Yesu wo e kaseli ɔmɛ ga ngɛ bɔ nɛ e sa kaa a ngɔ he lo nya níhi nɛ a ngɛ ɔ kɛ tsu ní ha a he. Se benɛ e kɛ mɛ ngɛ munyu tue ɔ, pi e kaseli ɔmɛ pɛ nɛ a ngɛ lejɛ ɔ. Farisi bi ɔmɛ hu ngɛ lejɛ ɔ. Enɛ ɔ he ɔ, e sa nɛ mɛ hu a bɔ mɔde kaa a kɛ ga nɛ Yesu wo ɔ ma tsu ní. Mɛni he je? Ejakaa a “suɔ sika.” Benɛ a nu nɔ́ nɛ Yesu de ɔ, ‘a bɔni e he fɛu yemi’.​​—Luka 15:2; 16:13, 14.

Se lɔ ɔ wui Yesu he gbeye kulaa. Mohu ɔ, e de mɛ ke: “Nyɛ peeɔ nyɛ he nimli kpakpahi ngɛ nimli a hɛ mi, se Mawu lɛɛ e le nyɛ tsui mi. Ejakaa níhi nɛ adesa buu kaa a he jua wa a, Mawu hɛ mi lɛɛ a pi nɔ́ ko kulaa.”​​—Luka 16:15.

Nihi “buu” Farisi bi ɔmɛ wawɛɛ, se be su nɛ a si fɔfɔɛ ɔ ma tsake. Mawu maa ba jami hɛ mi nyɛɛli ɔmɛ, nihi nɛ a ná ní kpɔtɔɔ ngɛ je ɔ mi nɛ nihi buu mɛ, kɛ ma kudɔli ɔmɛ tsuo si. Dɛgutsɛmɛ nɛ a bui mɛ, nɛ a le kaa mumi ohiatsɛmɛ ji mɛ ɔ, mɛ mohu nɛ Mawu maa wo a hɛ mi nyami. Yesu ha nɛ e pee heii kaa tsakemi ngua ko ngɛ nɔ yae. E de mɛ ke:

‘Mose Mlaa a, kɛ níhi nɛ Gbali ɔmɛ ngma a tsu ní kɛ ya si Yohane Nɔ Baptisilɔ ɔ yi nɔ. Kɛ je jamɛ a be ɔ, sane kpakpa a nɛ kɔɔ Mawu Matsɛ Yemi ɔ he ɔ, lɔ ɔ nɛ a ngɛ fiɛɛe. Nɛ nɔ tsuaa nɔ ngɔ e he kɛ ngɛ mi woe kã nya. E he wɛ kaa hiɔwe kɛ zugba maa be kɛ ho, kaa a maa po Mlaa a mi ngu kake ngmelu mi.’ (Luka 3:18; 16:16, 17) Mɛni blɔ nɔ nɛ Yesu munyu ɔ tsɔɔ kaa tsakemi ko ngɛ nɔ yae?

Farisi bi ɔmɛ kɛ mlaa tsɔɔli ɔmɛ fĩaa kaa a yeɔ Mose Mlaa a nɔ. Mo kai kaa benɛ Yesu tsa hɛ yuyuilɔ ko ngɛ Yerusalem ɔ, Farisi bi ɔmɛ si a gugue nɛ a de ke: “Wɔɔ lɛɛ Mose kaseli ji wɔ. Wa le kaa Mawu kɛ Mose tu munyu.” (Yohane 9:13, 28, 29) Mlaa a nɛ a gu Mose nɔ kɛ ha mɛ ɔ maa ye bua he si bali konɛ ke Yesu nɛ ji Mesia a ba a, a nyɛ nɛ a yo lɛ. Yohane Nɔ Baptisilɔ ɔ de nihi kaa Yesu ji Mawu To Bi ɔ nɛ. (Yohane 1:29-34) Kɛ je benɛ Yohane bɔni fiɛɛmi ɔ, Yuda bi nɛ a baa a he si, titli ɔ, nihi nɛ a ní ngɛ mɔbɔ ɔ bɔni ‘Mawu Matsɛ Yemi’ sɛ gbi ɔ tue bumi. Ngɛ anɔkuale mi ɔ, “sane kpakpa” ko ngɛ kɛ ha nihi nɛ a suɔ kaa a maa pee Mawu Matsɛ Yemi ɔ mi bimɛ konɛ a ná he se ɔ.

