Die lewe as ’n blinde persoon

SPEEL

“By geboorte het ek amper heeltemal my sig verloor omdat ek die verkeerde oogdruppels gegee is. Gedurende my tienerjare het ek heeltemal blind geword, en dit het my baie depressief gemaak.” —Paqui, ’n middeljarige vrou wie se man ook blind is.

BLINDHEID of uiterse swak sig kan baie oorsake hê, insluitende beserings en siekte, wat ’n uitwerking kan hê op die oë, die oogsenuwee of die brein. Mense wat ’n groot deel van hulle sig of al hulle sig verloor, vind dit dikwels moeilik om hulle situasie te aanvaar en voel hartseer en bang. Maar baie leer om goed oor die weg te kom en lei ’n bevredigende lewe.

Ons neem gewoonlik die meeste inligting oor ons omgewing in deur middel van ons oë. Maar wanneer iemand sy sig verloor, maak hy meer staat op sy ander sintuie—gehoor, reuk, gevoel en smaak.

Volgens die tydskrif Scientific American toon navorsing oor neuroplastisiteit dat die brein die vermoë het “om te verander namate dit ondervinding opdoen”. Die artikel voeg by: “Daar is baie bewyse dat die brein, wanneer dit nie meer seine van een sintuig ontvang nie, homself kan herorganiseer om die ander sintuie te ondersteun en te versterk.” Kyk na die volgende.

Gehoor: Klanke—van mense se stemme tot voetstappe—help blinde mense om ’n verstandelike beeld te vorm. “Ek het geleer om mense te onthou en te erken aan hulle stemme of selfs aan hoe hulle stap”, sê ’n blinde man met die naam Fernando. Juan, wat ook blind is, sê: “’n Blinde persoon erken ander mense aan hulle stemme.” En soos ons almal, let blinde mense veral iemand se stemtoon op, wat ’n verskeidenheid emosies kan weerspieël.

Die geoefende oor van ’n blinde persoon sê vir hom baie omtrent sy omgewing—van die rigting waarin die verkeer beweeg tot die grootte van ’n kamer tot die posisie van sekere voorwerpe.

Reuk: Reuk kan ook ’n ryk bron van inligting wees. Dit sê vir ’n blinde persoon baie meer as net wat hy ruik. Byvoorbeeld, wanneer ’n blinde persoon met ’n sekere pad langs loop, kan sy reuksintuig hom help om ’n verstandelike kaart te vorm wat koffiewinkels, restaurante, markte, ensovoorts kan insluit. Bekende geluide voeg natuurlik meer detail by die kaart by, asook dinge wat die persoon te wete kom deur middel van gevoel.

Gevoel: “My vingers is my oë”, sê Francisco. ’n Wandelstok help my om verder te “sien”. Manasés, wat blind gebore is en van kleins af geleer het om ’n wandelstok te gebruik, het gesê: “Ek weet presies waar ek is, danksy my ander sintuie, my geheue en die patrone op die sypaadjie wat ek met my wandelstok voel.”

Die Wagtoring word in braille gelees

Gevoel stel baie blinde mense ook in staat om leesstof te lees wat in braille gepubliseer is. Trouens, dit is deesdae niks nuuts vir ’n blinde persoon om toegang te hê tot ’n aantal voorsienings wat sy verstandelike en geestelike lewe kan verryk nie. Hierdie voorsienings sluit nie net braillepublikasies in nie, maar ook oudio-opnames en rekenaartegnologie. Dit kan ’n blinde persoon help om die Bybel en ’n verskeidenheid Bybelstudiehulpe te lees. *

Hierdie geestelike voorsienings was ’n groot bron van vertroosting en hoop vir Paqui en haar man, wat vroeër genoem is. Nou het hulle ook die ondersteuning van ’n groot geestelike familie, die plaaslike Christelike gemeente van Jehovah se Getuies. “Ons kan nou ’n vol en redelik onafhanklike lewe lei”, sê Paqui.

Blindheid het beslis unieke uitdagings. Maar wat ’n bewys is dit tog van die mens se vermoë om aan te pas en terug te bons wanneer mense sulke uitdagings oorkom en voortgaan om ’n vreugdevolle lewe te lei!

^ par. 10 Jehovah se Getuies vervaardig Bybelstudiehulpe in braille in meer as 25 tale.

Hoewel ek blind is, lei ek ’n bevredigende lewe

Marco Antonio is ’n getroude man, ’n pa en ’n vennoot in ’n besigheid. Hy is ook van geboorte af blind. Hy het met Ontwaak! gepraat oor ’n paar van sy vreugdes en uitdagings.

