Die geskiedenis van Jehovah se Getuies in hedendaagse Rusland is ’n verslag van onderdrukking en vervolging. Gedurende die grootste deel van die 20ste eeu behandel die Russiese regering die Getuies sleg, al het hulle bekend gestaan as vreedsame burgers wat gehoorsaam is aan die wet. Die doel van die regering van die Sowjetunie was om hulle te dwing om die idees van die Sowjetunie te aanvaar. Hulle is verbied om Bybels en godsdienspublikasies te hê. Hulle was die heeltyd dopgehou en moes hulle godsdiensvergaderinge in die geheim hou. As hulle gevang is, is hulle geslaan en het hulle lang tronkstrawwe gekry. Die regering het duisende verban en na Siberië gestuur.

Dit het in 1991 begin verander toe die Russiese regering wetlike erkenning aan Jehovah se Getuies gegee het en hulle toegelaat het om godsdiensvryheid te hê sonder dat die owerhede inmeng. Maar hierdie tyd van vrede het nie lank gehou nie.

In 2009 het die teenstand en beperkings begin toeneem toe die Russiese Hooggeregshof gebly het by die uitspraak deur ’n laer hof wat ’n gemeente van Jehovah se Getuies “ekstremisties” verklaar het. Ná jare van hofsake het die Russiese Hooggeregshof in April 2017 beslis dat die Getuies se regsentiteite gelikwideer moet word as gevolg van beweerde ekstremistiese bedrywigheid. Die Russiese owerhede het dadelik stappe geneem om hulle eiendom af te vat, hulle plekke van aanbidding toe te maak en hulle godsdienspublikasies as “ekstremistiese materiaal” te verklaar.

Die Russiese regering het nie opgehou nadat hulle die regsentiteite van die Getuies aangeval het nie. Hulle het ook gekies om Jehovah se Getuies as individue aan te val. Hulle het dinge verder gevat en het die private aanbidding van elke Getuie geassosieer met die organisasie wat verbied is. Die polisie het die Getuies se huise deursoek, en dit het daartoe gelei dat hulle mishandel en op ’n wrede manier ondervra is. Mans sowel as vrouens van alle ouderdomme wat Getuies is, is gearresteer, skuldig bevind en tot tronkstraf of huisarres gevonnis.

Vanaf die verbod in April 2017 is honderde Getuies in aanhouding geplaas voor hulle verhoor of tot tronkstraf gevonnis op die aanklag van ekstremisme. Tot en met 18 Oktober 2024 is altesaam 131 Getuies in die tronk.

Protes teen Rusland se wrede behandeling van Jehovah se Getuies

Die Russiese regering hou aan om Getuies skuldig te bevind aan ekstremistiese bedrywigheid al vra die internasionale gemeenskap dat Rusland moet ophou met sy aanhoudende vervolging. Ingeligte waarnemers en howe buite Rusland het die Russiese regering veroordeel omdat hulle aanhou om Jehovah se Getuies te onderdruk.

Voorbeelde van wrede uitsprake wat onlangs gegee is

• Op 25 Januarie 2024 is Sona Olopova, ’n 37-jarige getroude vrou, tot twee jaar dwangarbeid in ’n tronk in die Samara-streek gevonnis. In Mei 2023 het die polisie haar huis deursoek. Daarna is ’n kriminele saak gemaak, en sy is van ekstremistiese bedrywighede aangekla. Maar eintlik was die enigste “misdaad” wat sy gepleeg het, haar vreedsame aanbidding van God saam met haar medegelowiges. Sona het gesê: “Die aanklaer het nie in ag geneem dat dit onmoontlik is om een van Jehovah se Getuies te wees en op dieselfde tyd ’n ekstremis te wees nie.”

• Op 6 Februarie 2024 het ’n appèlhof die uitspraak handhaaf om Dmitri Barmakin skuldig te bevind. Hy is in die hof in hegtenis geneem om sy vonnis van agt jaar uit te dien. In Julie 2018 het gewapende polisiemanne by ’n woonstel ingebars waar Dmitri en sy vrou, Jelena, gebly het om na Jelena se 90-jarige ouma om te sien. Dmitri en Jelena is albei na hulle tuisstad, Wladiwostok, teruggevat, waar Dmitri gearresteer is. Daarna is ’n kriminele saak teen hom gemaak, en hy is aangekla van die “organisering van die bedrywighede van ’n ekstremistiese organisasie”. Hy is op die oomblik in ’n detensiesentrum in die Chabarowsk-gebied en sal in November 2029 vrygelaat word. Jelena moet ook voor die hof verskyn as gevolg van haar geloof.

• Op 29 Februarie 2024 is Aleksandr Tsjagan, ’n 53-jarige getroude man, deur die Tsentralni-distrikshof van Toljatti in die Samara-streek skuldig bevind. Hy is tot agt jaar tronkstraf gevonnis, een van die langste vonnisse wat aan ’n Getuie-man in Rusland gegee is. Hy is aan die einde van sy verhoor in die hof in hegtenis geneem. Hy is op die oomblik in die tronk in Detensiesentrum Nr. 4 in die Samara-streek en sal in Januarie 2032 vrygelaat word.

