1-3. (a) Mɛni haomihi nɛ ohia kɛ baa wekuhi babauu a nɔ mwɔnɛ ɔ, nɛ mɛni blɔ nɔ ni komɛ guɔ kɛ tsuɔ he ní? (Moo hyɛ foni nɛ ngɛ ni kasemi ɔ sisije ɔ.) (b) Ke fɔlɔ ko ngɛ e bi he jee kɛ yaa ma se ɔ, mɛni he e susuɔ titli?

DAA ligbi ɔ Marilyn huno James jeɔ ní tsumi kɛ baa we mi kɛ pɔtɔtɔɛ, pohu e hiɔwo sui nɔ́ ko. * Marilyn suɔ nɛ e gbɔ e huno ɔ tlomi nɔ. E suɔ nɛ e he afɛu níhi nɛ e binyumu Jimmy sukuu bimɛ ɔmɛ ngɛ ɔ eko ha Jimmy. Marilyn suɔ hu nɛ e ye bua e weku li, nɛ e suɔ nɛ e to nɔ́ ko si kɛ ha hwɔɔ se hulɔ. E huɛmɛ fuu hia blɔ kɛ ho ma kpahi a nɔ ya konɛ a ya tsu ní nɛ a ná sika fuu. Marilyn hu yi mi pee lɛ enyɔɔnyɔ kaa e ya loo e ko ya. Mɛni he je?

² Marilyn kɛ e weku ɔ peeɔ kake kɛ jaa Yehowa daa, enɛ ɔ he ɔ, e susu nɔ́ nɛ maa ba ke e je a he kɛ ho ɔ he. Se e na kaa ni komɛ je a wekuhi a he kɛ ho ma se ya be kɛkɛɛ, nɛ loloolo ɔ, e ngɛ kaa nɔ́ nɛ a weku ɔmɛ nyɛ ngɛ Yehowa sɔmɔe. Se e yɔse kaa ke e je kɛ ho ma se ya a, e be nyɛe ma tsɔse e bi Jimmy. Anɛ e ma nyɛ ma ‘tsɔse lɛ, nɛ e maa wo lɛ ga kpakpa nɛ maa sa Yehowa hɛ mi’ ngɛ Intanɛti ɔ nɔ lo?—Efe. 6:4.

³ Marilyn bi ga womi. E ngɛ mi kaa e huno ɔ sume nɛ e je mohu lɛɛ, se e huno ɔ tsɔɔ kaa ke e ke kɛ̃ e maa ya a, e be e nya tsie. Asafo mi nikɔtɔmahi kɛ nyɛmimɛ kpahi wo lɛ ga kaa e ko  ya, se nyɛmimɛ yihi babauu wo lɛ he wami kaa e ya. A de lɛ ke: “Ke o suɔ o weku ɔ, o maa ya. Ke o ya a, loloolo ɔ, o ma nyɛ ma sɔmɔ Yehowa ngɛ lejɛ ɔ.” E ngɛ mi kaa e juɛmi ngɛ lɛ pee enyɔɔnyɔ mohu, se e kɛ e huno James kɛ e bi Jimmy ye sɛ nɛ e je a he kɛ ho ma se ya konɛ e ya tsu ní. E de mɛ ke, “E be kɛe nɛ ma ba.”

4. Mɛni he je nɛ nihi fuu hiaa blɔ kɛ yaa ma se ɔ, nɛ ke a ho ɔ, mɛnɔmɛ a siɔ a bimɛ ɔmɛ kɛ haa?

⁴ Yehowa sume nɛ e sɔmɔli nɛ a ye ohia. Kɛ je blema tɔ ɔ, Yehowa we bi hiaa blɔ kɛ yaa ma kpahi a nɔ ngɛ ohia he je. (La 37:25; Abɛ 30:8) Yakob nɛ hi si blema a, sume nɛ hwɔ nɛ ye e weku ɔ. Enɛ ɔ he ɔ, e tsɔ e binyumu ɔmɛ kɛ ho Egipt ya konɛ a ya he niye ní kɛ ba. * (1 Mose 42:1, 2) Mwɔnɛ ɔ, nihi fuu hiaa blɔ kɛ yaa ma se, nɛ pi hwɔ he je. Eko ɔ, a ti nihi babauu hɛɛ nihi hiɔ nguanguahi. Ni komɛ hu peeɔ jã konɛ a weku ɔ nɛ ná si himi kpakpa. Nihi babauu jeɔ a hunomɛ aloo a yihi kɛ a bimɛ a he kɛ yaa Ablotsi, aloo he kpahi ngɛ mɛ nitsɛmɛ a mahi a mi konɛ a ya tsu ní nɛ a ná sika fuu. Behi fuu ɔ, a siɔ a bimɛ nɛ a wɛ ɔ kɛ haa a hunomɛ loo a yihi, a nyɛmimɛ, a nɛmɛ kɛ a namɛ, kɛ a weku li, aloo a huɛmɛ konɛ a hyɛ a nɔ ha mɛ. Ke nihi je a wekuhi a he kɛ ho ma se ya a, e haoɔ mɛ mohu lɛɛ, se a ti nihi fuu susu kaa ja a pee jã loko níhi a mi maa hi ha mɛ.

