Moo ngɔ lɛ kaa hiɔ ko nɛ ma nyɛ maa gbe mo fia mo nɛ e he hia kaa a gba mo konɛ a je jamɛ a hiɔ ɔ. O maa suɔ kaa dɔkita nɛ ma gba mo ɔ nɛ pee nɔ ko nɛ o he lɛ ye wawɛɛ nitsɛ, ejakaa o wami ngɛ e dɛ mi. Anɛ nile be mi kaa o maa le bɔnɛ e bɔɔ mɔde ha loko o ma ha nɛ e gba mo lo?

Jã kɛ̃ nɛ nile ngɛ mi kaa nɔ ko ma susu jami nɛ e ngɛ mi ɔ he saminya. Ke o kɛ o he ya wo jami kuu ko mi ɔ, lɔɔ tsɔɔ kaa o suɔ nɛ jamɛ a jami kuu ɔ nɛ ye bua mo konɛ huɛ bɔmi kpakpa nɛ hi o kɛ Mawu nyɛ kpɛti. Jehanɛ se hu ɔ, lɔɔ tsɔɔ kaa o suɔ nɛ jamɛ a jami kuu ɔ nɛ ye bua mo konɛ o ná neneene wami hwɔɔ se.

Yesu tsɔɔ wɔ nɔ́ nɛ wa ma nyɛ maa da nɔ kɛ susu jami nɛ wa ngɛ mi ɔ he. E de ke: “Tso tsuaa tso ɔ, lɛ nitsɛ e yiblii a kɛ leɔ lɛ.” (Luka 6:44) Kaa nɔ hyɛmi nɔ́ ɔ, ke o hyɛ jami kuu ko ɔ, mɛni yiblii o naa kaa e woɔ? Anɛ nihi nɛ a da jamɛ a jami ɔ nya a tuɔ sika he munyu wawɛɛ tsɔ pe bɔnɛ sa lo? Anɛ nihi nɛ ngɛ jamɛ a jami ɔ mi ɔ kɛ Baiblo sisi tomi mlaa nɛ kɔɔ ta hwumi kɛ je mi bami he ɔ tsuɔ ní lo? Jehanɛ se hu ɔ, anɛ o ma nyɛ ma he jami ko maa ye lo? Wa suɔ nɛ o hla sane bimi nɛ ɔmɛ a heto ngɛ munyuhi nɛ nyɛɛ se ɔ a mi.