BAIBLO ɔ de ke: ‘Bimɛ ji weto ní nɛ Yehowa haa nɔ; bimɛ ji nike ní nɛ e kɛ dlooɔ nɔ.’ (La 127:3) Enɛ ɔ heje nɛ ke fɔli nɛ a ji Kristofoli fɔ ehe ɔ, a bua jɔɔ wawɛɛ ɔ nɛ.

Fɔli náa bua jɔmi ke a fɔ, se lɔɔ hu kɛ blɔ nya nítsumi nɛ mi jiɔ ba fɔɔ a nɔ. Loko bi ɔ maa wa nɛ e ma ba plɛ nɔkɔtɔma nɛ e ngɛ nɔmlɔtso mi he wami ɔ, e he hia nɛ a ha lɛ niye ní kpakpa daa. Loko huɛ bɔmi kpakpa maa hi bi ɔ kɛ Yehowa a kpɛti ɔ, e he hia nɛ fɔli nɛ a kudɔ mɛ nɛ a tsɔɔ mɛ Mawu Munyu ɔ mi sisi tomi mlaahi. (Abɛ 1:8) Mɛni be e sa kaa fɔli nɛ a bɔni a bimɛ tsɔsemi, nɛ mɛni ji ní komɛ nɛ e sa kaa a tsɔɔ mɛ?

Mo susu nɔ́ nɛ ya nɔ ngɛ nyumu ko nɛ e je Dan weku ɔ mi nɛ a tsɛɛ lɛ ke Manoa a si himi mi ɔ he nɛ o hyɛ. Nyumu nɛ ɔ je blema Israel ma ko nɛ a tsɛɛ ke Zora a mi. Yehowa bɔfo ko ha Manoa yo nɛ e ji yosa a lemi kaa e ma fɔ binyumu. (Many. 13:2, 3) Atsinyɛ jemi ko be he kaa munyu nɛ ɔ ha nɛ Manoa kɛ e yo ɔ ná bua jɔmi wawɛɛ. Se ní komɛ hu ngɛ nɛ e sa kaa a kɛ hɛdɔ nɛ susu he. Enɛ ɔ he ɔ, Manoa sɔle nɛ e de ke: ‘Yehowa, i kpa mo pɛɛ, Mawu nɔmlɔ ɔ nɛ o tsɔ ɔ, ha nɛ e kpale ba wa ngɔ ekohu nɛ e ba tsɔɔ wɔ bɔnɛ wa maa hɛɛ jokuɛ nyumuyo ɔ nɛ a ma fɔ ɔ ha.’ (Many. 13:8) Manoa kɛ e yo ɔ suɔ nɛ a le bɔnɛ a ma plɛ kɛ tsɔse a bi ɔ ha. Atsinyɛ jemi ko be he kaa a tsɔɔ a binyumu Samson Mawu mlaa a. E ngɛ heii kaa a mɔde bɔmi ɔ ye manye. Baiblo ɔ de ke: ‘Yehowa mumi ɔ bɔni Samson he nítsumi.’ Enɛ ɔ ha nɛ Samson tsu he wami nítsumihi kaa Israel manyadali ɔmɛ a ti nɔ kake.—Many. 13:25; 14:5, 6; 15:14, 15.

Jeha enyɛmɛ e sa kaa jokuɛ nɛ e ye loko a bɔni lɛ tsɔsemi? Timoteo nyɛ Eunike kɛ e na Lois ngɔ “Ngmami klɔuklɔu ɔ” kɛ tsɔse Timoteo kɛ je e “jokuɛ mi tɔɔ” aloo e bimwɔyo mi. (2 Tim. 1:5; 3:15) Ee, a kɛ Ngmami ɔ tsɔse Timoteo kɛ je e bimwɔyo mi tɔɔ.