5, 6. (a) Mɛni Yesu de kɛ kɔ bua jɔmi kɛ si himi kpakpa nami he? (b) Mɛni helo nya níhi nɛ Yesu tsɔɔ kaa e kaseli ɔmɛ ma nyɛ maa sɔle ngɛ he? (d) Mɛni blɔ nɔ Yehowa guu kɛ jɔɔ wɔ?

⁵ Ngɛ Yesu be ɔ mi ɔ, nihi fuu hi si nɛ a ji ohiatsɛmɛ. Eko ɔ, mɛ hu a susu kaa ke a ná sika fuu ɔ, a bua maa jɔ nɛ a si himi maa pee kpakpa. (Mar. 14:7) Se Yesu sume nɛ a ngɔ a hɛ kɛ fɔ ní nami nɛ hiɔ si be kpiti pɛ ɔ nɔ, mohu ɔ, e suɔ nɛ a ngɔ a hɛ kɛ fɔ Yehowa nɔ. Lɛ nɛ e haa nɛ nɔ peeɔ niatsɛ daa. Ngɛ Yesu Yoku ɔ Nɔ Fiɛɛmi ɔ mi ɔ, e tsɔɔ kaa helo nya níhi kɛ wɔ nitsɛmɛ wa mɔde bɔmi be nyɛe ma ha nɛ wa ná bua jɔmi nitsɛnitsɛ. Mohu ɔ, huɛ bɔmi nɛ maa hi waa kɛ wa hiɔwe Tsɛ ɔ wa kpɛti ɔ nɛ ma ha wa ma ná bua jɔmi.

⁶ Ngɛ sɔlemi he nɔ hyɛmi nɔ́ nɛ Yesu pee ɔ mi ɔ, Yesu tsɔɔ kaa e sa nɛ waa sɔle kɛ bi wa daa ligbi hiami níhi aloo “nya ngma,” se pi ní nami. E gba mi kpoo nɛ e de e kaseli ɔmɛ ke: ‘Nyɛ ko to juetli ha nyɛ he ngɛ je nɛ ɔ mi. Se mohu nyɛɛ to juetli ha nyɛ he ngɛ hiɔwe.’ (Mat. 6:9, 11, 19, 20) Wa ma nyɛ ma ná nɔmi mami kaa Yehowa maa jɔɔ wɔ kaa bɔ nɛ e wo si ɔ. Ke Mawu jɔɔ nɔ ko ɔ, lɔ ɔ tsɔɔ kaa e kplɛɛ nɔ ɔ nɔ nɛ e haa nɔ ɔ e hiami níhi tsuo. Ngɛ anɔkuale mi ɔ, nɔ́ pɛ nɛ ma nyɛ ma ha nɛ wa ma ná bua jɔmi nitsɛnitsɛ ji nɛ waa kɛ wa hɛ maa fɔ wa Tsɛ nɛ e susuɔ wa he ɔ nɔ, se pi sika.—Kane Mateo 6:24, 25, 31-34.

7. (a) Mɛnɔmɛ nɛ Yehowa ngɔ ní tsumi kɛ wo a dɛ kaa a tsɔse bimɛ? (b) Mɛni he je nɛ e he hia nɛ huno ɔ kɛ yo ɔ tsuo nɛ a pee kake kɛ tsɔse a bimɛ ɔmɛ ɔ?

