TRANSOKSIANA. Die Land tussen die Riviere. Tartarye. Turkestan. Baie name is al gegee aan die gebied waarvan Oesbekistan, die “Land van die Oesbeke”, nou deel vorm. Die stede van Oesbekistan is reeds in die 15de eeu deur handelaars besoek wat op die Chinese syroete gereis het, ’n netwerk van paaie wat China destyds met die Mediterreense gebied verbind het. Katoen is nou die vernaamste produk van die tekstielbedryf in Oesbekistan. Pragtige tapyte wat van katoen, wol en sy gemaak word, word ook hier verkoop.

Baie volke het deur die eeue heen ’n invloed op die kultuur van Oesbekistan gehad. Bekende veroweraars en hulle magtige leërs het deur die berge en woestyne van Oesbekistan getrek. Dit sluit Aleksander die Grote in, wat sy geliefde Roksana hier ontmoet het; asook Djengis Khan, van Mongolië; en Timur (ook bekend as Tamerlan), ’n boorling van die streek wat oor een van die grootste ryke in die geskiedenis geheers het.

Pragtige, kleurvolle monumente met koepelvormige dakke wat met blou teëls bedek is, vorm deel van die  moderne stedelike landskap van Oesbekistan. Baie van hierdie geboue word as skole gebruik.

Die Chinese syroete. Hierdie netwerk van handelspaaie, waarvan ’n deel geloop het deur wat nou Oesbekistan genoem word, het ’n belangrike rol in wêreldhandel gespeel. Dit was reeds in gebruik voor ons huidige jaartelling en was nog steeds baie gewild teen die einde van die 15de eeu HJ, toe die seeroete na Indië geopen is.

Die Aral-meer. Die Aral-meer—wat eens die wêreld se vierde grootste meer was—is besig om te verdwyn omdat water vir besproeiingsdoeleindes afgekeer word. Oesbekistan probeer die probleem oplos in samewerking met ander Sentraal-Asiatiese lande.

Oesbekistan se veranderende alfabet. Verskeie tale is al hier gepraat, maar ná die Islamitiese verowering in die agtste eeu het mense Arabies begin praat. Toe die land deel van die Sowjetunie geword het, is die Latynse alfabet gebruik, en dit is later, aan die einde van die 1930’s, met Cyrillies vervang. In 1993 het ’n nuwe wet die Oesbekiese alfabet in gebruik gestel, wat op die Latynse alfabet gebaseer is.