zɩ. (1 Kɔlɛntɩmaa 15:24-26) Ezi abiye mɔɔ ɛkɛbɛyɩ kɛɛ ɛkɛhã Nyamɩnlɩ yɩ Bulombunlililɛ nwʋ odwokɔ ekehile yɩ a?—Kɩnga 2 Pita 3:13.
^ par. 6 Sɛ ɛpɛyɩ kɛɛ ɔnwʋ Bayɩbʋlʋ yɩ nkɔmɩhyɛlɛ mɔɔ ɩfalɩ ɔlʋbɔ 1914 ɩnwʋ a, kila owukolɛ mɔɔ ɩtɔ ɔzʋlɔ 217-220 wɔ What Can the Bible Teach Us? buuku yɩ nu.