⁷ ‘Mawu Matsɛ Yemi ɔ kɛ níhi nɛ da ngɛ e hɛ mi nɛ wa ma hla kekle’ ɔ hu biɔ nɛ wa tsu wa weku mi blɔ nya ní tsumihi kaa bɔ nɛ Yehowa ngɛ hlae nɛ waa pee ɔ. Kaa nɔ hyɛmi nɔ́ ɔ, Mose Mlaa a fã fɔli kaa mɛ nitsɛmɛ a tsɔse a bimɛ konɛ a bimɛ ɔmɛ nɛ sɔmɔ Yehowa. (Kane 5 Mose 6:6, 7.) Mawu ngɔ ní tsumi nɛ ɔ kɛ wo huno ɔ kɛ yo ɔ a dɛ, se pi binɛmɛ kɛ binamɛ, loo ni kpahi. Matsɛ Salomo ngma ke: ‘Ye bi, ke o tsɛ ngɛ mo  tsɔsee ɔ, bu tue! Ke o nyɛ hu ngɛ mo ní tsɔɔe ɔ, ko kua!’ (Abɛ 1:8) Nɔ́ nɛ e ngɛ tsɔɔe ji kaa e sa nɛ fɔli enyɔ ɔmɛ tsuo nɛ a pee kake kɛ kudɔ a bimɛ ɔmɛ nɛ a tsɔɔ mɛ ní. (Abɛ 31:10, 27, 28) Ke bimɛ na kaa a fɔli pɔɔ Yehowa he munyu tumi, nɛ a sɔmɔɔ lɛ daa ligbi ɔ, mɛ hu a ma nyɛ maa pee jã.

8, 9. (a) Ke fɔli kɛ a bimɛ be he kake ɔ, mɛni tsakemihi lɔ ɔ kɛ ba a? (b) Ke fɔlɔ ko je e bimɛ a he kɛ ho ma se ya a, kɛ lɔ ɔ saa jokuɛwi ɔmɛ a je mi bami kɛ a mumi mi si dami he ha kɛɛ?

⁸ Nihi fuu nɛ a pee a juɛmi kaa a maa hia blɔ kɛ ya ma se ɔ yɔse kaa ke a ho ɔ, e maa hao a weku ɔ, se a li bɔ nɛ e maa ye a weku ɔ awi ha tutuutu. (Abɛ 22:3) * Benɛ Marilyn je nɔuu pɛ nɛ e hɛ bɔni jami ngɛ e weku ɔ he. E huno ɔ kɛ e binyumu ɔ hu a hɛ ja ngɛ e he. Jimmy biɔ e yayo daa ke, “Mɛni he je nɛ o je ye he ɔ?” Benɛ jehahi ba pue mi nɛ Marilyn bɛ ɔ, Marilyn yɔse kaa tsakemi ba e weku ɔ mi. Tsa pi Jimmy kɔmɔ ji lɛ hu. Nɔ́ nɛ ɔ dɔ Marilyn nɛ e de ke: “Jimmy kɛ mi pee we nɔ́ ko hu.”

⁹ Ke fɔli kɛ a bimɛ be he kake ɔ, lɔ ɔ ma nyɛ ma puɛ suɔmi nɛ ngɛ fɔli ɔmɛ kɛ a bimɛ a kpɛti ɔ, nɛ bimɛ ɔmɛ a je mi bami hu ma puɛ. * Nɔ́ nɛ pa hí kulaa ji ke bimɛ ɔmɛ wɛ, nɛ a fɔli je a he be kɛkɛɛ. Marilyn de Jimmy kaa e suɔ nɛ e hi ha lɛ Jimmy ɔ he je nɛ e hia blɔ ɔ nɛ. Se Jimmy susu kaa e nyɛ ɔ kua lɛ. Sisije ɔ, e hɛ ja ngɛ e nyɛ ɔ he wawɛɛ, se pee se ke e nyɛ ɔ ba slaa mɛ ɔ, tsa pi e kɔmɔ ji e nyɛ ɔ hu. Jimmy susu kaa e nyɛ ɔ ní peepee ɔ tsɔɔ we kaa e sa nɛ e je suɔmi kpo kɛ ha lɛ nɛ e bu lɛ. Jã nɛ jokuɛwi fuu nɛ a fɔli je a he ɔ hu susuɔ.—Kane Abɛ 29:15.

10. (a) Ke fɔli je a bimɛ a he nɛ a maneɔ mɛ po ɔ, kɛ bimɛ ɔmɛ peeɔ a ní ha kɛɛ? (b) Ke fɔlɔ ko ngɛ ma se kɛ ngɛ e bimɛ tsɔsee ɔ, mɛni haomi lɛ baa?

