“Wanneer julle bid, moet julle nie dieselfde dinge oor en oor sê . . . nie.” – Matteus 6:7.

Jehovah wil nie hê dat ons gebede moet herhaal wat ons gememoriseer het of dat ons ’n gebedeboek moet gebruik nie. Hy wil eerder hê dat ons uit die hart moet praat. Dink net hoe frustrerend dit sou wees om ’n vriend te hê wat elke dag vir jou dieselfde woorde oor en oor sê. Goeie vriende praat openlik en opreg met mekaar. Wanneer ons in ons eie woorde tot ons hemelse Vader bid, wys dit dat ons hom as ’n vriend beskou.

“Wanneer julle wel vra, ontvang julle nie, want julle vra met verkeerde motiewe.” – Jakobus 4:3.

Ons sal beslis nie verwag dat God ons gebede beantwoord as ons vir dinge vra wat hy nie wil hê ons moet doen of hê nie. Byvoorbeeld, as iemand dobbel en tot Jehovah bid om hom te help om geld te wen, sou God sy gebed beantwoord? God het duidelik vir ons gesê om nie gierig te wees en nie ’n bygelowige vertroue in geluk te hê nie (Jesaja 65:11; Lukas 12:15). Dit sou beslis nie sin maak om te verwag dat Jehovah sulke gebede beantwoord nie! As ons wil hê dat God ons gebede moet beantwoord, moet ons seker maak dat wat ons vra, ooreenstem met wat hy vir ons in die Bybel sê.

 “As iemand weier om die wet te gehoorsaam, is selfs sy gebed iets afskuweliks.” – Spreuke 28:9.

In Bybeltye het God nie die gebede beantwoord van diegene wat sy regverdige wette verwerp het nie (Jesaja 1:15, 16). God het nie verander nie (Maleagi 3:6). As ons wil hê dat God ons gebede moet beantwoord, moet ons doen wat ons kan om volgens sy wette te lewe. Maar wat as ons verkeerde dinge in die verlede gedoen het? Beteken dit dat Jehovah nooit na ons sal luister nie? Natuurlik nie! God sal ons liefdevol vergewe as ons wys dat ons jammer is vir wat ons verkeerd gedoen het en ons bes doen om hom gelukkig te maak. – Handelinge 3:19.