Jy bestuur ’n besigheid. Hoe doen jy dit?

By die werk hanteer ek telefoonnavrae en banksake en ontmoet ek kliënte en verskaffers.

Wat doen jy vir ontspanning?

Ek is mal oor musiek. Dit laat my ontspan. En ek speel klavier, maar dit is moeilik omdat ek nie braillemusiek kan lees en dit terselfdertyd met albei hande kan speel nie. Wanneer ek ’n musiekstuk vir die eerste keer speel, lees ek dit met die regterhand en speel ek die klavier met die linkerhand. Dan herhaal ek die proses, maar my linkerhand lees en my regterhand speel. Wanneer ek die note uit my kop ken, speel ek met albei hande.

Het jy al voor enige spesiale uitdagings te staan gekom?

Toe ek grootgeword het, het my ouers en broers baie goed vir my gesorg, en hulle het my behandel asof ek nie blind is nie. Soos ’n mens sal verwag, het ek soms teen dinge gestamp en geval, maar ek het daaraan gewoond geraak om die meeste dinge te doen wat ’n siende persoon kan doen. Toe ek ’n volwassene geword het, was die feit dat ek nie kon bestuur nie, die enigste ding wat my werklik gepla het.

Nou is ek getroud en ’n pa, en ek het ’n liefdevolle gesin vir wie ek sorg en wat my ondersteun. My geliefde seun, David, ly aan dieselfde oorerflike siekte—optiese atrofie, oftewel die wegkwyning van die oogsenuwee. Maar ek probeer om vir hom ’n goeie voorbeeld te stel. Ek wil hê dat hy moet leer dat hy baie dinge kan doen as hy geduldig en vasbeslote is.

Jy het nou ’n gidshond. Waarom het jy besluit om een te kry?

Met Dante—dit is die hond se naam—kan ek vinniger loop en is ek veiliger. Wanneer ek vir die eerste keer iewers heen gaan, gaan my vrou, Loli, wat nie blind is nie, saam met ons sodat ek en Dante die roete kan leer ken. Ek moet erken dat dit eers vir my moeilik was om my veiligheid aan ’n hond toe te vertrou. Maar Dante het my volle vertroue gewen. Maak nie saak wat rondom ons gebeur nie, hy konsentreer op sy werk. Maar wanneer ek sy harnas afhaal, tree hy soos enige ander hond op.

Jy is een van Jehovah se Getuies, maar hoe studeer jy die Bybel?

Toe daar nie veel tegnologie vir die blindes was nie, het Loli die Bybel en Bybelstudiehulpe vir my gelees. Sy het my baie gehelp. Gevolglik kon ek selfs by gemeentelike vergaderinge toesprake hou. Maar deesdae kan ek self lees, want ek het die Bybel en Bybelstudiehulpe in braille. Ek kan ook gaan na die webwerf van Jehovah se Getuies—jw.org—waar ek oudio-opnames aflaai. En ek het ’n braillevertoonbord, wat my in staat stel om te lees wat op my rekenaarskerm verskyn. Die vertoonbord het klein pennetjies wat in groepies opspring om braillekarakters te vorm. Dis baie indrukwekkend!

Dit was vir my ’n groot voorreg om te help met die transkripsie van braillepublikasies by die Spaanse takkantoor van Jehovah se Getuies in Madrid. Om die gehalte van braillepublikasies te verbeter, verwelkom diegene wat dit voorberei, voorstelle van die blindes. Ek voel werklik dat my geestelike broers en susters my liefhet en my waardeer.

Geniet jy dit om interaksie met ander te hê?

Ja, veral met my gesin en medeaanbidders, met wie ek ook die deur-tot-deur-predikingswerk doen. My geestelike broers en susters behandel my soos hulle enigiemand anders behandel. Om die waarheid te sê, hulle vergeet soms dat ek blind is!

Ek moet byvoeg dat die bediening dit vir my moontlik maak om ander te vertel van die kosbare hoop wat in die Bybel gevind word. Ons lees byvoorbeeld in Jesaja 35:5 dat “die oë van die blindes geopen [sal] word” onder God se Koninkryksregering. Toe Jesus Christus op die aarde was, het hy die blindes genees, wat ons ’n voorskou gegee het van hoe die lewe in die toekoms sal wees (Matteus 15:30, 31). Blindheid is dus ’n tydelike probleem, net soos alle ander gestremdhede. In die toekomstige aardse Paradys sal niemand sê: “Ek is siek [of gestremd] nie.”—Jesaja 33:24; Lukas 23:43.