’n Seël ‘wat aan Jugal behoort’

IN DIE sewende eeu v.G.J. het die Galdese heerser Nebukadnesar deur Jerusalem se verdediging gedring, die stad verbrand en sy mure afgebreek. Hy het Sedekia, die koning van Juda, gevange geneem en hom verblind. Ook het “die koning van Babilon . . . al die edeles van Juda doodgemaak”.—Jeremia 39:1-8.

Een van Juda se edeles, of vorste, wat waarskynlik deur die Babiloniërs om die lewe gebring is, was Jugal, die seun van Selemja. Jugal se verhaal het ’n soort naskrif. Maar voordat ons dit bespreek, kan ons eers kyk na wat die Skrif oor Jugal en sy dag sê.

“Hulle sal nie die oorhand oor jou kry nie”

Jehovah het die profeet Jeremia die opdrag gegee om ’n oordeelsboodskap teen Juda en Jerusalem te verkondig. God het vir Jeremia gesê dat Juda se konings, vorste, priesters en volk ‘teen hom sou veg’. “Maar hulle sal nie die oorhand oor jou kry nie, want ‘ek is met jou’”, het Jehovah gesê.—Jeremia 1:17-19.

Gedurende die Babiloniese beleg van Juda se hoofstad, Jerusalem, het koning Sedekia twee keer boodskappers na Jeremia gestuur om uit te vind of Nebukadnesar van die stad af sou wegtrek en om die profeet te vra om daarvoor te bid. Een van die koning se gesante was Jugal, ook bekend as Jehugal. Jeremia se godgegewe boodskap was dat die Babiloniërs, of Galdeërs, die stad sou vernietig. Enige inwoners van Jerusalem wat in die stad bly, sou sterf deur hongersnood, die pes en die swaard. Daarenteen sou dié wat na die Galdeërs uitgaan, behoue bly. Hoe woedend het Jeremia se woorde die vorste van Juda tog gemaak!—Jeremia 21:1-10; 37:3-10; 38:1-3.

Jugal was een van die vorste wat by Sedekia aangedring het: ‘Laat hierdie man [Jeremia] asseblief doodgemaak word, want hy maak die hande van die krygsmanne slap.’ Goddelose Jugal was ook onder dié wat Jeremia in ’n modderput gegooi het, waaruit die profeet later gered is (Jeremia 37:15; 38:4-6). Jeremia het Jerusalem se vernietiging oorleef omdat hy gehoorsaam aan Jehovah was, maar Jugal het blykbaar gesterf toe die stelsel waarop hy vertrou het, vernietig is.

’n Interessante naskrif

Daar kan gesê word dat die naskrif tot die verslag oor Jugal eers in die jaar 2005 in Jerusalem “geskryf” is. Argeoloë het opgrawings gedoen op ’n terrein waar hulle gehoop het  om koning Dawid se paleis te vind. Wat hulle gevind het, was ’n groot klipstruktuur wat na hulle mening vernietig is toe die Babiloniërs Jerusalem in Jeremia se dag ingeneem het.

Dit is nog nie seker of dit Dawid se paleis is of nie. Maar argeoloë het wel een voorwerp geïdentifiseer wat gevind is—die een sentimeter breë kleiseël wat op bladsy 14 verskyn. Dit het ’n dokument verseël wat lank gelede al tot niet gegaan het. Die afdruk lees: “Behoort aan Jehugal, seun van Selemijahoe, seun van Sofi.” Hierdie afdruk is blykbaar gemaak met die seël van Jeremia se teenstander Jehugal, of Jugal, die seun van Selemja.

Die argeoloog Eilat Mazar, wat die afdruk ontsyfer het, skryf dat Jugal slegs die “tweede koninklike minister” is, naas Gemarja, die seun van Safan, wie se naam op ’n seëlafdruk verskyn wat in die Stad van Dawid gevind is. a

Geloof in God se Woord hang nie af van die ontdekking van enige artefak nie; die vervulling van geïnspireerde profesieë is egter ’n stewige grondslag vir geloof in die Bybel. Geskiedkundige feite bewys dat Jeremia die vernietiging van Jerusalem akkuraat voorspel het. Die roemlose einde waaraan Jeremia se teenstanders gekom het, behoort ons oortuiging te versterk dat ons vyande ‘nie die oorhand oor ons sal kry’ as ons getrou is soos Jeremia nie, ‘want Jehovah is met ons’.

[Voetnoot]

[Prent op bladsy 15]

Jeremia het nie geswig onder druk om God se boodskap af te water nie

[Foto-erkenning op bladsy 14]

Gabi Laron/Institute of Archaeology/ Hebrew University ©Eilat Mazar