Nile ngɛ mi kaa fɔli nɛ a ji Kristofoli ɔ maa sɔle kɛ bi blɔ tsɔɔmi kɛ je Yehowa ngɔ, konɛ a sɛ hlami nɛ a to blɔ nya kɛ ha bɔnɛ a ma plɛ kɛ tsɔse a bi kɛ je e “jokuɛ mi tɔɔ” ha. Abɛ 21:5 ɔ de ke: “Nɔ nɛ bɔɔ mɔde kɛ toɔ níhi a blɔ nya saminya a, e náa ní babauu.” Atsinyɛ jemi ko be he kaa enɛ ɔ ma ha nɛ fɔli ɔmɛ ma dla a he saminya kɛ to loko e maa su bi ɔ fɔmi be. Eko ɔ, a maa ngma níhi nɛ jokuɛ ɔ maa hia kɛ fɔ si. E he hia hu nɛ a to blɔ nya kɛ ha bɔnɛ a ma plɛ kɛ tsɔɔ jokuɛ ɔ Yehowa he ní ha. Oti nɛ e sa nɛ a kɛ ma a hɛ mi ji kaa a ma bɔni jokuɛ ɔ tsɔsemi kɛ je e bimwɔyo mi.

Womi nɛ ji Early Childhood Counts—A Programming Guide on Early Childhood Care for Development ɔ de ke: “Ke a fɔ jokuɛ ɔ nyɔhiɔ bɔɔ se ɔ, jamɛ a be ɔ mi nɛ e kalegbɔ ɔ waa. Be nɛ ɔ mi ji be nɛ jokuɛ ɔ kɛ kaseɔ ní wawɛɛ.” Enɛ ɔ he ɔ, nile ngɛ mi kaa fɔli ma du Yehowa mlaahi kɛ wo a bimɛ ɔmɛ a juɛmi mi ngɛ be kpiti nɛ ɔ mi!

Binyɛ ko nɛ e ji daa blɔ gbalɔ ɔ tu munyu nɛ nyɛɛ se nɛ ɔ ngɛ e biyo wayoo ko he: “I kɛ lɛ bɔni fiɛɛmi yami benɛ e ná nyɔhiɔ kake pɛ. E ngɛ mi kaa e nui níhi nɛ yaa nɔ ɔ sisi mohu lɛɛ, se i na kaa e ná tsɔsemi nɛ i kɛ ha lɛ kɛ je e bimwɔyo mi ɔ he se. Benɛ e ke e yeɔ jeha enyɔ ɔ, lɛ nitsɛ e nyɛɔ haa nihi nɛ waa kɛ mɛ kpeɔ ngɛ fiɛɛmi mi ɔ dɛ womihi.”

Ke a tsɔse bimɛ kɛ je a jokuɛ mi ɔ, e woɔ yiblii kpakpa. Se kɛ̃ ɔ, fɔli na kaa e yeɔ kaa a maa tsɔɔ a bimɛ Mawu he ní kɛ je a jokuɛ mi.

Jokuɛwi nyɛ we nɛ a hiɔ si ngɛ he kake dii be kɛkɛɛ, enɛ ɔ he ɔ, e yee ha fɔli kaa a maa tsɔɔ mɛ ní. Jokuɛwi jeɔ a juɛmi ngɛ níhi a nɔ kɛ yaa ní kpahi a nɔ mlamlaamla. A bɔɔ mɔde kaa a ma kpa níhi a si. Mɛni fɔli ma nyɛ maa pee kɛ ye bua a bimɛ konɛ a juɛmi nɛ hi níhi nɛ a tsɔɔ mɛ ɔ nɔ?

Mo susu nɔ́ nɛ Mose de ɔ he nɛ o hyɛ. E de ngɛ 5 Mose 6:6, 7 ɔ ke: “Mlaahi nɛ i ngɛ nyɛ woe mwɔnɛ ɔ, nyɛ hɛ nɛ hi a nɔ. Nyɛɛ tsɔɔ nyɛ bimɛ. Nyɛɛ sɛɛ he ní benɛ nyɛ ngɛ we mi, benɛ nyɛ hia blɔ, benɛ nyɛ hwɔɔ si, kɛ benɛ nyɛ te si.” Munyu nɛ ji “tsɔɔ” ɔ sisi ji, nɛ a maa tĩ nɔ́ nɛ a ngɛ nɔ ko tsɔɔe ɔ mi si abɔ. Jokuɛ nyafii ngɛ kaa tso nɛ a du nɛ hia kaa a pue nɔ nyu kpamkpam. Kaa bɔnɛ ke a tĩ munyu mi si abɔ nɛ́ nikɔtɔmahi nuɔ sisi saminya a, jã kɛ̃ nɛ e ji ngɛ jokuɛwi hu a blɔ fa mi!