Enɛ ɔ tsɔɔ kaa Mose Mlaa a tsu e yi mi tomi he ní, ejakaa e ye bua nɛ a na Mesia a. Enɛ ɔ he ɔ, se nami ba he, nɛ e he be hiae nɛ a ya nɔ nɛ a hi si ngɛ mlaa a sisi hu. Kaa nɔ hyɛmi nɔ́ ɔ, ngɛ Mose Mlaa a nya a, a ma nyɛ maa da níhi fuu a nɔ kɛ po gba mi, se Yesu tsɔɔ kaa “nɔ tsuaa nɔ nɛ fieɔ e yo, nɛ e ya ngɔɔ yo kpa a, e puɛ gba; nyumu nɛ ya ngɔɔ yo nɛ e huno fie lɛ ɔ, lɛ hu e puɛ gba.” (Luka 16:18) Nɔ́ nɛ Yesu de nɛ ɔ ha nɛ Farisi bi ɔmɛ a mi mi fu wawɛɛ!

 Se Yesu ya nɔ nɛ e ngɔ nɔ́ hetomi nɔ́ ko kɛ tsu ní kɛ ma tsakemi ngua ko nɛ ngɛ nɔ yae ɔ nɔ́ mi. Nɔ́ hetomi nɔ́ ɔ kɔɔ nyumuhi enyɔ komɛ a he. Tsakemi ngua ko ba ngɛ mɛ tsuo a si himi mi. Mo ha nɛ e hi o juɛmi mi kaa Farisi bi ɔmɛ nɛ a suɔ sika, nɛ nihi buu mɛ wawɛɛ ɔ ngɛ lejɛ ɔ benɛ Yesu ngɔ nɔ́ hetomi nɔ́ nɛ ɔ kɛ tsu ní ɔ.

Yesu de ke: “Nyumu niatsɛ ko hi si. E woɔ kploba tade [‘alamua tu su tade kɛ kploba tade,’ NW] nɛ ngɛ fɛu, nɛ he jua wa; nɛ daa nɛ ɔ, e yeɔ ní kpakpa, nɛ e náa bua jɔmi. Nyumu ohiatsɛ ko hu hi si kɛ e he pahi fuu bami; nɛ a tsɛɛ lɛ Lazaro. Ke pee ɔ, a ngɔɔ lɛ ba fɔɔ niatsɛ ɔ agbo nya, nɛ e jloɔ lɛ kaa e ná bibliwi nɛ jeɔ niatsɛ ɔ okplɔɔ ɔ nɔ pueɔ si ɔ eko nɛ e ye. Gbehi po baa ba lɔɔ e pa amɛ a nɔ.”​​—Luka 16:19-21.

Farisi bi ɔmɛ suɔ sika, enɛ ɔ he ɔ, e ngɛ heii kaa mɛ ji “niatsɛ” nɛ Yesu tu e he munyu ɔ nɛ. Jami nya dali nɛ ɔmɛ ngɛ kaa nɔ ko nɛ woɔ tade nguanguahi nɛ a he jua wa. A ngɛ he lo nya níhi fuu, nɛ he blɔhi nɛ a ngɛ ngɛ a jami ɔ mi ɔ ha nɛ a pee kaa niatsɛmɛ. Ablade tade klɔii nɛ hɛɛ alamua tu su nɛ a woɔ ɔ daa si ha blɔ nya nɛ ngɛ nyami nɛ a ngɛ ɔ, nɛ kploba tade nɛ a woɔ ɔ hu daa si ha bɔ nɛ mɛ nitsɛmɛ a buu a he dali ha a.​​—Daniel 5:7.

Kɛ niatsɛmɛ nɛ ɔmɛ buu ohiatsɛmɛ loo nimli gu ɔmɛ kɛɛ? Jami hɛ mi nyɛɛli ɔmɛ tsɛɛ mɛ ke  ‛am ha·’aʹrets’ loo zugba mi nimli loo nihi nɛ a li Mawu Mlaa a, nɛ a susu kaa e sɛ nɛ a tsɔɔ mɛ mlaa a hulɔ. (Yohane 7:49) Jã ji bɔ nɛ ‘ohiatsɛ nɛ a tsɛɛ lɛ Lazaro’ ɔ si fɔfɔɛ ngɛ. E jloɔ lɛ kaa e ma ná “bibliwi nɛ jeɔ niatsɛ ɔ okplɔɔ ɔ nɔ kɛ pueɔ si ɔ eko nɛ e ye.” Nimli gu ɔmɛ ngɛ kaa Lazaro nɛ pahi ngɛ e he ɔ, enɛ ɔ he ɔ, a buu mɛ kaa a sɛ ngɛ Mawu hɛ mi.