¹⁰ E ngɛ mi kaa Marilyn maneɔ e weku ɔ sika mohu lɛɛ, se e na kaa e ngɛ e biɔ fiee ngɛ e he. E ngɛ e bi ɔ tsɔɔe kaa helo nya níhi a he hia pe Mawu jami kɛ suɔmi nɛ maa hi weku mi bimɛ a kpɛti. (Abɛ 22:6) Jimmy de e nyɛ ɔ ke: “Koo kpale kɛ ba hu. Moo lɛɛ moo hi wɔ manee kɛkɛ.” Marilyn ba yɔse kaa e be nyɛe ma tsɔse e bi ɔ kɛ gu sɛ womi nɛ e maa ngma aloo tɛlifoo, aloo kɔmpiuta nɔ hu. E de ke, “O be nyɛe maa fua o bi ɔ ngɛ Intanɛti ɔ nɔ.”

11. (a) Ke fɔli je a wekuhi a he ya ngɛ ní tsue ngɛ ma se ɔ, kɛ e saa a gba si himi ɔ he ha kɛɛ? (b) Mɛni ha nɛ nyɛmiyo ko yɔse kaa e sa nɛ e kpale kɛ ho we ya konɛ e kɛ weku ɔ nɛ ya hi si ɔ?

 ¹¹ Huɛ bɔmi nɛ ngɛ Marilyn kɛ Yehowa a kpɛti ɔ bɔni mimiɛmi, nɛ jã kɛ̃ nɛ e ji ngɛ suɔmi nɛ ngɛ e kɛ e huno James a kpɛti ɔ hu blɔ fa mi. Daa otsi ɔ, si kake pɛ nɛ e yaa asafo mi kpe kɛ fiɛɛmi, be komɛ po lɛɛ e yɛ kulaa. E nitsumitsɛ ɔ hu ngɛ lɛ suɔmi bie. Akɛnɛ e kɛ e huno ɔ be he kake he je ɔ, e piɛ nguɛ nya nɛ mɛ tsuo a puɛ gba. E ngɛ mi kaa Marilyn kɛ e huno ɔ puɛ we gba mohu lɛɛ, se e ba yɔse kaa akɛnɛ mɛ ni enyɔ ɔmɛ tsuo a be he kake he je ɔ, a nyɛ we nɛ a wo a sibi a bua, konɛ a tsu a sibi a bɔmi nami mi he numihi a he ní kaa bɔ nɛ Baiblo ɔ tsɔɔ ɔ. A nyɛ we nɛ a susu níhi a he, nɛ a hyɛ a sibi a hɛ mi, nɛ a muɔ kɛ tsɔɔ a sibi, nɛ a pɛtɛ a sibi a he, nɛ a fua a sibi, nɛ a je “suɔmi” kpo kɛ tsɔɔ a sibi, nɛ a ná “bɔmi.” (Lahi 1:2; 1 Kor. 7:3, 5) Nɛ a nyɛ we nɛ a kɛ a binyumu ɔ nɛ pee kake kɛ ja Yehowa kɛ pi si hulɔ. Marilyn de ke: “Benɛ a tsɔɔ ngɛ kpe ngua ko sisi kaa loko weku mi bimɛ ma ná neneene wami ɔ, ja a peeɔ weku Mawu jami daa a, i na kaa e he hia nɛ ma kpale kɛ ho we ya. E sa nɛ ma dla huɛ bɔmi nɛ ngɛ i kɛ Yehowa wa kpɛti ɔ, konɛ ma ha nɛ suɔmi nɛ ngɛ i kɛ ye weku ɔ wa kpɛti ɔ hu mi nɛ wa.”

12. Mɛni ga Baiblo ɔ wo nihi nɛ a jeɔ a wekuhi a he kɛ yaa ma se ɔ?

¹² Benɛ Marilyn ba pee e juɛmi kaa e maa kpale kɛ ho we ya a, nihi fuu a bua jɔɛ he. Se asafo mi nikɔtɔmahi nɛ a ngɛ he nɛ e hia blɔ kɛ ho ɔ je e yi ngɛ hemi kɛ yemi kɛ kã nɛ e ná a he. Se ni komɛ nɛ mɛ hu a je a hunomɛ kɛ a yihi kɛ a bimɛ a he nɛ a kɛ lɛ ngɛ lejɛ ɔ a bua jɔɛ he. A kase we lɛ konɛ mɛ hu a kpale kɛ ho we ya, mohu ɔ, a bɔ mɔde kaa a maa fia e kɔni si tso. A de lɛ ke, “O ya be si nyɛe maa hi. Ke o kpale kɛ ho ɔ, mɛni o ma ya ye?” E sɛ nɛ nyɛmimɛ nɛ a jɔ̃ nihi kaa kikɛ ɔ a kɔni mi. Mohu ɔ, e sa nɛ a wo ‘yihewi ɔmɛ ga nɛ a suɔ a hunomɛ, kɛ a bimɛ nɛ a pee a he yigbayi kpakpahi nɛ le a we yi baami. Kɛkɛ ɔ, nɔ ko nɔ ko be Mawu munyu ɔ he munyu yaya tue.’—Kane Tito 2:3-5.