Ja fɔli ná deka kɛ ha a bimɛ loko a ma nyɛ maa tsɔɔ mɛ anɔkualehi nɛ kɔɔ Mawu he. Enɛ ɔ peemi yee, ejakaa fɔli be deka. Se bɔfo Paulo wo fɔli he wami kaa a ‘he be nɛ a ma ná’ a kɛ tsu Mawu jami mi níhi a he ní. (Efe. 5:15, 16, NW) Mɛni blɔ nɔ a maa gu kɛ pee enɛ ɔ? Asafo mi nɔkɔtɔma ko e yo ji daa blɔ gbalɔ nɛ e be deka. E ba pee nyagba kɛ ha asafo mi nɔkɔtɔma a kɛ e yo ɔ kaa a  ma ná be nɛ sa kɛ tsɔse a biyo, kɛ tsu teokrase blɔ nya nítsumihi a he ní, kɛ be nɛ sa kɛ tsu a helo nya nítsumi. Mɛni blɔ nɔ a maa gu kɛ ná deka kɛ tsɔse a biyo ɔ? Tsɛ ɔ de ke: “Daa mɔtu loko ma ya nítsumi ɔ, i kɛ ye yo ɔ wa kaneɔ Ye Womi nɛ Sɛɛɔ Baiblo Mi Sanehi kɛ womi nɛ ji Examining the Scriptures Daily ɔ kɛ haa lɛ. Daa gbɔkuɛ ɔ, wa kaneɔ ní kɛ haa lɛ nɛ e buɔ tue loko e hwɔɔ si, nɛ waa kɛ lɛ yaa fiɛɛmi. Wa sume nɛ waa mlɛ nɛ e wa loko wa tsɔse lɛ.”

Ngɛ anɔkuale mi ɔ, wa suɔ nɛ wa bimɛ ɔmɛ nɛ a wa ba pee nikɔtɔmahi nɛ a le a blɔ nya nítsumi. Se yi mi tomi titli heje nɛ wa tsɔseɔ wa bimɛ ɔmɛ ji konɛ a ná suɔmi kɛ ha Yehowa kɛ je a tsui mi.—Mar. 12:28-30.

La 127:4 ɔ de ke: “Nihe mi bimɛ nɛ a fɔɔ ɔ ngɛ kaa ta bulɔ dɛ mi kɛ̃ɛ̃ mi bihi.” Baiblo ɔ kɛ bimɛ to kɛ̃ɛ̃ mi bihi nɛ a jeɔ blɔ tsɛ̃ɛ kaa e ya gbɔ nɔ́ ko nɛ a to kaa e ya gbɔ ɔ he. Ke kɛ̃ɛ̃ tsɛ̃lɔ ko ná tsɛ̃ kɛ̃ɛ̃ mi bi ko ɔ, e nyɛ we nɛ e kpaleɔ kɛ̃ɛ̃ mi bi ɔ se hu. Bimɛ ngɛ kaa “kɛ̃ɛ̃” mi bihi ngɛ fɔli a dɛ mi, ejakaa bimɛ kɛ a fɔli hiɔ si be bɔɔ ko pɛ. E sa nɛ fɔli nɛ a ngɔ jamɛ a be bɔɔ ɔ kɛ du Mawu jami mi sisi tomi mlaahi kɛ wo a bimɛ ɔmɛ a juɛmi kɛ a tsui mi.

Bɔfo Yohane de kɛ kɔ nihi nɛ e ye bua mɛ nɛ a ba pɛtɛ anɔkuale ɔ he ɔ a he ke: “Nɔ́ nɛ peeɔ mi bua jɔmi pe kulaa ji kaa ma nu kaa ye bimɛ ɔmɛ ngɛ nyɛɛe ngɛ anɔkuale ɔ nya.” (3 Yoh. 4) Ke fɔli nɛ a ji Kristofoli ɔ na kaa a bimɛ “ngɛ nyɛɛe ngɛ anɔkuale ɔ nya” a, mɛ hu a ma nyɛ ma de jã.