Jã nɛ níhi ngɛ loko Yesu ba, se Yesu le kaa be su nɛ níhi ma tsake kɛ ha nihi nɛ a ngɛ kaa niatsɛ ɔ, kɛ nihi nɛ a ngɛ kaa Lazaro ɔ tsuo.

Yesu tsa nɔ́ hetomi nɔ́ ɔ nɔ nɛ e tsɔɔ tsakemi ngua nɛ ba a. E de ke: “Ohiatsɛ ɔ ba gbo, nɛ bɔfohi ba ngɔ lɛ kɛ ho Abraham mi si ya. Niatsɛ ɔ hu ba gbo, nɛ a pu lɛ. Benɛ e ngɛ haomi nɛ nya wa mi ngɛ gbeje, nɛ e wo e yi nɔ nɛ e maa hyɛ ɔ, Abraham ji nɛ ngɛ lokoo, kɛ Lazaro ngɛ e kasa nya.”​​—Luka 16:22, 23.

Nihi nɛ a ngɛ Yesu tue bue ɔ le kaa Abraham gbo momoomo, nɛ e ngɛ Yɔkɔ mi tɔɔ. Ngmami ɔ tsɔɔ kaa nihi nɛ a ngɛ Yɔkɔ mi, loo Gbeje hyɛ we nɔ, nɛ a tu we munyu, nɛ jã ji bɔ nɛ Abraham hu si fɔfɔɛ ngɛ. (Fiɛlɔ 9:5, 10) Ke jã a, lɛɛ kɛ jami hɛ mi nyɛɛli ɔmɛ maa nu Yesu nɔ́ hetomi nɔ́ nɛ ɔ sisi kɛɛ? Nɛ mɛni Yesu ngɛ hlae nɛ a na ngɛ nimli gu ɔmɛ kɛ jami hɛ mi nyɛɛli ɔmɛ nɛ a suɔ sika a, a he?

Yesu sɛ hlami nɛ e de ke: ‘Mose Mlaa a, kɛ níhi nɛ Gbali ɔmɛ ngma a tsu ní kɛ ya si Yohane Nɔ Baptisilɔ ɔ yi nɔ, se kɛ je jamɛ a be ɔ mi ɔ, sane kpakpa a nɛ kɔɔ Mawu Matsɛ Yemi ɔ he ɔ ji nɔ́ nɛ a ngɛ fiɛɛe.’ Enɛ ɔ he ɔ, Yohane kɛ Yesu a fiɛɛmi ní tsumi ɔ ha nɛ Lazaro kɛ niatsɛ ɔ tsuo a gbo ngɛ blɔ ko nɔ, nɛ a si fɔfɔɛ tsake ngɛ Mawu hɛ mi.

Jami hɛ mi nyɛɛli ɔmɛ ha nɛ mumi mi hwɔ ye ohiatsɛmɛ ɔmɛ. Se Matsɛ Yemi ɔ he sɛ gbi ɔ nɛ Yohane Nɔ Baptisilɔ ɔ kɛ Yesu fiɛɛ ɔ tue nɛ a bu ɔ ye bua mɛ. Be ko nɛ be ɔ, jinɛ ‘bibliwi nɛ jeɔ jami hɛ mi nyɛɛli ɔmɛ a mumi mi okplɔɔ ɔ nɔ kɛ pueɔ si ɔ,’ lɔ ɔ nɛ a yeɔ. Se amlɔ nɛ ɔ, a ngɔ anɔkualehi nɛ ngɛ Ngmami ɔ mi ɔ kɛ ngɛ mɛ lɛe kɛ gu ní kpakpahi nɛ Yesu ngɛ tsɔɔe ɔ nɔ. E ngɛ kaa piɔ lɛɛ Yehowa Mawu wo a hɛ mi nyami.

