NÍ KASEMI 01
Kɛ Baiblo ɔ Maa Ye Bua Mo Ha Kɛɛ?
Wɔ tsuo wa ngɛ sane bimihi nɛ kɔɔ wami, nɔ́ nami, gbenɔ, kɛ hwɔɔ se he, nɛ wa suɔ kaa wa ma ná a heto. Wa hia yemi kɛ buami konɛ wa nyɛ nɛ waa da nyagbahi nɛ waa kɛ kpeɔ daa ligbi kɛ kɔ sika he ɔ nya. Jehanɛ se hu ɔ, wa hia yemi kɛ buami ngɛ bɔ nɛ wa ma plɛ kɛ ná bua jɔmi ngɛ wa weku ɔ mi ɔ hu he. Nihi fuu tsɔɔ kaa Baiblo ɔ yeɔ bua mɛ nɛ a náa si himi ɔ mi sane bimihi nɛ a he hia amɛ a heto. E haa nɛ a náa ga womihi ngɛ a si himi mi daa ligbi. Anɛ o susu kaa Baiblo ɔ ma nyɛ maa ye bua nɔ fɛɛ nɔ lo?
1. Mɛni sane bimi komɛ nɛ Baiblo ɔ ha a heto?
Baiblo ɔ ha sane bimihi nɛ a he hia nɛ ɔmɛ a heto: Kɛ wami plɛ kɛ je sisi ha kɛɛ? Mɛni yi mi tomi he je nɛ wa ngɛ wami mi? Mɛni he je nɛ wa naa nɔ́? Ke nɔ ko gbo ɔ, mɛni si fɔfɔɛ mi e ya jee? Ke nɔ fɛɛ nɔ suɔ tue mi jɔmi ɔ, lɛɛ mɛni he je nɛ ta pɔ he jã a? Anɛ a ma kpata zugba a hɛ mi hwɔɔ se lo? Baiblo ɔ woɔ wɔ he wami kaa wa hla sane bimi nɛ ɔmɛ a heto, nɛ hetohi nɛ Baiblo ɔ kɛ ha a ha nɛ nimli ayɔhi abɔ a tsui nɔ a mi.
2. Kɛ Baiblo ɔ ma nyɛ maa ye bua wɔ ha kɛɛ konɛ wa ná bua jɔmi daa ligbi?
Baiblo ɔ woɔ wɔ ga kpakpa. Kaa nɔ hyɛmi nɔ́ ɔ, e tsɔɔ wekuhi blɔ nɔ nɛ a maa gu kɛ ná bua jɔmi nitsɛnitsɛ. E tsɔɔ blɔ nɔ nɛ wa maa gu kɛ da yeyeeye peemi nya, kɛ nɔ́ nɛ wa maa pee konɛ wa bua nɛ jɔ wa ní tsumi he. Ke wa ngɛ womi nɛ ɔ kasee ɔ, o ma ba na nɔ́ nɛ Baiblo ɔ de kɛ kɔ sane nɛ ɔmɛ a he, kɛ ní kpahi fuu. O ma ba na kaa ‘Ngmami ɔ tsuo [nɛ ji nɔ́ fɛɛ nɔ́ nɛ ngɛ Baiblo ɔ mi ɔ] he ngɛ se nami.’—2 Timoteo 3:16.
A kɛ womi nɛ ɔ da we Baiblo ɔ nane mi. Mohu ɔ, e maa ye bua mo konɛ mo nitsɛ o kase Baiblo ɔ. Enɛ ɔ he ɔ, wa ngɛ mo he wami woe nɛ o kane ngmamihi nɛ a tsɛ se ngɛ ní kasemi ɔmɛ a mi ɔ, nɛ o kɛ to nɔ́ nɛ o ngɛ kasee ɔ he.
MOO KASE BABAUU
Moo kase bɔ nɛ Baiblo ɔ ye bua nihi ha, bɔ nɛ o bua ma nyɛ maa jɔ e kanemi he ha, kɛ nɔ́ he je nɛ e he hia nɛ a ye bua mo konɛ o nu sisi ɔ.
3. Baiblo ɔ ma nyɛ maa tsɔɔ wɔ blɔ
Baiblo ɔ ngɛ kaa kane ko nɛ hyɛɛ nɔ́ saminya. Baiblo ɔ ma nyɛ maa ye bua wɔ konɛ waa mwɔ yi mi kpɔhi nɛ da, nɛ e ma nyɛ maa ye bua wɔ konɛ waa le níhi nɛ maa ba hwɔɔ se ɔ hulɔ.
Nyɛɛ kane La 119:105, nɛ nyɛ susu sane bimihi nɛ nyɛɛ se nɛ ɔmɛ a he:
-
Kɛ nɔ nɛ ngma la nɛ ɔ naa Baiblo ɔ ha kɛɛ?
-
Kɛ mo hu o naa Baiblo ɔ ha kɛɛ?
4. Baiblo ɔ ma nyɛ ma ha wa sane bimi ɔmɛ a heto
Baiblo ɔ ha yo ko e sane bimihi nɛ e nɛ́ a heto jehahi babauu ɔ a heto. Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
-
Ngɛ video ɔ mi ɔ, mɛni sane bimihi nɛ yo ɔ ngɛ a he susue?
-
Kɛ Baiblo ɔ nɛ e kase ɔ ye bua lɛ ha kɛɛ?