• Op 5 Maart 2024 het ’n hof in die Irkoetsk-streek in Oos-Siberië nege Getuie-mans aan ekstremisme skuldig bevind. Die nege mans, waarvan die oudste 72 jaar oud is, is verskeie tronkvonnisse gegee van tot sewe jaar lank. Hulle is skuldig bevind in kriminele sake wat in Oktober 2021 begin het nadat polisiemanne hulle huise deursoek het. Teen die tyd dat hulle gevonnis is, was een van die mans, Jaroslaf Kalin, alreeds twee jaar lank in aanhouding voor sy verhoor. Hy beskryf sy gevangenskap as ’n bitter ondervinding in die “ergste selle en toestande wat ons kan hê”.

• In April 2024 is Rinat Kiramof, wat ’n tronkvonnis van sewe jaar uitdien, deur die tronkowerheid na ’n tronk daar naby oorgeplaas waar mediese sorg voorsien word. Hulle het beweer dat hy dalk tuberkulose het. In November 2021 is ’n kriminele saak teen die 36-jarige Rinat gemaak, waar hy van ekstremistiese bedrywighede aangekla is. Nadat hy ’n jaar en ’n half lank in aanhouding was, is hy tot sewe jaar tronkstraf gevonnis. Nadat Rinat na die tronk wat mediese sorg voorsien oorgeplaas is, het ’n groep gevangenes hom fisies mishandel en hom selfs met ’n skoktoestel geskok. Hulle het hom ook vier dae lank nie toegelaat om te slaap nie en nie vir hom kos gegee nie. Nadat ’n mediese ondersoek bevestig het dat hy nie tuberkulose het nie, is Rinat op 17 Mei 2024 na die strafkolonie teruggestuur. Hy sal in Desember 2027 uit die tronk vrygelaat word.

• Op 20 Junie 2024 is drie Getuie-mans wat in Chabarowsk bly, die swaarste tronkvonnisse gegee wat deur enige Russiese hof aan Getuies gegee is vandat die regsentiteite van Jehovah se Getuies gelikwideer is. Nikolai Polewodof is tot agt jaar en ses maande gevonnis, Witali Zjoek tot agt jaar en vier maande en Stanislaf Kim tot agt jaar en twee maande. Die mans is skuldig bevind aan die organisering van die bedrywighede van ’n ekstremistiese organisasie. Maar eintlik het hulle net vreedsaam saam met hulle familie en medegelowiges bymekaargekom om die Bybel te lees en te studeer. In Oktober 2024 is hulle vonnisse met een jaar verminder en na opgeskorte vonnisse verander. As gevolg hiervan is die drie mans vrygelaat.

Verdere pogings om ’n einde te maak aan onregverdige opsluiting

Jehovah se Getuies wêreldwyd is baie ontsteld omdat hulle medegelowiges deur Rusland wreed behandel word. Miljoene Getuies regoor die wêreld het briewe na Russiese regeringsamptenare gestuur en hulle gevra om die Getuies wat in die tronk is, te help. Prokureurs vir Getuies wat in die tronk is, het appèlsake gemaak in al die verskillende Russiese howe, en baie aansoeke is by die Europese Hof van Menseregte ingegee. Jehovah se Getuies het ook klagtes by die VN se Menseregtekomitee en die VN se Werkende Groep vir Arbitrêre Opsluiting ingedien. Hulle het ook verslae by internasionale organisasies ingedien wat die skending van menseregte dophou. Jehovah se Getuies sal aanhou om alle kanale te gebruik om ander bewus te maak van die slegte situasie van hulle medegelowiges in Rusland sodat hierdie aaklige godsdiensvervolging kan ophou.

Tydlyn

1. 18 Oktober 2024

   Altesaam 131 Getuies in die tronk.

2. 24 Oktober 2023

   Die VN se Menseregtekomitee (CCPR) gee twee beslissings wat met die Plaaslike Godsdiensorganisasies in Elista en Abinsk te doen het. In albei sake het die CCPR tot die gevolgtrekking gekom dat Rusland die Getuies se regte geskend het volgens Artikel 18.1 (“die reg op vryheid van denke, gewete en godsdiens”) en 22.1 (“die reg op vryheid van assosiasie”) van die Internasionale Verdrag oor Burgerlike en Politieke Regte. Die beslissings bevestig dat daar niks in hulle godsdienspublikasies is wat haat of geweld bevorder nie.

3. 7 Junie 2022

   Die EHMR lewer belangrike uitspraak, Taganrog LRO and Others v. Russia, wat Rusland veroordeel vir die mishandeling van Jehovah se Getuies.

4. 12 Januarie 2022

   Die Departement van Justisie van die Russiese Federasie voeg die JW Library-app by die Federale Lys van Ekstremistiese Materiaal. Dit is die eerste en enigste app wat in Rusland verbied is en as ekstremisties beskou word.

5. 27 September 2021

   Sint Petersburg-stadshof verwerp appèl teen die beslissing van 31 Maart 2021. In daardie beslissing is die JW Library-app ekstremisties verklaar, en die gebruik daarvan is regdeur die Russiese Federasie en die Krim verbied. Die hof se beslissing tree dadelik in werking.

6. 26 April 2019

   Die VN se Werkende Groep vir Arbitrêre Opsluiting beslis dat die regte van Dmitri Michailof geskend is en veroordeel Rusland se vervolging van Jehovah se Getuies.

7. 20 April 2017

   Die Hooggeregshof van die Russiese Federasie beslis dat die nasionale kantoor van Jehovah se Getuies en 395 Plaaslike Godsdiensorganisasies gelikwideer moet word.