Yesu tsu ní babauu ngɛ e sɔmɔmi ní tsumi ɔ mi ngɛ Galilea. Se benɛ Yesu de ke: “E hia kaa ma ya fiɛɛ Mawu matsɛ yemi ɔ he sane kpakpa a ngɛ ma kpa amɛ a mi hulɔ” ɔ, e ngɛ tsɔɔe kaa pi Galilea pɛ nɛ e sa kaa e fiɛɛ ngɛ. Lɔ ɔ he ɔ, e ya ‘fiɛɛ ngɛ Yudea kpe he ɔmɛ’ hulɔ. (Luka 4:43, 44) Sisi numi ngɛ enɛ ɔ he, ejakaa e su gbiɛ be, nɛ e piɛ bɔɔ nɛ a maa ye gbijlɔ ko ngɛ Yerusalem.

A ngma níhi nɛ Yesu tsu ngɛ Galilea a he munyu fuu ngɛ Sane Kpakpa a mi pe níhi nɛ e tsu ngɛ Yudea a. E ngɛ mi kaa nihi bui Yesu tue ngɛ Yudea mohu lɛɛ, se lɔ ɔ ha we nɛ e kpa fiɛɛmi, nɛ lɔ ɔ ha we nɛ e kpa ní kpakpahi nɛ e peeɔ ngɛ he tsuaa he nɛ e yaa a peemi hulɔ.

E be kɛe nɛ Yesu maa ya Yerusalem, nɛ ji Yuda bi a ma ngua a mi nɛ e ma ya ye jeha 31 Hetsɔmi ɔ. Taku ko nɛ a tsɛɛ ke Betesda kɛ e he ablanaa ngɛ To Agbo ɔ nɛ ngɛ Yerusalem ɔ kasa nya. Nihi hii lejɛ ɔ be tsuaa be. Hɛ yuyuili, kɛ glɔtsɛmɛ fuu yaa taku nɛ ɔ he. Mɛni he je? Ejakaa nihi fuu he ye kaa ke nyu ɔ klɛ nɛ a tu kɛ nɔ mi ɔ, a ma ná tsami.

Benɛ e su Hejɔɔmi ligbi ɔ, Yesu ya na nyumu ko ngɛ taku ɔ he nɛ e nu hiɔ jeha 38 sɔuu. Yesu bi lɛ ke: “O suɔ nɛ a tsa mo lo?” Hiɔtsɛ ɔ he nɔ ke, “Nyɔmtsɛ, ke a ba klɛ nyu ɔ mi kikɛ nɛ ɔ, i be nɔ ko nɛ ma wo mi ya fɔ taku ɔ mi. Be tsuaa be ɔ, ke ma su lejɛ ɔ, nɔ kpa sɛ ye hlami ya nɔ mi momo.”​​—Yohane 5:6, 7.

Yesu de nɔ́ ko nɛ ha nɛ nyumu ɔ kɛ nihi tsuo nɛ a ngɛ lejɛ ɔ a nya kpɛ a he. E de nyumu ɔ ke: “Tee si, wo o sa a nɛ o nyɛɛ.” (Yohane 5:8) Kɛkɛ nɛ nyumu ɔ pee kaa bɔ nɛ Yesu fa lɛ ɔ. Amlɔ nɔuu nɛ e hiɔ ɔ laa, nɛ e wo e sa a nɛ e bɔni nyɛɛmi!

Benɛ Yuda bi ɔmɛ na nyumu ɔ, a bua jɔɛ, nɛ a bɔni e hɛ mi munyu tumi nyanyaanya. A de lɛ ke: “Mwɔnɛ ɔ, Hejɔɔmi ligbi; wa mlaa a ngmɛ́ blɔ kaa o hɛɛɔ o sa.” Nyumu ɔ he nɔ ke: “Nɔmlɔ nɛ tsa mi ɔ lɛ de mi ke ma wo ye sa a nɛ ma nyɛɛ.” (Yohane 5:10, 11) Yuda bi ɔmɛ tu munyu kɛ si Yesu kaa e tsa nyumu ɔ ngɛ Hejɔɔmi ligbi ɔ nɔ.

A bi lɛ ke: “Mɛnɔ lɛ de mo ke o pee jã a?” Mɛni he je nɛ a bi lɛ sane nɛ ɔ? Ejakaa jamɛ a be mi ɔ, Yesu “sã e he nɛ e je,” nɛ nyumu ɔ li e biɛ hulɔ. (Yohane 5:12, 13) Se nyumu ɔ kɛ Yesu maa kpale kpe ekohu. Pee se ɔ, nyumu ɔ ya na Yesu ngɛ sɔlemi we ɔ, nɛ e yo kaa lɛ nɛ e tsa lɛ ngɛ taku ɔ he ɔ nɛ.

Nyumu ɔ kpale ya Yuda bi ɔmɛ nɛ a bi lɛ ke e tsɔɔ mɛ nɔ nɛ tsa lɛ ɔ a ngɔ. E ya de mɛ ke Yesu lɛ tsa lɛ. Benɛ a nu nɔ́ nɛ ɔ, nɔuu nɛ a ya ná Yesu. Anɛ a ngɛ hlae nɛ a le blɔ nɔ nɛ Yesu gu kɛ tsa nyumu ɔ lo? Dɛbi. Ngɛ anɔkuale mi ɔ, a ya kaa a yaa hla Yesu he tɔmi akɛnɛ e tsa nɔ ko ngɛ Hejɔɔmi ligbi ɔ nɔ ɔ he je. Enɛ ɔ he ɔ, a te si kɛ wo lɛ!