Baiblo ɔ woɔ wɔ he wami kaa wa bi sanehi. Nyɛɛ kane Mateo 7:7, nɛ nyɛ susu sane bimi nɛ ɔ he:
-
Anɛ o ngɛ sane bimi komɛ nɛ Baiblo ɔ ma nyɛ ma ha a heto lo?
5. O bua ma nyɛ maa jɔ Baiblo ɔ kanemi he
Nihi fuu a bua jɔ Baiblo ɔ kanemi he, nɛ a ngɛ he se náe. Mo je VIDEO ɔ, nɛ nyɛ susu sane bimihi nɛ nyɛɛ se nɛ ɔmɛ a he.
-
Ngɛ video ɔ mi ɔ, kɛ ji bɔ nɛ nihewi ɔmɛ kɛ yihewi ɔmɛ naa ní kanemi ha kɛɛ?
-
Mɛni he je nɛ Baiblo ɔ kanemi lɛɛ a bua jɔ he ɔ?
Baiblo ɔ de ke e ma ha wɔ blɔ tsɔɔmihi nɛ́ maa wo wa bua, nɛ jehanɛ se hu e ma ha nɛ́ wa ná hɛ kɛ nɔ fɔmi. Nyɛɛ kane Roma Bi 15:4, nɛ nyɛ susu sane bimi nɛ ɔ he:
-
Anɛ o suɔ kaa o maa le babauu kɛ kɔ níhi nɛ haa nɛ wa náa bua womi kɛ hɛ kɛ nɔ fɔmi nɛ a tu he munyu ngɛ Ngmami nɛ ɔ mi ɔ he lo?
6. Ni kpahi ma nyɛ maa ye bua wɔ konɛ waa nu Baiblo ɔ sisi
Ngɛ Baiblo ɔ nɛ nihi fuu kaneɔ ngɛ a dɛ he ɔ se ɔ, a yɔse hu kaa ni kpahi ma nyɛ maa ye bua mɛ konɛ a nu Baiblo ɔ sisi. Nyɛɛ kane Ní Tsumi 8:26-31, nɛ nyɛ susu sane bimi nɛ ɔ he:
-
Mɛni blɔ nɔ wa maa gu kɛ nu Baiblo ɔ sisi?—Hyɛ kuku 30, 31.
Etiopia nyumu ɔ hia yemi kɛ buami konɛ e nu Ngmami ɔ sisi. Mwɔnɛ ɔ hu ɔ, nihi fuu yɔse kaa ni kpahi ma nyɛ maa ye bua mɛ konɛ a nu Baiblo ɔ sisi
NI KOMƐ DEƆ KE: “E ji be puɛmi kaa nɔ ko maa kase Baiblo ɔ.”
-
Ke nɔ ko de jã a, mɛni o ma de lɛ, nɛ mɛni he je?
NYA MWƆMI
Baiblo ɔ woɔ wɔ ga ngɛ wa daa ligbi si himi he, nɛ e haa wɔ sane bimihi nɛ a he hia amɛ hu a heto, nɛ jehanɛ se hu ɔ, e haa nɛ nihi náa bua womi kɛ hɛ kɛ nɔ fɔmi.
Mi Nylɔmi
-
Mɛni ga womihi nɛ wa ma nyɛ maa na ngɛ Baiblo ɔ mi?
-
Mɛni sane bimi komɛ nɛ Baiblo ɔ ha a heto?
-
Mɛni nɛ o suɔ nɛ o maa kase ngɛ Baiblo ɔ mi?
NÍ KPAHI NƐ MAA YE BUA MO
Moo kase bɔ nɛ ga womi nɛ ngɛ Baiblo ɔ mi ɔ maa ye bua wɔ mwɔnɛ ɔ ha.
Moo hyɛ bɔ nɛ Baiblo ɔ ye bua nyumu ko nɛ kɛ je e jokuɛ mi tɔɔ ɔ, e susu kaa se nami be e he ɔ ha.
Moo kase ga womihi nɛ Baiblo ɔ kɛ ha nɛ maa ye bua wekuhi.
“Níhi 12 Nɛ Haa Nɛ Wekuhi Yeɔ Manye” (O Hɛ Nɛ Tsɛ̃! No. 2 2018)
Moo kase bɔ nɛ Baiblo ɔ ha nɛ wa le nɔ tutuutu nɛ e ngɛ je ɔ nɔ yee ɔ.
Mɛni He Je Nɛ E Sa Kaa Waa Kase Baiblo ɔ?—Nɔ́ Nɛ E Nya Kɛ (3:14)
Eko ɔ, O Bua Maa Jɔ Enɛ ɔ Hu He
SANEHI NƐ NIHI PƆƆ BIMI
Mɛni Blɔ Nya Yehowa Odasefohi To Nɛ́ Nihi Kɛ Kaseɔ Baiblo ɔ?
Yehowa Odasefohi kɛ nihi kaseɔ Baiblo ɔ nɛ a he we nɔ́ ko. Ke a kɛ mo ngɛ Baiblo ɔ kasee ɔ, o ma nyɛ maa ngɔ Baiblo sisi tsɔɔmi fɛɛ ko kɛ tsu ní. O ma nyɛ maa fɔ o weku ɔ, aloo o huɛmɛ nine nɛ a ba piɛɛ o he kɛ kase ní ɔ.