13, 14. Mɛni he je nɛ e biɔ hemi kɛ yemi loko nɔ ko ma nyɛ maa pee Yehowa suɔmi nya ní nɛ́ e be e weku li tue bue ɔ? Mo ha enɛ ɔ he nɔ hyɛmi nɔ́.

¹³ Behi fuu ɔ, bɔ nɛ a tsɔse nihi ha a, lɛ haa nɛ a jeɔ a hunomɛ aloo a yihi kɛ a bimɛ a he kɛ yaa ma se ɔ nɛ. A tsɔɔ mɛ kaa e sa nɛ a bu a weku li, titli ɔ, a fɔli tue pe nɔ tsuaa nɔ. Ja Kristofo no ko ngɛ hemi kɛ yemi nɛ mi wa loko e ma nyɛ maa pee e ní ngɛ blɔ kpa nɔ, konɛ e sa Yehowa hɛ mi.

 ¹⁴ Mo susu Carin sane ɔ he nɛ o hyɛ. E de ke: “Benɛ i fɔ ye binyumu Don ɔ, i kɛ ye huno ɔ wa ngɛ ní tsue ngɛ ma se. Jamɛ a be ɔ mi ɔ, kpaako i bɔni Baiblo ɔ kasemi. Ye weku li ɔmɛ tsuo ngɛ blɔ hyɛe kaa ma wo Don blɔ ya ha ye fɔli ɔmɛ konɛ a tsɔse lɛ kɛ yaa si níhi a mi maa hi ha wɔ.” Benɛ Carin de e weku li ɔmɛ kɛ e huno ɔ kaa ke a pee mɛni mɛni po ɔ, lɛ nitsɛ e ma tsɔse Don ɔ, a de lɛ ke e ngɛ godo nue, nɛ a muɔ lɛ. Carin de ke, “Munyu anɔkuale mi, jamɛ a be ɔ mi ɔ, i li tɔmi nɛ ngɛ he kaa ma ngɔ Don ya ha ye fɔli nɛ a hyɛ e nɔ. Se i le kaa Yehowa ngɔ bimɛ a tsɔsemi kɛ wo fɔli a dɛ.” Pee se nɛ Carin hɛɛ hɔ ekohu ɔ, e huno nɛ e pi Odasefo no ɔ, de lɛ ke a ya je hɔ ɔ. Juɛmi kpakpa nɛ Carin pee kɛ sɛ hlami ɔ ha nɛ e hemi kɛ yemi ɔ mi wa, enɛ ɔ he ɔ, e nyɛ nɛ e fi si nɛ e pee Yehowa suɔmi nya ní. Amlɔ nɛ ɔ, e kɛ e huno ɔ kɛ e bimɛ ɔmɛ a bua jɔ wawɛɛ kaa mɛ tsuo a ngɛ he kake. Kaa Carin wo e bimɛ ɔmɛ blɔ ya ha e fɔli ɔmɛ kaa tsɔse mɛ ha lɛ ɔ, níhi ko ya bɛ jã.

15, 16. (a) Mɛni blɔ nɔ a gu kɛ tsɔse Vicky? (b) Mɛni he je nɛ lɛɛ e ngɔɛ e biyo ɔ ya ha e mami nɛ tsɔse lɛ ɔ?

¹⁵ Odasefo no ko nɛ a tsɛɛ lɛ ke Vicky ɔ de ke: “I ya hi ye na ngɔ bɔɔ, se ye senɔ lɛɛ ye papaa kɛ ye yayo nɛ a tsɔse lɛ. Benɛ i ke i ya piɛɔ a he ɔ, suɔmi nɛ i ngɛ ha ye fɔli ɔmɛ ɔ he jɔ. Ye nyɛmiyo ɔ kɛ mɛ nyɛɔ sɛɛɔ ní faa, e fuaa mɛ, nɛ suɔmi nɛ ngɛ e kɛ mɛ a kpɛti ɔ mi wa. Imi lɛɛ kɛ ba si ye wami si nɛ ɔ po ɔ, i nyɛ we nɛ i suu a he tsɔ. I nyɛ we nɛ ma je suɔmi nɛ mi wa kpo kɛ tsɔɔ mɛ. I kɛ ye senɔ ɔ wa wo wa fɔli ɔmɛ si kaa wa maa hyɛ mɛ ngɛ a bwɔmi si. Imi lɛɛ akɛnɛ e ji ye blɔ nya ní tsumi kaa ma hyɛ a nɔ ɔ he je nɛ i ngɛ jã pee ɔ nɛ, se ye senɔ ɔ lɛɛ suɔmi nɛ e ngɛ kɛ ha mɛ he je nɛ e ngɛ mɛ hyɛɔ nɛ.