Se jami hɛ mi nyɛɛli nɛ a ji niatsɛmɛ ɔmɛ lɛɛ a ku tso wo a tue mi, nɛ Matsɛ Yemi ɔ he sɛ gbi ɔ nɛ Yohane kɛ Yesu fiɛɛ ɔ tsuo be ngɛ a tue se. (Mateo 3:1, 2; 4:17) Sɛ gbi ɔ ha nɛ a mi mi fu, nɛ e ha nɛ a he sãa mɛ. Enɛ ɔ tsɔɔ kaa Mawu kɛ kojomi nɛ nya wa maa ba a nɔ. (Mateo 3:7-12) Jami hɛ mi nyɛɛli nɛ a suɔ sika nɛ ɔ ná jinɛ Yesu kɛ e kaseli ɔmɛ kpa Mawu sɛ  gbi ɔ fiɛɛmi konɛ a he mi nɛ jɔ mɛ. A ngɛ kaa niatsɛ ɔ nɛ ngɛ nɔ́ hetomi nɔ́ ɔ mi ɔ pɛpɛɛpɛ. Niatsɛ ɔ de ke: “Tsaatsɛ Abraham lee! I ngɛ nɔ́ nae tsɔ ngɛ la nɛ ɔ mi! Lɔ ɔ he ɔ, naa mi mɔbɔ oo, naa mi mɔbɔ! Moo tsɔ Lazaro nɛ e ngɔ e nine nguɛ nya ya sɔ nyu mi, nɛ e kɛ ba jɔɔ ye lilɛ he ha mi oo, i kpa mo pɛɛ!”​​—Luka 16:24.

Se e be hie jã, ejakaa jami hɛ mi nyɛɛli ɔmɛ a kpɛti nihi fuu be tsakee. Níhi nɛ “Mose kɛ gbali ɔmɛ” de nɛ lɔ ɔ ko ye bua mɛ nɛ a ko kplɛɛ Yesu nɔ kaa lɛ ji Mesia kɛ Matsɛ nɛ Mawu hla a, a bui tue fɛɛ. (Luka 16:29, 31; Galatia Bi 3:24) Jehanɛ ɔ se hu ɔ, jami hɛ mi nyɛɛli ɔmɛ bɛ a he si konɛ ohiatsɛmɛ ɔmɛ nɛ a ngɛ Yesu se nyɛɛe nɛ Mawu kplɛɛ a nɔ ɔ nɛ a ye bua mɛ. Yesu kaseli ɔmɛ be nyɛe maa laa anɔkuale ɔ nɔ, nɛ a be nyɛɛe maa ha he bo hulɔ konɛ jami hɛ mi nyɛɛli ɔmɛ a he kó sãa mɛ. Ngɛ nɔ́ hetomi nɔ́ ɔ mi ɔ, Yesu tsɔɔ nɔ́ nɛ “Tsaatsɛ Abraham” de niatsɛ ɔ. E de ke:

“Ye bi, kai kaa o wami be mi ɔ, o ná ní kpakpahi babauu, be mi nɛ Lazaro lɛɛ e ná ní yayamihi sɔuu. Se piɔ lɛɛ e ná bua jɔmi, nɛ moo lɛɛ o ngɛ nɔ́ nae. Se enɛ ɔ tsuo se ɔ, dɔ ngua ko ngɛ waa kɛ nyɛ wa kpɛti, konɛ nɔ ko kó nyɛ nɛ e je wa ngɔ kɛ ya nyɛ ngɔ, loo e je nyɛ ngɔ kɛ ba wa ngɔ.”​​—Luka 16:25, 26.

Tsakemi ngua nɛ ba nɛ ɔ sa saminya! Enɛ ɔ tsɔɔ kaa jami hɛ mi nyɛɛli nɛ ɔmɛ ngɛ nɔ́ nae, se he si bali nɛ a kplɛɛ Yesu nɔ ɔ lɛɛ a he mi jɔ mɛ, nɛ a ngɛ mumi mi niye ní babauu náe. (Mateo 11:28-30) Nyɔhiɔ bɔɔ komɛ a se ɔ, tsakemi nɛ ɔ pee heii benɛ a ngɔ somi ehe ɔ kɛ da Mlaa somi ɔ nane mi ɔ. (Yeremia 31:31-33; Kolose Bi 2:14; Hebri Bi 8:7-13) Benɛ Mawu ngɔ mumi klɔuklɔu ɔ kɛ pue kaseli ɔmɛ a nɔ ngɛ jeha 33 ngɛ Pentecoste ligbi ɔ nɔ ɔ, e pee heii kaa Mawu kua Farisi bi ɔmɛ kɛ mlaa tsɔɔli ɔmɛ, nɛ e kplɛɛ Yesu kaseli ɔmɛ mohu a nɔ.