¹⁶ “Amlɔ ɔ nɛ ɔ, ye mami suɔ kaa ma wo ye bi yo ɔ ba ha lɛ nɛ e tsɔse lɛ, kaa bɔ nɛ e ngɔ mi ya ha lɛ hu e mami nɛ e tsɔse mi ɔ. I gu ga blɔ nɔ nɛ i kua. I kɛ ye huno ɔ wa suɔ nɛ wɔ nitsɛmɛ wa tsɔse wa bi ɔ konɛ e suɔ Yehowa. I sume nɛ suɔmi nɛ ngɛ i kɛ ye biyo ɔ wa kpɛti ɔ he nɛ jɔ.” Vicky le kaa loko níhi a mi maa hi ha lɛ ɔ, ja e kɛ Yehowa sisi tomi mlaahi tsu ní, se pi helo nya níhi a se dimi kɛ weku li a tue nɛ e maa bu. Yesu de heii ke: ‘Nɔ ko be nyɛe ma sɔmɔ Nyɔmtsɛmɛ enyɔ.’—Mat. 6:24; 2 Mose 23:2.

17, 18. (a) Mɛni e biɔ nɛ Kristofohi nɛ a mwɔ a yi mi kpɔ kaa a maa pee? (b) Mɛni sane bimihi a he wa ma susu ngɛ munyu nɛ nyɛɛ se ɔ mi?

¹⁷ Wa Tsɛ Yehowa wo wɔ si kaa e ma ha wɔ wa hiami níhi ke waa kɛ Matsɛ Yemi ɔ pee oti ngɛ wa si himi mi, nɛ wa hla e dami ɔ se blɔ kekle. (Mat. 6:33) Enɛ ɔ he ɔ, be tsuaa be ɔ, e sa nɛ anɔkuale Kristofohi nɛ a mwɔ a yi mi kpɔ kaa a maa pee e suɔmi nya ní. Yehowa wo si ke, ke waa kɛ kahi kpe ɔ, e ‘ma ha wɔ he wami nɛ wa kɛ da nya.’ Enɛ ɔ tsɔɔ we kaa e sa nɛ wa ma wa hɛ kɛ fɔ Baiblo sisi tomi mlaahi a nɔ. (Kane 1 Korinto Bi 10:13.) Ke ‘wa toɔ wa tsui si nɛ wa hyɛ Yehowa blɔ,’ nɛ waa kɛ wa ‘hɛ fɔ e nɔ,’ nɛ wa sɔleɔ kɛ biɔ nile kɛ blɔ tsɔɔmi, nɛ waa kɛ e mlaahi kɛ e sisi tomi mlaahi tsuɔ ní ɔ, ‘e maa piɛɛ wa he.’ (La 37:5, 7) Yehowa maa na mɔde nɛ wa ngɛ bɔe ɔ nɛ e maa jɔɔ wɔ. E ma ha nɛ wa maa ye “manye” ngɛ si himi mi.—Kɛ to 1 Mose 39:3 ɔ he.

¹⁸ Ke ni komɛ je a wekuhi a he nɛ lɔ ɔ ha nɛ suɔmi nɛ ngɛ a kpɛti ɔ he jɔ ɔ, mɛni ma nyɛ maa ye bua mɛ konɛ suɔmi ɔ mi nɛ wa ekohu? Mɛni wa ma nyɛ maa pee konɛ wa nyɛ nɛ waa hyɛ wa weku li a nɔ nɛ e be bie kaa waa hia blɔ kɛ je a he? Nɛ kɛ wa ma plɛ kɛ wo nihi he wami konɛ a mwɔ a yi mi kpɔ ngɛ nile mi ngɛ sanehi kaa kikɛ ɔ a he ha kɛɛ? Wa ma susu sane bimi nɛ ɔmɛ a he ngɛ munyu nɛ nyɛɛ se ɔ mi.